TAKWIMU ZA NBS KUANIKA FURSA VIJANA, SEKTA ISIYO RASMI KUNEEMEKA

Ofisi ya Taifa ya Takwimu (NBS) imezindua tafiti nne kubwa za kitaifa ambazo zinatarajiwa kuwa mhimili wa ustawi wa kiuchumi kwa vijana wanaosaka fursa, baada ya kuweka mkazo maalum katika sekta isiyo rasmi na huduma za kifedha kwa wafanyabiashara wadogo. 

Hatua hiyo inalenga kukusanya ushahidi wa kitakwimu utakaosaidia Serikali kubuni programu za mikopo, bima, na huduma za kidijiti zinazoendana na uhalisia wa vijana wanaojitafuta katika sekta ya biashara na uzalishaji viwandani nchini kote.

Mtakwimu Mkuu wa Serikali, Dk. Amina Msengwa, amebainisha kuwa tafiti hizo zinazojumuisha Utafiti wa Sekta Isiyo Rasmi na Utafiti wa Huduma za Fedha kwa Wafanyabiashara Wadogo, zitafanyika katika maeneo zaidi ya 1,500 nchi nzima. 

Kupitia utafiti huo, Serikali itapata picha halisi ya mazingira ya biashara na vikwazo vinavyowakabili vijana, jambo litakalosaidia kuhuisha Pato la Taifa (GDP) na kuimarisha Mkakati wa Taifa wa Ujumuishaji wa Kifedha ili kuongeza upatikanaji wa mitaji kwa wajasiriamali wadogo.

Zoezi hilo la miezi miwili, linaloanza Machi 11 hadi Mei 10 mwaka huu, litahusisha wadadisi na wasimamizi zaidi ya 700 watakaotumia teknolojia ya vishikwambi kukusanya taarifa katika taasisi za biashara na viwanda zaidi ya 12,000. 

Lengo la ziada la Utafiti wa Uzalishaji Viwandani ni kubaini orodha ya viwanda, teknolojia inayotumika, na idadi ya wafanyakazi, hatua itakayoiwezesha Serikali kuimarisha programu za maendeleo ya ujuzi zinazogusa nguvu kazi ya vijana moja kwa moja.

Aidha, Dk. Msengwa amesisitiza kuwa NBS inaendelea na Utafiti wa Watu Wenye Uwezo wa Kufanya Kazi wa Mwaka 2026, ambao ni muhimu katika kupata viashiria sahihi vya soko la ajira na ukubwa wa nguvu kazi nchini. 

Takwimu hizo ni msingi wa utekelezaji wa Dira ya Taifa ya Maendeleo ya mwaka 2050 na Ajenda ya Afrika ya 2063, zikilenga kuhakikisha kuwa kila sera inayopangwa inazingatia mahitaji ya vijana na wafanyabiashara wadogo ambao ndio injini ya uchumi wa sasa.

Mbali na sekta ya biashara, NBS pia inafanya tafiti katika maeneo ya huduma za maji kwenye vituo vya afya na mbinu mpya za kuhesabu mifugo kwa ushirikiano na Benki ya Dunia na TALIRI. 

Usimamizi huu wa takwimu unahakikisha kuwa taarifa zote zinazokusanywa zinabaki kuwa siri kwa mujibu wa sheria, lakini matokeo yake yanatumika kama dira ya kuwakwamua vijana kutoka katika changamoto za mitaji na kuwafanya kuwa washiriki wakubwa wa uchumi wa viwanda.