Serikali yaimarisha uratibu maandalizi ya AFCON 2027



Serikali imeendelea kuimarisha uratibu wa maandalizi ya mashindano ya Kombe la Mataifa ya Afrika (AFCON 2027) yanayotarajiwa kufanyika kuanzia Juni 19 hadi Julai 17, 2027.

Katika kuhakikisha kila kitu kinakwenda kwa wakati, wizara na taasisi mbalimbali za serikali zimekutana jijini Dar es Salaam kujadili hatua iliyofikiwa na kuweka mikakati thabiti ya kukamilisha maandalizi yote yanayohitajika.

Kikao hicho kilichoongozwa na Katibu Mkuu wa Ofisi ya Waziri Mkuu (Sera, Bunge, Uratibu na Wenye Ulemavu), Dk. Jim Yonazi, kilikutanisha makatibu wakuu wa wizara pamoja na watendaji wakuu wa taasisi za serikali.

Katika majadiliano hayo, maeneo kuu yaliyochambuliwa ni pamoja na maendeleo ya utekelezaji wa miradi ya miundombinu, uboreshaji wa bajeti, uratibu wa shughuli mbalimbali, pamoja na tathmini ya changamoto zilizojitokeza na hatua za haraka za kuzitatua.

Mashindano hayo ya AFCON 2027 yanaandaliwa kwa pamoja na nchi za Tanzania, Kenya na Uganda, ambapo kwa upande wa Tanzania inatarajiwa kutumia vituo vya Dar es Salaam, Arusha na Zanzibar.

 Kupitia Ofisi ya Waziri Mkuu ikishirikiana na Wizara ya Habari, Utamaduni, Sanaa na Michezo pamoja na taasisi zingine, serikali inaendelea kuratibu miradi ya ujenzi na ukarabati wa viwanja vya mashindano, viwanja vya mazoezi, barabara na miundombinu mingine wezeshi ili kuhakikisha nchi ipo tayari kuwapokea wageni na timu zitakazoshiriki.

No comments