TRA SASA TAYARI KUZINDUA MFUMO MPYA WA KODI ‘IDRAS’

• Huduma kurejea saa 24, mifumo ya zamani kuunganishwa kuwa mmoja

• Mlipakodi kutokewa na makadirio ya haki, barua na majibu sasa ni kidijitali

• Kamishna Mwenda: Mfumo una uwezo wa kuunganishwa na mifumo mingine 500

MAMLAKA ya Mapato Tanzania (TRA) inatarajia kurejesha huduma zake kote nchini , Februari 9, 2026, huku ikiingia katika mapinduzi mapya ya kidijitali kupitia Mfumo Jumuishi wa Usimamizi wa Ukusanyaji wa Mapato ya Ndani (IDRAS).

Mfumo huo mpya ambao utakuwa ukifanya kazi kwa saa 24, siku saba za wiki, unalenga kuondoa usumbufu kwa walipakodi, kuongeza ufanisi na kuhakikisha kunakuwepo na haki katika makadirio ya kodi.

Mabadiliko ya Muda ya Huduma

Kupitia taarifa iliyotolewa na Idara ya Elimu kwa Mlipakodi na Mawasiliano, TRA imewatahadharisha wananchi kuhusu kusimama kwa muda kwa huduma za kodi za ndani kuanzia Februari 7 saa 1:00 usiku hadi Februari 8, ili kupisha mabadiliko hayo makubwa ya kimfumo.

“Tunatarajia kuwa huduma zetu zitarejea kikamilifu Februari 9, 2026, baada ya kukamilisha maboresho haya ya mifumo inayosimamia kodi za ndani,” ilieleza taarifa hiyo.

Sifa za Mfumo wa IDRAS

Mfumo huu wa IDRAS si tu utarahisisha malipo, bali unakwenda kuwa kiunganishi kikuu cha huduma zote za TRA ambazo awali zilikuwa katika mifumo tofauti. Sifa zake ni pamoja na:

Uwazi na Haki: Mfumo una uwezo wa kutoa makadirio sahihi ya kodi kulingana na taarifa za mlipakodi, hivyo kuzuia uonevu au ukandamizaji.
Mawasiliano ya Kidijitali: Barua za kodi na majibu yake sasa zitapokelewa na kuwasilishwa kupitia mfumo huo.
Muunganisho wa Mifumo: IDRAS ina uwezo wa kuungana na mifumo mingine zaidi ya 500. Kwa sasa, umeanza kwa kuunganishwa na mifumo 60, ukiwemo mfumo wa Forodha ili kufuatilia mauzo na mapato kwa usahihi.
Utunzaji wa Kumbukumbu: Serikali imewekeza katika mfumo huu ili kuwasaidia wafanyabiashara kutunza kumbukumbu zao kwa usalama na kurahisisha biashara.

Maandalizi na Mafunzo

Kabla ya kuanza kutumika kwa mfumo huu, Kamishna Mkuu wa TRA, Yusuph Mwenda, alizindua mafunzo maalum Januari 15, mwaka huu. Mafunzo hayo yaliyodumu kwa wiki mbili, yalihusisha washauri wa kodi na walipakodi kutoka mikoa yote 33 ya kikodi nchini ili kuhakikisha kila mdau anakuwa na uelewa wa kutosha wa mfumo huo wa kisasa.

Kuzinduliwa kwa IDRAS kunatajwa kama hatua kubwa ya TRA katika kuimarisha mazingira ya biashara nchini na kuhakikisha serikali inapata mapato yake kwa njia ya haki na kisasa zaidi.