Viongozi wa Dini Wahimiza Amani na Utiifu kwa Mamlaka nchini Tanzania

Viongozi wa madhehebu ya Kiislamu na Kikristo nchini wametoa rai kwa Watanzania kuhakikisha wanadumisha amani, umoja, na mshikamano wa kitaifa kupitia maombi na kuheshimu serikali iliyopo madarakani. 

Wito huo ulitolewa jijini Dar es Salaam wakati wa kongamano maalumu lililowakutanisha viongozi hao kujadili ustawi wa taifa na mbinu za kulinda utulivu uliopo nchini.

Mwenyekiti wa kongamano hilo, Sheikh Said Mwaipopo, amewakumbusha wananchi kuwa utiifu kwa serikali na viongozi wake ni takwa la kidini kwani mamlaka zote zimewekwa kwa mujibu wa mafundisho ya vitabu vitakatifu. 

Sheikh Mwaipopo ametoa onyo kali kwa wanasiasa wanaotumia majukwaa yao kuchochea migawanyiko miongoni mwa wananchi, akisisitiza kuwa vitendo hivyo ni hatari kwa usalama wa taifa.

Kwa upande wake, Askofu George John amebainisha kuwa utajiri wa rasilimali na amani ya kudumu ni baraka za kipekee kwa Tanzania ambazo zinapaswa kulindwa kwa gharama yoyote. 

Amesema ni jukumu la kila mwananchi kuendelea kuiombea nchi ili mshikamano uliopo uendelee kuimarika kwa faida ya vizazi vya sasa na vijavyo.

Msisitizo mwingine umetolewa na Mchungaji Sayuni Mwakatobe ambaye amewageukia vijana na kuwataka kuwa makini na matumizi ya teknolojia ya kisasa. 

Amewasihi vijana kutumia mitandao na vifaa vya kidijitali kwa ajili ya kujiletea maendeleo na ubunifu badala ya kugeuza nyanja hizo kuwa vichocheo vya vurugu na migawanyiko katika jamii.