DC MPOGOLO: VIJANA WATUMIE FURSA ZA MIKOPO YA ASILIMIA 10 KUJIINUA KIUCHUMI

Mkuu wa Wilaya ya Ilala, Mhe. Edward Jonas Mpogolo, amewahimiza vijana kutumia fursa za mikopo ya asilimia 10 inayotolewa na Halmashauri pamoja na fursa nyingine za kiuchumi zilizopo ili kujikwamua kiuchumi na kuboresha maisha yao. 

Wito huo umetolewa wakati wa mkusanyiko wa michezo ya Jogging uliohusisha viongozi na wanachama wa vilabu mbalimbali pamoja na washiriki waliosafiri kutoka mikoa tofauti nchini, ambapo Mkurugenzi wa Jiji la Dar es Salaam, Ndugu Elihuruma Mabelya, pia amesisitiza umuhimu wa vijana kujitokeza kwenye kliniki za mafunzo ya mikopo, akieleza kuwa zaidi ya Shilingi bilioni 20 zinapatikana kwa ajili ya mikopo hiyo.

Akizungumza katika tukio hilo, Mhe. Mpogolo amesema mikusanyiko ya michezo ni fursa muhimu ya kuimarisha umoja, mshikamano, upendo na mahusiano mema miongoni mwa wananchi, huku ikitumika pia kuhamasisha vijana kuhusu fursa za maendeleo na namna ya kujikwamua kiuchumi.

Amesema vijana wanapaswa kutumia fursa zinazotolewa na Serikali na Halmashauri kwa kushirikiana na viongozi wao, wakiwemo viongozi wa vilabu vya michezo, ili kutambua fursa zilizopo na kuzitumia kuboresha maisha yao. Aidha, amewataka viongozi wa vilabu kuingiza ajenda za uwezeshaji kiuchumi katika vikao vyao na kushirikiana na uongozi wa Wilaya na Halmashauri kutafuta njia za kuimarisha uchumi wa vilabu na wanachama wake.

Kwa upande wake, Mkurugenzi wa Jiji la Dar es Salaam, Ndugu Elihuruma Mabelya, amewahimiza vijana kujitokeza kwa wingi kwenye kliniki za mafunzo kuhusu mikopo ya asilimia 10 ili kupata elimu ya taratibu za kusajili vikundi, kuandaa maombi na kutimiza vigezo vinavyohitajika ili kunufaika na mikopo hiyo.

Mabelya amesema zaidi ya Shilingi bilioni 20 zinapatikana kwa ajili ya mikopo hiyo, akisisitiza kuwa vijana wanapaswa kutumia fursa hiyo kwa kuzingatia taratibu zilizowekwa. Amesema kliniki hizo zinalenga kutoa elimu na kutatua changamoto ambazo zimekuwa zikijitokeza kwa waombaji wakati wa kusajili vikundi na kuomba mikopo.

Aidha, ameeleza kuwa mafunzo hayo ni sehemu ya jitihada za kuboresha uratibu wa upatikanaji wa mikopo na kuhakikisha vijana wanaelewa hatua zinazopaswa kufuatwa ili kuwasilisha maombi yao kwa usahihi. Amewataka vijana kuchangamkia mafunzo hayo na kutumia maarifa watakayopata kuandaa maombi yanayokidhi masharti yaliyowekwa.

Mhe. Mpogolo ameongeza kuwa michezo si njia ya kuimarisha afya pekee, bali pia ni nyenzo ya kuwaunganisha vijana, kujenga mahusiano mema na kutoa fursa ya kujadili masuala yanayohusu maendeleo yao. Amesema ni muhimu viongozi wa vilabu kushirikiana na taasisi za umma na wadau wengine ili kutafuta fursa zitakazosaidia vijana kujiajiri na kuimarisha shughuli zao za kiuchumi.

Ameeleza kuwa juhudi za kuwawezesha vijana kiuchumi zinaendana na malengo ya maendeleo ya Taifa, yakiwemo yale yanayolenga kujenga uchumi jumuishi na kupanua fursa kwa wananchi. Hivyo, amewahimiza vijana kuwa wabunifu, kutumia maarifa na kushiriki katika shughuli halali za kiuchumi zitakazochangia maendeleo yao na ya jamii kwa ujumla.

Akizungumzia umuhimu wa amani na utulivu, Mhe. Mpogolo amesema vijana wana wajibu wa kulinda amani ya nchi, mkoa na Wilaya ya Ilala, akibainisha kuwa amani ni msingi muhimu wa maendeleo na utekelezaji wa mipango ya kiuchumi na kijamii. Amewataka vijana kuendelea kuwa mabalozi wa amani na mshikamano katika maeneo yao na katika shughuli mbalimbali wanazoshiriki.

Viongozi hao wamewahimiza vijana kuendelea kushiriki katika michezo, kujitokeza kwenye kliniki za mafunzo ya mikopo na kutumia fursa zilizopo kwa manufaa yao na jamii kwa ujumla, huku wakidumisha umoja, mshikamano, upendo na amani. Wamesisitiza umuhimu wa ushirikiano kati ya vijana, viongozi wa vilabu, Wilaya na Halmashauri ili fursa za uwezeshaji kiuchumi ziweze kutumika kwa tija na kuchangia maendeleo endelevu.