ELIMU FC YA BUNDA YATWAA KOMBE LA ESTER BULAYA

TIMU ya Elimu Fc juzi imetwaa Ubingwa wa mashindano ya Esther Bulaya Cup kwa Mwaka 2013 baada ya kuifunga Bunda Sport Club kwa penalti 3-1 baada ya mchezo kumalizika kwa kufungana 1-1.

Elimu FC ilijinyakulia kombe pamoja na shilingi milioni moja na mshindi wa pili alipata  500,000 na mshindi wa tatu Town Stars waliokuwa mabingwa watetezi walipata 300,000 pamoja na seti moja jezi. 

Mashindano haya yanadhaminiwa na Mbunge wa Viti Maalum Kupitia Vijana (CCM) Esther Bulaya, na yalizikutanisha timu 30 za wilaya ya Bunda mkoa wa Mara.

Akiongea kwa simu na BINGWA, Ester Bulaya ambaye ni Mbunge wa viti maalum kupitia Vijana (CCM) alisema  anashukuru mashindano yamemalizika na bingwa kupatikana ila kulikuwepo na baadhi ya watu ambao walipanga mikakati ya kuhujumu  yasifanyike.

“Kuna baadhi ya watu walitaka kuhujuma ila wajue kuwa kufanya hivyo siyo kwamba wananikomoa mimi bali watakuwa hawawatendei haki Vijana wa Bunda ambao ndiyo walengwa katika kukuza vipaji vyao”, alisema Ester.

Pia alisema vijana ambao walionyesha viwango vizuri katika soka watatafutiwa timu  pia ataendela kudhamini  mashindano hayo yachezwe katika wilaya zote za mkoa wa Mara kwani yeye ni Mbunge wa vija wote bila kujali itikadi za vyama

Michuano hiyo ya Esther Bulaya Cup 2013 iliunganisha Michezo mbalimbali ikiwemo Michezo ya bao,draft pamoja na Pool table,ambapo na kila mchezo zawadi mbambali zilitolewa na kughalimu kiasi cha zaidi ya shilingi milioni 12 kwa mwaka huu.