RAIS SAMIA: KILA MTANZANIA APANDE MTI MMOJA KILA MWAKA KUNUSURU TAIFA

Rais wa Jamhuri ya Muungano wa Tanzania, Mhe. Dkt. Samia Suluhu Hassan akikata Keki mara baada ya kuongoza Zoezi la kupanda miti kwenye eneo la Bungi Kilimo, Mkoa wa Kusini Unguja tarehe 27 Januari, 2026, wakati wa kumbukumbu ya siku yake ya kuzaliwa.

Rais wa Jamhuri ya Muungano wa Tanzania, Mheshimiwa Daktari Samia Suluhu Hassan, ametoa wito wa kitaifa akitaka kila mwananchi mmoja mmoja kuchukua hatua ya kupanda na kutunza angalau mti mmoja kila mwaka ili kulinda mustakabali wa nchi. Akiongoza zoezi la kupanda miti katika maeneo ya Bungi Kilimo na Kizimkazi mkoani Zanzibar leo Januari 27, Rais Samia amesisitiza kuwa juhudi za pamoja za Watanzania takribani milioni sabini zina uwezo wa kurejesha uoto wa asili na kukabiliana na athari za mabadiliko ya tabianchi.

Mheshimiwa Rais amebainisha kuwa mabadiliko ya tabianchi ni uhalisia unaoonekana kupitia ukame, mvua zisizotabirika, na ongezeko la kina cha bahari, mambo ambayo yanaathiri moja kwa moja maisha ya wananchi. Amesema kuwa upandaji miti si jambo la hiari tu, bali ni njia mahsusi ya kuhifadhi vyanzo vya maji na kuimarisha uzalishaji wa chakula kwa ajili ya kizazi cha sasa na kijacho.

Jambo jingine kubwa ambalo Rais amelihimiza kwa msisitizo ni umuhimu wa kuwashirikisha watoto katika juhudi hizo za utunzaji wa mazingira. Ameeleza kuwa malezi ya mapema yanayomfundisha mtoto kupanda na kusimamia mti yanajenga kizazi chenye upendo na uwajibikaji wa kulinda maliasili za Taifa tangu wakiwa wadogo.

Rais Samia pia amefafanua kuwa upandaji wa miti unaenda sambamba na fursa za kiuchumi, hususan katika biashara ya hewa ukaa kupitia misitu inayolindwa. Amesema kuwa hatua hizi zinaunga mkono Ajenda ya Maendeleo Endelevu ya kimataifa ya mwaka 2030, ambayo inalenga kukabiliana na mabadiliko ya tabianchi na kuhakikisha usalama wa chakula na maji safi.

Zoezi hili la leo ni sehemu ya kampeni ya kitaifa ya "27 ya Kijani" ambayo tangu kuanzishwa kwake mwaka 2023, imeshawezesha upandaji wa miche ya miti zaidi ya milioni mia moja na kumi na tatu nchini kote. Rais amewashukuru wadau mbalimbali wakiwemo Shirika la Utangazaji Tanzania (TBC) na Wakala wa Huduma za Misitu Tanzania (TFSA) kwa kuendelea kuhamasisha kampeni hiyo muhimu.