NDEJEMBI AKIHITIMISHA MBIO ZA MWENGE ASISITIZA VITA DHIDI YA RUSHWA NA MIHADARATI

 

Makamu wa Rais wa Jamhuri ya Muungano wa Tanzania, Mhe. Deogratias John Ndejembi, amehitimisha rasmi Mbio za Mwenge wa Uhuru mwaka 2026, huku akiwataka Watanzania kuendeleza mapambano dhidi ya rushwa, dawa za kulevya, maradhi na umaskini, sambamba na kulinda amani, umoja na mshikamano wa kitaifa kama nguzo muhimu za maendeleo.

Akizungumza katika Viwanja vya CCM Nelson Mandela, Sumbawanga mkoani Rukwa, Makamu wa Rais amesema falsafa ya Mwenge wa Uhuru haipaswi kuishia katika maadhimisho ya kuufunga, bali lazima itafsiriwe kwa vitendo kupitia uwajibikaji, uzalendo na ushiriki wa wananchi katika kujenga Taifa lenye haki na ustawi.

Amani na Mshikamano

Mhe. Ndejembi amesema Mwenge wa Uhuru ulioasisiwa na Baba wa Taifa, Hayati Mwalimu Julius Kambarage Nyerere, umeendelea kuwa alama ya ukombozi, haki na mshikamano, akisisitiza kuwa amani ndiyo msingi wa utekelezaji wa mipango mikubwa ya maendeleo, ikiwemo Dira ya Taifa ya Maendeleo 2050.

Amesema kaulimbiu ya mwaka huu, “Tanzania ni yetu sote, tushikamane kwa pamoja kuleta maendeleo,” inawakumbusha Watanzania wajibu wa kuweka maslahi ya Taifa mbele ya tofauti za kisiasa, kidini na kimtazamo, huku akisisitiza kuwa bila amani na utulivu hakuna maendeleo yanayoweza kupatikana.

Mifumo ya Serikali

Katika hatua nyingine, Makamu wa Rais amezitaka Wizara na Taasisi za Serikali kutekeleza kwa vitendo agizo la Rais Dkt. Samia Suluhu Hassan la kuhakikisha mifumo ya Serikali inasomana na kubadilishana taarifa ili kurahisisha utoaji wa huduma kwa wananchi.

Ametolea mfano alichokishuhudia alipotembelea Maonesho ya Wiki ya Vijana Kitaifa, ambapo Wizara mbili zinazoshughulikia masuala ya vijana—moja chini ya Ofisi ya Waziri Mkuu na nyingine Ofisi ya Rais—zimebuni mifumo tofauti inayolenga kuwahudumia vijana lakini mifumo hiyo haisomani, hali inayoweza kuwaongezea usumbufu walengwa badala ya kuwarahisishia upatikanaji wa fursa.

Uondoaji Urasimu

Amesisitiza Wizara hizo kutekeleza maelekezo aliyoyatoa kwa Wenyeviti wa Bodi na Taasisi za Serikali mkoani Arusha, Septemba 28, 2026, kwa kukaa pamoja na kuandaa mpango wa kuwawezesha vijana kupata ujuzi kupitia mafunzo kwa vitendo sehemu za kazi.

Sambamba na hayo, ametoa agizo la kuhakikisha mifumo iliyobuniwa inaunganishwa ili kurahisisha upatikanaji wa taarifa, huduma na fursa za kiuchumi.

Amesema hatua hiyo ni muhimu katika kuondoa urasimu, kuongeza ufanisi wa taasisi za umma na kuweka mazingira yatakayowawezesha vijana kunufaika na fursa zilizopo, kujiajiri na kushiriki kikamilifu katika uzalishaji mali.

Rushwa, Dawa za Kulevya

Akigeukia usimamizi wa miradi ya maendeleo, Makamu wa Rais amewataka Wakuu wa Mikoa, Wakuu wa Wilaya na watendaji wa Serikali kuhakikisha miradi iliyokaguliwa, kuzinduliwa au kuwekewa mawe ya msingi na Mwenge wa Uhuru inatekelezwa kwa ubora unaolingana na thamani ya fedha zilizotumika, huku hatua stahiki zikichukuliwa dhidi ya uzembe na hujuma.

Aidha, amesisitiza kuimarishwa kwa mapambano dhidi ya rushwa, biashara na matumizi ya dawa za kulevya, akibainisha kuwa vitendo hivyo vinadumaza maendeleo na kuhatarisha nguvu kazi ya Taifa, hususan vijana.

Tahadhari

Kuhusu afya, Mhe. Ndejembi ameonya juu ya kuendelea kwa tishio la VVU na UKIMWI, akibainisha kuwa takribani Watanzania milioni 1.7 wanaishi na VVU, huku kiwango cha maambukizi kwa watu wenye umri wa miaka 15 na zaidi kikiwa asilimia 4.4 kwa mujibu wa utafiti wa mwaka 2022/2023.

Amesema vijana, hususan wasichana na wanawake vijana, wanahitaji kupewa kipaumbele katika elimu na huduma za kinga, sambamba na kuimarisha mapambano dhidi ya malaria. Aidha, amewahimiza vijana zaidi ya milioni 21 nchini kutumia fursa za kilimo, biashara, teknolojia na ujasiriamali ili kujenga uchumi wao na kuchangia maendeleo ya Taifa.

Kumuenzi Mwalimu Nyerere

Akimkaribisha Makamu wa Rais kuhutubia wananchi, Waziri Mkuu wa Jamhuri ya Muungano wa Tanzania, Mhe. Dkt. Mwigulu Nchemba, amesema maadhimisho ya Mwenge wa Uhuru yanapaswa kuwa chachu ya Watanzania kuendeleza misingi ya Taifa iliyoasisiwa na Baba wa Taifa, ikiwemo amani, umoja, upendo, haki, uzalendo, uadilifu na utu.

Amesema misingi hiyo inapaswa kuongoza maisha ya kila siku na utendaji wa viongozi, huku akibainisha kuwa Serikali ya Awamu ya Sita chini ya Rais Dkt. Samia Suluhu Hassan inaendelea kuimarisha misingi hiyo.

Naye Waziri wa Nchi, Ofisi ya Rais – Maendeleo ya Vijana, Mhe. Joel Nanauka, amesema Mbio za Mwenge wa Uhuru mwaka 2026 zimeendelea kuwa jukwaa muhimu la kuhamasisha maendeleo, kuimarisha uzalendo na kuwashirikisha wananchi katika kufuatilia utekelezaji wa miradi mbalimbali.

Ameongeza kuwa mbio hizi zimesaidia kutoa elimu ya mapambano dhidi ya rushwa, dawa za kulevya na VVU/UKIMWI.

Wananchi Wataka Uwazi

Awali, akiwasilisha ripoti ya Mbio za Mwenge wa Uhuru mwaka 2026, Kiongozi wa Mbio hizo Kitaifa, Wazo Mwang’onda, amesema wananchi wamepongeza juhudi za Serikali katika kutekeleza miradi ya kimkakati.

Hata hivyo, amebainisha kuwa wananchi wameendelea kusisitiza umuhimu wa kuimarisha uwazi na uwajibikaji katika usimamizi wa rasilimali za umma, pamoja na kupanua fursa za uwezeshaji wa kiuchumi kwa vijana na wanawake kupitia mikopo yenye masharti nafuu, mafunzo ya ujuzi na elimu ya ujasiriamali. Mwang’onda amesema wananchi pia wamehimiza kuimarishwa kwa elimu ya uraia, maadili na matumizi ya misingi ya sheria katika kushughulikia changamoto zao.

Mwenge wa Uhuru 2026

Makamu wa Rais, Mhe. Deogratias John Ndejembi, alikuwa mgeni rasmi katika kilele cha Mbio za Mwenge wa Uhuru mwaka 2026, akimwakilisha Rais wa Jamhuri ya Muungano wa Tanzania, Mhe. Dkt. Samia Suluhu Hassan.

Maadhimisho hayo yaliyofanyika Sumbawanga mkoani Rukwa yameenda sambamba na kumbukizi ya miaka 27 ya kifo cha Baba wa Taifa, Mwalimu Julius Kambarage Nyerere, pamoja na Maonesho ya 26 ya Wiki ya Vijana Kitaifa, huku yakihitimisha safari ya Mwenge wa Uhuru iliyoanza Aprili 2, 2026.

mwish