ROSE MUHANDO AMKANA MCHUNGAJI WA KENYA ALIYEDAI KUMUOA
Muimbaji huyo wa kibao cha "Nibebe" alionekana kukerwa na maswali kuhusu muungano huo na kusisitiza kuwa hana uhusiano wowote na mchungaji huyo, jambo ambalo limezua sintofahamu na vichekesho miongoni mwa watumiaji wa mitandao ya kijamii nchini Kenya na Tanzania.
Hivi karibuni, Mchungaji Lumbasi aliushangaza umma kwa kutangaza hadharani kuwa yeye na Rose ni mume na mke. Madai haya yalikuja baada ya Rose Muhando kuwahi kukiri huko nyuma kuwa hajawahi kuolewa kwa sababu hajampata mwanaume anayeendana na mtazamo wake wa kibiblia kuhusu upendo, akieleza kuwa amewalea watoto wake watatu peke yake hadi kufika chuo kikuu bila msaada wa baba.
Lumbasi alidai kuwa alishalipa mahari nchini Tanzania mwaka 2023 na kwamba ndoa yao ilikuwa siri ya familia kwa ajili ya kukuza huduma yao ya kiroho.
Katika ibada moja kanisani, mchungaji huyo alimtambulisha Rose kwa hisia kali akimwita "mama wa watoto wangu" na "mpakwa mafuta," huku Rose akionekana kuona haya na kuficha uso wake kabla ya kuchukua kipaza sauti, kitendo kilichoshangiliwa na waumini wengi.
Hata hivyo, mambo yamegeuka baada ya Rose kujitenga na mchungaji huyo katika mahojiano yaliyofanyika Alhamisi, Januari 15. Alipopongezwa na mtangazaji kuhusu ndoa hiyo ya siri, Rose alionekana kupatwa na bumbuwazi na kukata kauli hiyo kwa kusema, "Hapana, hapana, hakuna kitu kama hicho."
Alisisitiza kwa sauti ya juu kuwa yeye ni mtumishi wa Mungu na kama kuna kitu kingekuwepo basi angeweka wazi, huku akiongeza kuwa bado anasubiri ombi lake la kupata mwanaume wa kizungu mwenye fedha.
Kumbukumbu zinaonyesha kuwa mwaka 2013, Lumbasi aliripotiwa kuwa na mke, Leticia Lunami, ambaye ni mhadhiri nchini Kenya na walijaliwa watoto watatu, ingawa hali ya sasa ya mahusiano yao haijulikani.
Lumbasi, ambaye pia ni ofisa mwandamizi wa polisi, amekuwa akitumika katika kanisa la Redeemed Gospel jijini Nairobi na chama cha polisi wakristo.
chanzo:Tuko
Post a Comment