MAKAMU WA RAIS ATAKA MATOKEO TANDAHIMBA, MAWAZIRI WATOA AHADI ZA BILIONI 4.6 ZA AFYA NA MAJI

 ZIARA ya kikazi ya Makamu wa Rais wa Jamhuri ya Muungano wa Tanzania, Mhe. Deogratius Ndejembi mkoani Mtwara imeweka msukumo mpya wa utatuzi wa kero za wananchi, baada ya Mawaziri kutoa ahadi za shilingi bilioni 4.6 papo hapo kwa ajili ya miradi ya maji na afya katika Wilaya ya Tandahimba.

Hatua hiyo imekuja kufuatia msisitizo wa Makamu wa Rais aliyetaka wananchi kuona matokeo ya haraka na kwa vitendo badala ya ahadi zisizo na utekelezaji.

Katika mkutano wa hadhara uliofanyika Tandahimba, Makamu wa Rais alitoa nafasi kwa mawaziri wenye dhamana kujibu moja kwa moja hoja na kero zilizowasilishwa na Mbunge wa Tandahimba, Mhe. Katani Ahmad Katani, ambapo wananchi walipata fursa ya kusikia majibu ya Serikali pamoja na kalenda ya upatikanaji wa fedha hizo.

Mchanganuo wa Fedha Zilizotengwa

Sekta	Mradi / Eneo	Kiasi cha Fedha	Muda wa Utoaji Fedha
Maji	Mradi wa Maji wa Makonde	Tsh 4.0 Bilioni	Mwisho wa Novemba 2026
Afya	Kituo cha Afya Mang’ombya	Tsh 600 Milioni	Kabla ya Desemba 2026
Afya	Kituo cha Afya Mchichira	Fedha zinasakwa	Ujenzi kuanza mara zitakapopatikana

Serikali Yatoa Maelekezo 

Akizungumza kwenye mkutano huo, Waziri wa Nchi, Ofisi ya Waziri Mkuu (TAMISEMI), Prof. Riziki Shemdoe alisema kuwa kufuatia maelekezo ya Makamu wa Rais, Wizara yake itatoa shilingi milioni 600 kabla ya mwezi Desemba kwa ujenzi wa kituo cha afya cha Mang’ombya. Aliongeza kuwa Serikali imedhamiria pia kutafuta fedha kwa ajili ya kituo cha afya cha Mchichira ili ujenzi uanze mara moja.

Kwa upande wa sekta ya maji, Waziri wa Maji, Mhe. Jumaa Aweso alisema Wizara hiyo itatoa shilingi bilioni nne kabla ya mwisho wa mwezi Novemba kumlipa mkandarasi wa Mradi wa Maji wa Makonde. Hatua hiyo inalenga kuongeza kasi ya utekelezaji wa mradi huo unaohudumia maeneo ya Tandahimba na Nanyamba, ambako uchakavu wa miundombinu ya zamani umekuwa kero sugu.

"Wananchi Hawataki Stori"

Akihitimisha majibu ya mawaziri hao, Makamu wa Rais Mhe. Deogratius Ndejembi alisisitiza kuwa Serikali ya Awamu ya Sita chini ya Rais Dkt. Samia Suluhu Hassan haitavumilia ucheleweshaji wa miradi.

"Wana Tandahimba hawataki stori. Wana Mtwara hawataki stori. Wanataka kuona matokeo," alisema Makamu wa Rais.

Alieleza kuwa majibu ya papo hapo yaliyotolewa na mawaziri hao yanaakisi kasi halisi ya Serikali ya Awamu ya Sita katika kutatua changamoto za wananchi kwa wakati. Makamu wa Rais anaendelea na ziara yake ya kikazi mkoani Mtwara kukagua miradi ya maendeleo na kusikiliza kero za wananchi.