Simba Queens, Yanga Princess hapatoshi

BINGWA mtetezi wa Ngao ya Jamii, Simba Queens kesho inacheza na Yanga Princess katika mchezo wa nusu fainali ya Ngao ya Jamii kwa soka la wanawake Uwanja wa KMC, Dar es Salaam. Simba Queens walipata ubingwa kwa kuwafunga JKT Queens kwenye mchezo wa fainali Uwanja wa Azam Complex, Chamazi, Dar es Salaam na mchezo huo unatarajiwa kuwa wa upinzani kwa sababu msimu uliopita Yanga Princess alifungwa na Simba katika michezo yote. Kocha Msaidizi wa Simba Queens, Mussa Hassan ‘Mgosi’ alisema Yanga Princess ni timu nzuri na walipokutana nao msimu uliopita kwenye hatua kama hiyo waliwafunga. Alisema mchezo wa kesho dhidi yao hautakuwa rahisi. “Yanga Princess ni wazuri na kila msimu wanajipanga na kuimarika kutafuta kile wanachokitaka, msimu uliopita hatua kama hii tuliwafunga kwa penalti na kwenda kuchukua kombe kwa kuwafunga JKT Queens kwenye mchezo wa fainali. Tunaamini utakuwa mchezo mgumu kwa sababu watataka kulipa kisasi,” alisema Mgosi. Kocha wa Yanga Princess, Edna Lema alisema: “Mchezo utakuwa mgumu kama ilivyo kawaida ya mechi hizi za watani wa jadi, Simba Queens ni timu nzuri na wachezaji wao ni walewale, hivyo tunatarajia mchezo utakuwa mgumu na sisi kwa upande wetu tumejiandaa vizuri kuwakabili,” alisema Lema maarufu kama Mourinho. Mchezo wa mapema utazikutanisha JKT Queens na Ceasiaa Queens. Kwa mujibu wa kanuni za Ligi Kuu michuano ya Ngao ya Jamii itazikutanisha timu nne bingwa wa ligi dhidi ya mshindi wa tatu na mshindi wa pili dhidi ya mshindi wa nne. Simba Queens ndio bingwa wa Ligi Kuu msimu wa 2023/2024 iliyoshirikisha timu 10.

Samatta kundini tena Stars

NAHODHA wa timu ya soka ya Taifa ya Tanzania ‘Taifa Stars’, Mbwana Samatta amerejea kwenye kikosi cha timu hiyo kinachojiandaa na mechi za kuwania kufuzu Fainali za Mataifa ya Afrika (AFCON 2025) nchini Morocco. Kwenye kikosi hicho kilichotangazwa jana na Kaimu Kocha Mkuu wa Taifa Stars, Hemed Suleiman ‘Morocco’, jina la beki Novatus Dismas anayecheza soka la kulipwa Ulaya halimo kwa sababu ni majeruhi. Samatta anayeichezea PAOK ya Ugiriki, alikuwa miongoni mwa wachezaji wa kikosi cha Stars kilichoshiriki fainali za Afcon 2023 zilizofanyika Ivory Coast, Januari na Februari, mwaka huu. Akizungumza na waandishi wa habari, Kaimu Kocha Mkuu wa Taifa Stars, Morocco alitaja wachezaji 23 akiwemo Samatta ambaye alijiweka kando. Morocco alisema kikosi cha Taifa Stars kitaingia kambini Oktoba 4, mwaka huu kujiandaa na michezo miwili ya kufuzu Afcon dhidi ya Jamhuri ya Kidemokrasia Congo (DRC) utakaochezwa Oktoba 10 na kurudiana Oktoba 15. “Kikosi kitaingia kambini Oktoba 4, mwaka huu na Oktoba 7 tutaondoka kwenda Lubumbashi, DRC kwa ajili ya mchezo wetu wa kufuzu Afcon utakaochezwa Oktoba 10,” alisema Morocco. Kuhusu Novatus alisema hajaitwa kwa sababu ya majeruhi na alimpa pole na kumtakia kila la heri apone haraka na kurejea kwenye majukumu yake. Kikosi cha wachezaji 23 cha Stars kinaundwa na makipa Ally Salim (Simba), Zuberi Foba (Azam) na Yona Amos (Pamba Jiji). Mabeki ni Mohamed Hussein (Simba), Lusajo Mwaikenda na Pascal Msindo (Azam), Bakari Mwamnyeto, Dickson Job, Ibrahim Hamad 'Bacca' (Yanga), Abdulrazack Hamza (Simba). Viungo kuna Haji Mnoga (Salford City, Uingereza), Adolf Mtasingwa (Azam), Habib Khaleed (Singida BS), Feisal Salum (Azam), Mudathir Yahya (Yanga) na Himid Mao (Tala'ea El Gaish SC, Misri). Washambuliaji ni Mbwana Samatta, Clement Mzize (Yanga), Kibu Denis (Simba), Nassoro Saadun (Azam), Abdullah Said (KMC), Selemani Mwalim (Fountain Gate) na Cyprian Kachwele (Vancouver Whitecaps, Canada).

Simba kuanza ligi nyumbani, Yanga Ugenini

 

Simba

Yanga

SIMBA na Yanga zinatarajiwa kukutana Oktoba 19, mwaka huu katika mzunguko wa nane wa Ligi Kuu Tanzania Bara.

Katika mchezo huo ambao ratiba ilitolewa jana, Simba itakuwa mwenyeji ikitumia Uwanja wa KMC, Dar es Salaam na itakutana na Yanga ikiwa na kumbukumbu ya kipigo mara tatu mfululizo, michezo miwili ya Ligi Kuu msimu uliopita na juzi kwenye Ngao ya Jamii.

Aidha, Simba inatarajiwa kuanzia kurusha karata yake ya kwanza ikicheza na Tabora United, Agosti 18 Uwanja wa KMC, Mwenge Dar es Salaam.

Bingwa mtetezi Yanga wataanza kusaka ubingwa wa nne mfufulizo ikicheza na Kagera Sugar ugenini Agosti 29 katika Uwanja wa Kaitaba, Bukoba.

Agosti 16, mwaka huu, wageni kwenye ligi hiyo Pamba Jiji watawakaribisha Tanzania Prisons katika Uwanja wa Kirumba, Mwanza, Agosti 17 Mashujaa wataikaribisha Dodoma Jiji katika Uwanja wa Lake Tanganyika, Kigoma na Namungo dhidi ya Fountain Gate Uwanja wa Majaliwa, Lindi.

Ken Gold itacheza na Singida BS katika Uwanja wa Sokoine, Mbeya Agosti 18 mwaka huu, JKT Tanzania wataialika Azam FC katika dimba la Meja Jenerali Isamuhyo na Agosti 29, KMC itacheza na Coastal Union.

Mzunguko wa pili utaendelea Agosti 23, mwaka huu na ratiba hiyo yenye timu 16 inatarajiwa kumalizika Mei 24 mwakani.

ZENA CHANDE, SOMOE NG'ITU WACHUKUA FOMU KUGOMBEA TWFA

Zena Chande

Somoe Ng'itu

WANAHABARI wakonge Zena Chande na Somoe Ng’itu wamechukua fomu kwa ajili ya kugombea nafasi tofauti kwenye Uchaguzi Mkuu wa Chama cha Mpira wa Miguu Wanawake Tanzania (TWFA) unaotarajiwa kufanyika Septemba 14, mkoani Kilimanjaro.

Somoe ambaye kwa sasa ni Katibu Mkuu wa TWFA amechukua fomu kugombea nafasi ya Mwenyekiti wa chama hicho wakati Zena ambaye ni Mjumbe wa Mkutano Mkuu wa Shirikisho la Mpira wa Miguu (TFF) kutoka TWFA anawania kutetea nafasi yake.

Zena ambaye kitaaluma ni mwandishi wa habari wa gazeti la HabariLEO ni mzoefu katika nafasi mbalimbali za soka ikiwemo ikiwemo nafasi ya Ujumbe wa Kamati ya Utendaji ya Chama cha Waandishi wa Habari za Michezo (TASWA) na Naibu Katibu Mkuu wa chama hicho.

Kadhalika ni Mjumbe wa Kamati ya Maendeleo ya Soka la Wanawake ya TFF hadi sasa na Mjumbe wa Kamati ya Utendaji ya TWFA mkoa wa Dar es Salaam.

Pia amewahi kuwa mjumbe wa Kamati ya Tuzo ya TFF kuanzia mwaka 2017 hadi 2022 na ni Kamishna wa Ligi Kuu Tanzania Bara hadi sasa.

Kuhusu Somoe pia ni mwandishi wa habari wa gazeti la Nipashe na Kamishna wa Ligi Kuu Tanzania Bara, Mwenyekiti wa TWFA Mkoa wa Dar es Salaam na Mjumbe wa Kamati ya Maendeleo ya Soka la Wanawake ya TFF.

Katika taarifa iliyotolewa na Kamati ya uchaguzi huyo, Makamu Mwenyekiti Benjamin Kalume alisema wagombea walianza kuchukua fomu leo na mwisho ni Jumapili.

Pia alisema nafasi zinazogombewa ni Mwenyekiti, Mwakilishi Mjumbe wa Mkutano Mkuu wa TFF na Wajumbe wa Kamati ya Utendaji nafasi mbili.

“Mchujo utaanza Jumatatu Agosti 12 hadi 14 mwaka huu, majina yatachapishwa Agosti 15-16 na kuweka pingamizi na kupokelewa ni Agosti 16-19,” alisema Kalume.

Aidha alisema kamati itapitia mapingamizi Agosti 20-22 na majina yatatangazwa na kubandikwa kwenye mbao za matangazo Agosti 23 na 24 mwaka huu.

Kokteli ya Jack Daniel’s na Coca-Cola katika kopo yazinduliwa Dar

Brown-Forman Corporation  na  Kampuni ya Coca-Cola wameingiza mtaani kitu kipya  ambacho ni kileo kilicho tayari kwa kunywekwa (ARTD) .

Kinywaji hicho ambacho ni mchanganyiko wa Jack Daniel’s na Coca-Cola, ni kionjo kikamilifu cha kufurahia wakati mzuri na marafiki. 

"Tunafurahi kuleta Jack Daniel’s na Coca-Cola kwenye soko la Afrika na kuwapa watumiaji njia mpya na ya kusisimua ya kufurahia mchanganyiko wa chapa zetu mbili za kipekee," alisema Peter Orfanidis, Meneja wa Kanda wa Brown-Forman.

"Tunapoendelea kusikiliza wateja kupitia bidhaa zetu mpya na kupanua upatikanaji wa Jack Daniel’s na Coca-Cola duniani kote, tunafurahi kuanzisha kinywaji hiki kilichohamasishwa na moja ya kokteili maarufu zaidi duniani. 

"Bidhaa hii mpya inaonyesha kujitolea kwetu kuleta uzoefu bora wa ladha kwa watumiaji katika muundo rahisi wa kuwa tayari kunyweka," aliongeza Natasha Chetty, Mkurugenzi Mtendaji wa Bidhaa mpya katika kampouni ya Coca-Cola Afrika.

Kuingizwa mtaani kwa kinywaji hiki kunaonyesha dhamira ya dhati ya kampuni ya Coca-Cola ya kuwafanya wateja wake kuwa na furaha muda wote kwa kuwa na bunifu mbalimbali za kuwaburudisha.

Imeelekezwa kuwa baada ya kuzinduliwa kwa mafanikio katika masoko zaidi ya 25 duniani kote yakiwemo ya Marekani, Mexico, na Japan kinywaji cha Jack Daniel’s na Coca-Cola ARTD sasa kimefika Dar es salaam katika bara la Afrika.

Wataalamu wa vileo wamekiri kuwa ubunifu huu mpya utawapa watumiaji watu wazima wa Afrika fursa ya kufurahia ladha ya kipekee ya kokteili hii maarufu ya baa katika muundo rahisi wa kuwa tayari kunywekwa. 

Uzinduzi ulijumuisha aina mbili za vinywaji yaani, Jack Daniel’s na Coca-Cola ya asili, na toleo la Coca-Cola Zero Sugar, ili kukidhi mapendeleo tofauti ya watumiaji.

Msemaji wa Coca-Cola Company akizungumza katika uzinduzi alisema kampuni yake inaelewa jukumu lake muhimu katika kukuza kunywa kwa uwajibikaji miongoni mwa wale waliofikisha umri wa kisheria wa kunywa, na itafuata Sera yake ya Uuzaji wa Pombe kwa Uwajibikaji inayoongoza katika sekta hiyo. 

"Watumiaji wanaweza kutarajia kuona alama wazi za uwajibikaji kwenye kopo na ufungaji, ukisisitiza ujumbe kwamba kinywaji kinapaswa kufurahishwa kwa uwajibikaji na watu wazima tu waliofikisha umri wa kisheria wa kunywa," alisema.

Katika awamu ya kwanza baada ya uzinduzi kinywaji hicho kitapatikana katika maduka ya pombe na maeneo yaliyochaguliwa  na itakuwa inapatikana katika makopo ya milimita 300 yenye kiwango cha pombe cha asilimia 5.

TIMU YA TAIFA YA MICHEZO YA OLIMPIKI UFARANSA 2024 YAWASILI PARIS

Kundi la kwanza la wachezaji wa Tanzania watakaoiwakilisha nchi katika  Michezo ya Olimpiki limewasili salama asubuhi ya leo Julai 24, 2024 jijini Paris nchini Ufaransa.

Kundi hilo la kwanza lina waogeleaji wawili, Sofia Anisa Latiff na Collins Phillip  Saiboko na mwalimu wao Alexander Harrison Mwaipasi pamoja na Daktari wa timu, Dkt Eliasa Abdallah Mkongo. 

Waogeleaji wataanza kuchuana Agosti 30 mwaka huu, ambapo Collins Phillip Saiboko atashindana katika michuano ya mita 100 Freestyle kwa wanaume huku, Sofia Anisa Latiff atashindana Agosti 3,  katika mita 50 freestyle kwa wanawake.

Mwingine aliyewasili leo Paris ni mwalimu wa mchezo wa Judo, Innocent John Mallya, ambaye mchezaji wake, Andrew Thomas Mlugu (Kg 73), tayari yupo Paris kwa mwaka mmoja katika kambi maalumu ya mazoezi ya CRJ Centre iliyoandaliwa na Kamati ya Olimpiki ya Kimataifa (IOC) na ataanza kuingia dimbani Agosti 2 mwaka huu.

Wanamichezo wanne, ambao wote ni wakimbiaji wa Marathon, bado wako kambini Jijini  Arusha wakiendelea kujifua na wanatarajiwa kuwasili Paris Augosti 7 na Marathon itakuwa Agosti 11, 2024.

Wanariadha hao wa marathon ni wanaume Alphonce Felix Simbu na Gabriel Geay, na wanawake ni  Jackline Juma Sakilu na Magdalena Crispin Shauri.

KCB EAST AFRICA GOLF TOUR KUFANYIKA LUGALO

 

SHINDANO la wazi la mchezo wa gofu (KCB EAST Africa Golf tour) linatarajiwa kufanyika Agosti 3 mwaka huu katika Viwanja vya Lugalo Dar es Salaam.

Akizungumza Dar es Salaam leo, Mwenyekiti wa klabu ya Lugalo, Brigedia Jenerali mstaafu, Michael Luwongo alisema shindano hilo litashirikisha wachezaji 150 kutoka nchi mbalimbali na klabu za hapa nchini.

Luwongo alisema lengo ni kupata timu ya wachezaji wanne watakaokwenda kushiriki mashindano Nairobi, Kenya Desemba 6 mwaka huu.

"Maandalizi ya shindano hili yanaendelea vizuri, mpaka sasa tunaendelea kuboresha miundombinu ya viwanja vyetu ili shindano lifanyike kwa weledi” alisema Luwongo.

Pia aliipongeza Benki ya KCB kwa udhamini wao na kuwataka wale ambao hawajathibitisha ushiriki wao wafanye haraka muda umeisha.

Kwa upande wake Mkurugenzi wa KCB, Cosmas Kimario alisema benki hiyo inatoa huduma kwa jamii pamoja na michezo mbalimbali ikiwemo riadha, mpira wa miguu na ngumi.

"Tuna uhakika hii timu itakayokwenda Kenya itafanya vizuri na kurudi na ushindi nyumbani, ili fainali ijayo ifanyika hapa nchini, alisema Kimario.

Alisema wameamua kuwekeza katika michezo kwa lengo la kukuza vipaji vya vijana wadogo wanaochipukia.

Naye nahodha wa klabu ya Lugalo, Meja Japhet Masai alisema shindano hilo litachezwa kwa mfumo wa kuhesabu mashimo kwa pointi na atakayepata pointi nyingi atapata nafasi ya kwenda Kenya.