AFCON 2027: KARIA AANIKA MKAKATI WA TAIFA STARS

RAIS wa Shirikisho la Mpira wa Miguu Tanzania (TFF), Wallace Karia, amesema kuwa dira na malengo makuu ya timu ya Taifa, Taifa Stars, ni kuhakikisha inafanya vizuri na kuacha alama katika michuano ya Kombe la Mataifa ya Afrika (AFCON 2027) itakayofanyika katika nchi za Afrika Mashariki.

Akizungumza mbele ya Rais wa Jamhuri ya Muungano wa Tanzania, Mhe. Dkt. Samia Suluhu Hassan, katika hafla ya kuwapongeza wanamichezo iliyofanyika Ikulu, Dar es Salaam, Karia alibainisha kuwa mafanikio yaliyopatikana sasa ni chachu ya kufanya vizuri zaidi mwakani.

Shukrani kwa Serikali na Miundombinu

Karia aliishukuru Serikali ya Awamu ya Sita chini ya Rais Samia kwa kutoa rasilimali zote muhimu na uwekezaji mkubwa katika miundombinu ya michezo, jambo ambalo limekuwa mhimili mkuu wa ufanisi katika maandalizi ya michuano hiyo mikubwa barani Afrika.

Mafanikio ya Soka la Vijana na Wanawake

Rais huyo wa TFF alianika msururu wa mafanikio ambayo shirikisho limeyapata kupitia soka la vijana na wanawake, akitaja kuwa Tanzania sasa ni tishio barani Afrika:

Soka la Wanawake: Tanzania ilidhihirisha ukubwa wake kwa kufuzu Kombe la Dunia kwa wasichana chini ya umri wa miaka 17 (U-17).

Mabingwa wa Afrika (U-15): Timu ya wasichana chini ya miaka 15 iliibuka mabingwa wa Afrika kule Durban (2023). Mafanikio hayo yaliendelezwa na timu ya wavulana (U-15) iliyotwaa ubingwa wa Afrika mara mbili mfululizo; kwanza Zanzibar (2024) na kisha Accra, Ghana (2025).

Nigeria 2026: Karia alibainisha kuwa timu za wavulana na wasichana (U-15) tayari zimefuzu tena kushiriki Mashindano ya Afrika yatakayofanyika nchini Nigeria mwaka huu.

Kituo cha Mnyanjani: Kiwanda cha Vipaji

Akielezea siri ya mafanikio hayo, Karia alikitaja Kituo cha Maendeleo cha TFF kilichopo Mnyanjani, mkoani Tanga, kuwa ndicho "kiwanda" kinachozalisha hazina ya wachezaji hao baada ya kusakwa nchi nzima kupitia programu za kusaka vipaji.

"Malengo yetu ni kuhakikisha vijana hawa wanaendelezwa ili waweze kuingia kwenye timu kuu ya Taifa Stars na kutupa matokeo bora tunayoyatarajia katika AFCON 2027 na mashindano mengine ya kimataifa," alisema Karia.