Makamu wa Rais wa
Jamhuri ya Muungano wa Tanzania Mhe. Deogratius Ndejembi amesema uwekezaji wa
Serikali katika mradi wa bomba la gesi kutoka Ntorya kwenda Madimba, mkoani
Mtwara, unaweka msingi wa kuongeza mchango wa gesi asilia katika uchumi wa
taifa kupitia uzalishaji wa umeme, maendeleo ya viwanda na upanuzi wa matumizi
yake katika usafiri na majumbani.
Akizungumza baada ya
kukagua maendeleo ya mradi huo unaogharimu takribani Sh bilioni 119 za fedha za
ndani, Makamu wa Rais ameipongeza Wizara ya Nishati na timu ya utekelezaji Shirika
la Maendeleo ya Petroli nchini (TPDC) kwa hatua iliyofikiwa, huku
akieleza umuhimu wa uwekezaji huo katika kupanua upatikanaji wa nishati kwa
shughuli za kiuchumi na kijamii.
Amesema kuunganishwa
kwa kisima cha gesi cha Ntorya na Kituo cha Kuchakata Gesi cha Madimba
kutaongeza uwezo wa kusambaza gesi kwa matumizi mbalimbali nchini, yakiwemo
kuzalisha umeme na kuendesha viwanda.
Pia, Makamu wa Rais
amesema mradi huo utapanua fursa za matumizi ya gesi katika usafiri na kupikia
na hivyo kutekeleza kwa Vitendo agenda ya Rais Dkt. Samia Suluhu Hassan ya
matumizi ya nishati safi kupikia.
Ziara hiyo imeweka
mbele ajenda ya Serikali ya kutumia rasilimali za ndani kuimarisha uchumi, huku
ikiibua matarajio ya wananchi kuhusu namna uwekezaji katika gesi
utakavyoendelea kuboresha huduma na kuongeza fursa katika maeneo yao.
Kwa mujibu wa taarifa
iliyotolewa na Mkurugenzi Mkuu wa TPDC CPA Mussa Mohammed Makame wakati wa
ukaguzi wa shughuli ya ulazaji wa bomba la Ntorya–Madimba amesema zoezi
limekamilika kwa asilimia 78 , huku kazi za uunganishaji wa mwisho na
miundombinu mingine ya mradi zikiendelea. Matarajio mradi huo utakamilika
Februari 2027.
Kisima cha Ntorya
kilichimbwa mwaka 2012. Kuunganishwa kwake na Madimba sasa kunasogeza mbele
hatua ya kutumia rasilimali hiyo kukidhi mahitaji ya nishati na kuongeza
mchango wake katika maendeleo ya taifa.
Katika ziara hiyo,
Mbunge wa Mtwara Vijijini, Arif Suleiman Premji, amesema wananchi wameanza
kuona baadhi ya manufaa ya uwekezaji katika sekta hiyo kupitia miradi ya huduma
za jamii.
Ametaja takribani Sh
bilioni 4.7 zilizotolewa kusaidia utekelezaji wa miradi mbalimbali, ikiwemo
vituo vya afya na miundombinu ya elimu, hatua inayochangia kuimarisha huduma
kwa wananchi.
Mradi wa Ntorya–Madimba
ni sehemu ya juhudi za Serikali, kupitia Wizara ya Nishati na Shirika la
Maendeleo ya Petroli Tanzania (TPDC), kwa kushirikiana na wawekezaji,
kuendeleza utafutaji, uzalishaji na usafirishaji wa gesi asilia nchini.
Mikoa ya Lindi na
Mtwara ina nafasi muhimu katika utekelezaji wa ajenda hiyo kutokana na
rasilimali zilizogunduliwa na maeneo yanayoendelea kufanyiwa utafiti.
Kwa mujibu wa taarifa
ya miradi hiyo, hadi Agosti 2026 Tanzania ilikuwa imegundua gesi asilia yenye
jumla ya futi za ujazo trilioni 57.54, huku sehemu kubwa ikiwa katika kina
kirefu cha Bahari ya Hindi, nje ya Pwani ya Mikoa hiyo.
Shughuli zinazoendelea
zinajumuisha uzalishaji wa gesi katika maeneo ya Mnazi Bay na Songo Songo, uendelezaji
wa gesi ya Ntorya na ujenzi wa bomba la Ntorya–Madimba. Aidha, majadiliano
yanaendelea kuhusu mradi wa kuchakata na kusindika gesi asilia kuwa kimiminika
(LNG), unaotarajiwa kutekelezwa Likong’o, mkoani Lindi.
Sambamba na uwekezaji
huo, usambazaji wa gesi kwa matumizi ya kupikia unaendelea kupanuliwa katika
mikoa ya Lindi na Mtwara, ikiwa ni sehemu ya kuwafikishia wananchi manufaa ya
rasilimali hiyo.
Ukaguzi wa Makamu wa
Rais katika mradi wa Ntorya–Madimba umeweka uzito katika nafasi ya gesi asilia
kuchangia maendeleo ya Taifa, huku mahitaji yaliyowasilishwa na wananchi
yakibainisha matarajio yao ya kuona uwekezaji huo ukipanua huduma bora na fursa
za kiuchumi.
Post a Comment