Watanzania Wahimizwa Kuienzi Amani, Kukataa Udini na Ukabila

Watanzania wakiadhimisha miaka 64 ya uhuru wa Tanzania Bara wametakiwa kuendelea kuienzi amani, utulivu na mshikamano vilivyo nguzo kuu za maendeleo, huku wakikataa kabisa vitendo vya udini na ukabila ambavyo vinaweza kuingiza nchi katika machafuko.

Huku kukumbushwa kwa umuhimu wa amani kunakuja wakati baadhi ya watu wanahimiza uharibifu na vurugu nchini, huku wao wakifurahia maisha ya utulivu katika nchi za nje.

Mwenyekiti wa Baraza la Ushauri wa Wazee Mkoa wa Pwani, John Kirumbi, amesema nchi yetu inaongozwa kwa amani na utulivu na mshikamano, akisisitiza: “Tusiruhusu amani na utulivu vilivyopo kutoweka kwani kuvirudisha gharama yake ni kubwa, tusikubali kuyumbishwa tuwe na mshikamano.” Kirumbi alihimiza kutoa elimu kwa vijana ili waweze kuyaenzi mambo haya muhimu kwa mustakabali wa nchi.

Akizungumza kwa upande wake, Kamanda wa Polisi Mkoa wa Pwani, Salim Morcase, amewataka wananchi kuendelea kuilinda amani ya nchi kwa kufuata sheria na kanuni za nchi. “Pia tulinde utulivu na kutokubali kuvunja utulivu uliopo, tushikamane kwa nguvu zote kuiletea nchi yetu maendeleo,” alisema Morcase.

Katibu wa Siasa, Uenezi na Mafunzo CCM Mkoa wa Pwani, Dk David Mramba, aliungana na wito huo akisema amani ni tunu ya taifa na msingi wa maendeleo. “Watanzania tuendelee kulinda amani yetu na tusikubali mtu kuivuruga kwani hiyo ni tunu ya taifa letu na tudumishe utulivu uliopo ili tuweze kusonga mbele kwenye shughuli zetu za kila siku,” alisisitiza Dk. Mramba.

Aidha, wachambuzi wa masuala ya jamii wamekumbusha maneno ya Baba wa Taifa, Mwalimu Julius Kambarage Nyerere, akionya kuwa taifa lisilo na amani huishia katika vurugu. Wamesema Watanzania hawapaswi kuendekeza udini na ukabila kama vigezo vya kuwahukumu watu au kupata viongozi, kwani kufanya hivyo ni kuhatarisha amani na kujifananisha na mataifa yaliyoingia katika migogoro mikubwa.

Ujumbe wa msingi unabaki kuwa: Amani na utulivu ni jukumu la kila Mtanzania, na gharama ya kuvunja utulivu huo ni kubwa mno kwa Taifa.