SCHOLES AMFUATA FERGIE, ATUNDIKA DALUGA RASMI

KIUNGO wa Manchester United, Paul Scholes amethibithisha kuwa atatundika daluga mwisho wa msimu huu.

Scholes (38), aliwahi kutundika daluga mwisho wa msimu wa 2010-11, lakini baada ya kufanya kazi ya ukocha kidogo alirudi uwanjani, Januari 2012, baada ya kuona kwamba alichukua uamuzi wa mapema mno kustaafu soka Old Trafford.

Majeruhi yamemfanya acheze kidogo msimu huu, huku akishindwa kucheza mechi yoyote ya Ligi Kuu England, mwaka 2013.

Katika mahojiano na mchezaji mwenzake wa zamani, Gary Neville anayefanya kazi ya utangazaji kwenye kituo cha Sky Sports, Scholes alisema kwamba huu ni wakati muafaka kwake kutundika daluga.

Alipoulizwa kama atakuwa kwenye kikosi cha David Moyes msimu uajo: Scholes alijibu: “Hapana. Naamini huu ni wakati wa kustaafu. Haukua msimu ambao ningetaka kustaafu. Miezi minne iliyopita imekuwa migumu kwangu. Najua akilini mwangu kuwa nimemaliza kila kitu.”

Hii inamaana Scholes atastaafu wakati mmoja na Sir Alex Ferguson, na kiungo huyo hakusita kumfagilia Ferguson, huku akiamini kuwa Moyes atafanya vizuri Old Trafford.