KWA NINI SERIKALI KUWEKEZA KWA "CONTENT CREATORS" SIYO ANASA, BALI NI UWEKEZAJI

Katika siku za hivi karibuni, kumeibuka mjadala potofu mitandaoni unaodai kuwa hatua ya Serikali ya Awamu ya Sita, chini ya Mhe. Rais Dkt. Samia Suluhu Hassan, kutaka kuwawezesha wazalishaji wa maudhui (Content Creators) kwa mitaji na vifaa ni potezo la rasilimali.

Baadhi ya watu wanadai kuwa fedha hizo zingeelekezwa kwenye afya na elimu pekee. Hoja hii si tu kwamba ni finyu, bali inashindwa kusoma alama za nyakati katika uchumi wa kisasa wa kidijitali.

Kuna sababu nyingi kwanini vijana hawa ni lazima kuwezeshwa na kupinga hatua hiyo ni kutaka kurudisha nyuma maendeleo ya nchi.

Sanaa na Habari ni Ajira Rasmi, Siyo "Ujinga"

Kuna mtazamo wa kizamani unaoamini kuwa kijana  lazima asukume mkokoteni au auze maji ili aonekane anafanya kazi (kama baadhi ya maoni ya 'ndugu mmachame' yanavyodai). Tunapaswa kuelewa kuwa Content Creation ni sekta inayokua kwa kasi duniani.

Serikali inapoamua kutoa mitaji na vifaa vya kisasa (kamera, studio, kompyuta), inatengeneza ajira za kudumu kwa maelfu ya vijana ambao hawajajiajiri serikalini. Huu ni ukombozi wa kiuchumi unaopunguza mzigo kwa serikali kutafuta nafasi za ofisini kwa kila kijana.

 "Content Creators" Ndio Mabalozi wa Utalii na Diplomasia

Tumeona jinsi vijana wa Kitanzania waishio Oman walivyozunguka nchi tisa kuitangaza Tanzania. Je, wangewezaje kufanya hivyo bila vifaa bora na uwezo wa kiuchumi?

Nchi kama Morocco na Senegal zimepata sifa na mapato makubwa ya kitalii kwa sababu serikali zao zimewekeza katika michezo na sanaa. Serikali yetu inapotaka kuwaongezea uwezo vijana hawa, lengo ni kuwafanya wawe na vifaa vitakavyozalisha picha na video bora zinazoshindana kimataifa kuitangaza Tanzania. Hili ni soko la ajira linaloingiza fedha za kigeni.

Kuwekeza Kwenye Uchumi wa Kidijitali ni Kulinda Mustakabali

Wanaosema fedha zipelekwe afya na elimu pekee, wanasahau kuwa Afya na Elimu zinahitaji mapato (Tax). Mapato hayo yanatoka kwenye biashara na kazi za watu. Sekta ya habari na sanaa inachangia asilimia kubwa ya kodi na mzunguko wa pesa.

Leo hii, kijana mmoja mwenye maudhui bora anaweza kuvuta wafuasi kwa mamilioni. Hawa ni watu ambao serikali inaweza kuwatumia kupitisha kampeni za elimu ya afya (kama chanjo) au elimu ya uraia. Huwezi kuwa na elimu na afya bora ikiwa huna vyombo imara vya kuhabarisha jamii kwa ubunifu.

Vifaa Bora ni Silaha ya Ushindani

Kijana wa Kitanzania hawezi kushindana na mwanablogu wa Nigeria au Kenya ikiwa yeye anatumia simu ya kawaida (tochi) huku wenzake wakitumia kamera za 4K na AI. Serikali inatoa "vifaa vya kazi" kama ambavyo fundi seremala anavyopewa randa au mkulima anavyopewa trekta. Huu ni uwezeshaji wa rasilimali watu ili kuongeza tija.

Jibu kwa Wapinzani wa Maendeleo

Ni kweli kuwa, kama wadau wanavyosema katika maoni yao, "wapinzani wa Kitanzania hupinga kila kitu." Hata yale waliyokuwa wanayapigania (kama uhuru wa habari na kuwajali vijana), serikali ikitekeleza, bado watapinga. Huu ni ugonjwa wa kutotaka kuona vijana wa kitanzania wakifanikiwa kupitia vipaji vyao.

Badala ya kuwashauri vijana waliosoma wasukume mikokoteni pekee, tunapaswa kuipongeza serikali kwa kutambua kuwa "Kipaji ni Ajira." Kuwekeza kwa Content Creators ni kuwekeza kwenye "Nguvu Laini" (Soft Power) ya nchi.

Tanzania ya mwaka 2026 haiwezi kuongozwa na mawazo ya mwaka 1990. Dunia sasa iko mkononi (smartphones). Serikali inachofanya ni kuweka mafuta kwenye injini ya uchumi mpya unaoendeshwa na vijana wenyewe.