Filamu ya A Land Apart ya Nigeria Kuzindua Tamasha la ZIFF Goes Mainland 2026

 

Tamasha la Kimataifa la Filamu la Zanzibar, ZIFF, kwa kushirikiana na Umoja wa Ulaya EU pamoja na nchi wanachama wake 10 limezindua rasmi tamasha linalotembea la ZIFF Goes Mainland EU MS Film Festival 2026.

 Uzinduzi huo umefanyika leo Oktoba 19 2026 kupitia mkutano na wanahabari uliowakutanisha viongozi wa ZIFF na Mabalozi pamoja na Wakuu wa Utumishi wa nchi washiriki katika kituo cha Alliance Française jijini Dar es Salaam.

 Viongozi na wawakilishi walioshiriki katika uzinduzi huo ni pamoja na Balozi wa Umoja wa Ulaya Jean Marc Pisani Afisa Mtendaji Mkuu wa ZIFF Alban Mwale Balozi wa Denmark Jesper Kammersgaard; Balozi wa Ujerumani, Annett Günther; Balozi wa Italia, Joe Coppola;Mwambata wa utamaduni wa ubalozi wa Ufaransa Ufaransa, Marie Escudier; Naibu ubalozi wa Finland, Rosa Kotoaro; Naibu Ubalozi wa Hispania, Alba Espino Gómez; Kansela Ubalozi wa Sweden, Lars Halvardsson; Mkuu wa Diplomasia ya Umma wa Ireland Danai Lazaris pamoja na Afisa Uhusiano na Habari wa Poland, Magdalena Sękara Kitundu.

Onyesho rasmi la ufunguzi wa tamasha hilo litafanyika kesho Oktoba 20 saa 12 na nusu jioni katika ukumbi wa Alliance Française jijini Dar es Salaam kwa kuonyeshwa bure kwa filamu ya sayansi kutoka Nigeria inayojulikana kama A Land Apart iliyonyakua Tuzo ya Dhahabu katika tamasha la ZIFF 2026.

 Kazi hiyo inachanganya teknolojia ya Akili Unde AI na maisha halisi ya Waafrika.

 Balozi Pisani na Alban Mwale wamebainisha kuwa msimu huu wa tano unaoongozwa na kaulimbiu Kuunganisha Mifumo Kutoka Mipaka ya Kidijitali hadi ya Kibinadamu unalenga kuleta burudani ya kiwango cha juu huku ukifungua milango ya majadiliano ya kiutamaduni kimazingira na mabadiliko ya tabianchi kwa vijana kupitia filamu na usimulizi wa hadithi

Baada ya ufunguzi jijini Dar es Salaam msafara huo wa wiki sita utazunguka katika vyuo vikuu na vituo vya sanaa kwenye mikoa mitano ya Tanzania Bara kuanzia Oktoba 20 hadi Desemba 2 2026.

 Mkoani Pwani msafara utafika TASUBA Bagamoyo Oktoba 27 na filamu ya Techplomacy kutoka Denmark, Mkoani Mwanza maonyesho yatafanyika Chuo Kikuu cha Mtakatifu Augustine SAUT Oktoba 29 na 30 yakionyesha filamu za Finding Connection kutoka Ujerumani, Prout iliyoratibiwa na programu ya EU SASA Green and Smart Cities pamoja na Fantastic Machine; Novemba 16 maonyesho yatarejea Dar es Salaam katika Chuo Kikuu cha Kampala na filamu ya Omen kutoka Ubelgiji yakifuatiwa na kituo cha Ajabu Ajabu Novemba 17 na filamu ya Coconut Head Generation kutoka Ufaransa; Chuo Kikuu cha Dar es Salaam UDSM kitakuwa mwenyeji Novemba 18 na 19 na filamu za Fantastic Machine kutoka Sweden na Róise na Frank kutoka Ireland huku Chuo cha Uandishi wa Habari DSJ kikipokea filamu ya Je vida kutoka Finland Novemba 25

Mshindo wa tamasha hilo utagonga pia mkoani Iringa katika Chuo Kikuu cha Ruaha Novemba 23 kupitia filamu ya Benvenuti in campagna Green Family kutoka Italia inayohusu mazingira kabla ya kuhitimisha safari yake mkoani Dodoma katika Chuo Kikuu cha UDOM Desemba mosi na mbili kwa maonyesho ya filamu za The Last Spark of Hope kutoka Poland na La Caja 507 kutoka Hispania.

 Baada ya kila onyesho mashabiki na wanafunzi watapata fursa ya kushiriki majadiliano ya ana kwa ana na kupata elimu kuhusu fursa za ufadhili wa masomo barani Ulaya kupitia programu ya Erasmus Plus huku Balozi Pisani akisisitiza kuwa tasnia ya filamu ina uwezo wa kutengeneza ajira kwa vijana katika uzalishaji ufundi na ujasiriamali wa kidijitali.