WALCOT ATACHUKUA JEZI YA VAN PERSIE KIMYAKIMYA

Van Persie (kulia) akivua jezi yake kumpa Santos

LONDON, England

JEZI ya huyu jamaa ilimponza Andre Santos, akaonekana ananuka ndani ya Emirates kuanzia kwa mashabiki hadi kwa kocha wake.

Hapa ni wakati Mbrazil huyo, alichukua jezi ya fowadi wa zamani wa timu hiyo, Robin van Persie wakati wa mapumziko katika mchezo uliofanyika kwenye Uwanja wa Old Trafford jijini Manchester mwaka jana na Arsenal kukumbana na kipigo cha mabao 2-1.

Kilichowauma zaidi mashabiki wa Arsenal ni kwamba, Van Persie aliwafunga bao la mapema kabisa katika mchezo huo, ambapo hadi mapumziko, tayari Washika Bunduki hao walikuwa nyuma kwa bao 1-0, hivyo kitendo cha Santos kuchukua jezi ya RVP wakati walipokuwa wakitoka uwanjani kwenda vyumbani, ilionekana kama usaliti.

Santos alihukumiwa kwa jambo hilo na kuonekana hafai tena, licha ya kwamba kwenye mechi hiyo hakucheza kwa kiwango chake kilichobora, lakini Wenger alimtupa nje kwenye kipindi cha pili na tangu hapo hakucheza tena na kuamua kumtoa kwa mkopo kwa kumpeleka Gremio.

Baada ya kuona mwenzake ameponzwa kwa kitendo cha kuchukua jezi ya Van Persie hadharani, mbele ya mashabiki wa timu hiyo pale la Old Trafford, Theo Walcott sasa ametumia ujanja wa kuwaficha mashabiki pamoja na kocha wake, ili kuichukua jezi ya swahiba wake huyo wa zamani, RVP.

Jumapili iliyopita, wakati Van Persie aliporejea Emirates akiwa na kikosi chake kipya, mabingwa wa England, Man United, Theo Walcott alimsubiri Mdachi huyo kwenye korido kumwomba jezi yake baada ya kuona kwamba ingekuwa zengwe kubwa kama angebadilishana naye mbele ya macho ya mashabiki.

Na wakati alipokuwa akifanyiwa mahojiano baada ya mechi hiyo, ambapo Theo Walcott alifunga bao la kuongoza kabla ya Van Persie kusawazisha na kufanya mchezo huo kumalizika kwa sare ya bao 1-1, winga huyo wa England alionekana akiwa ametinga jezi ya Man United, iliyodhaniwa kuwa ni ya fowadi huyo wa Uholanzi.

Ni kweli, jezi hiyo ilikuwa ni ya Van Persie, ambapo wawili hao walibadilisha wakati wanapita kwenye korido la uwanjani hapo, Emirates lakini safari hii ikiwa ni baada ya filimbi ya mwisho na si kama ilivyokuwa kwa Santos, ambapo ilikuwa wakati wa mapumziko.

Santos aliwachefua mashabiki wa Arsenal kwasababu tu alimfuata Van Persie na kumwomba jezi. Walcott yeye alisubiri pasipokuwa na watu na kuchukua jezi ya Van Persie, ili mambo yasimgeuke na kuonekana kituko.