MWAMALANGA AHIMIZA VIJANA KUWA MABALOZI WA AMANI NCHINI

Mwenyekiti wa Kamati ya Maadili, Amani na Haki za Binadamu kwa Jamii ya Madhehebu ya Dini Tanzania, Askofu William Mwamalanga, ametoa wito kwa Watanzania kushiriki kikamilifu katika kulinda na kudumisha amani ya nchi, akisisitiza kuwa amani ni nguzo muhimu ya maendeleo na hitaji la msingi kwa kila mwananchi bila kujali tofauti zote za kisiasa, kijamii na kidini.

Akizungumza kuhusu utulivu huo wa nchi, Askofu Mwamalanga alieleza kuwa viongozi wa dini kwa kushirikiana na wadau mbalimbali wanaendelea kutekeleza kampeni mahususi za kuhamasisha vijana kuwa mabalozi wa amani katika maeneo yao ili kuhakikisha Tanzania inaendelea kuwa kisiwa cha utulivu, mshikamano na ustawi. 

Juhudi hizi ni sehemu ya dhamira ya muda mrefu ya viongozi wa dini katika kuimarisha maadili mema na umoja wa kitaifa, ambao umeifanya nchi kuwa mfano wa kuigwa katika ukanda wa Afrika Mashariki na bara zima kwa ujumla.

Katika kuwasilisha ushauri wao kwa Naibu Waziri wa Mambo ya Ndani ya Nchi, Patrobas Katambi, Askofu Mwamalanga alibainisha kuwa kila Mtanzania anapaswa kuwajibika kutunza utulivu uliopo, na ndio maana wamejikita kwenye kampeni hiyo inayolenga vijana kwani amani ni hitaji la kila mtu. 

Aliongeza kuwa maendeleo ya kijamii, kisiasa na kiuchumi hayawezi kupatikana bila kuwepo kwa utulivu, na kuwataka vijana kutumia nguvu, ubunifu na uwezo wao katika shughuli za kimaendeleo badala ya kujiingiza kwenye vitendo vinavyoweza kuhatarisha mshikamano wa taifa.

Huku akiahidi kuwa viongozi wa dini wataendelea kushirikiana na Serikali na wadau mbalimbali kuelimisha jamii kuhusu umuhimu wa kuheshimu sheria, maadili na haki za wengine, Askofu Mwamalanga alisisitiza kuwa jukumu la kulinda amani si la vyombo vya dola pekee bali ni wajibu wa kila mtu kupitia maneno na matendo yanayojenga upendo na ushirikiano. Alihitimisha kwa kukumbusha kuwa Tanzania imekuwa salama kwa miaka mingi kutokana na misingi imara iliyowekwa na waasisi wa taifa pamoja na utamaduni wa kuvumiliana, hazina ambayo inapaswa kulindwa kwa nguvu zote kwa manufaa ya vizazi vya sasa na vijavyo.