VIONGOZI WAKIWEMO WA KIDINI WATOA ONYO KWA 'MAMLUKI' WANAOCHAFUA TASWIRA YA TANZANIA

Wakati Tanzania ikiendelea kupiga hatua za kimaendeleo, viongozi wa kidini, kiserikali na wa kijamii wametoa wito mzito kwa Watanzania kutokubali "kuchuuzwa" na watu wachache waliopewa maslahi madogo (kitu kidogo) kwa ajili ya kuchafua taswira ya nchi na kuleta majanga.

Kauli hizo zimekuja kama kinga ya kifikra dhidi ya harakati zinazolenga kubomoa misingi ya amani, utulivu, na umoja ambayo imekuwa utambulisho wa Taifa kwa miongo mingi.

Misingi ya Imani na Amani

Askofu Dkt. George Pindua wa Kanisa la Kiinjili la Kilutheri Tanzania (KKKT), Dayosisi ya Morogoro, amekumbusha kuwa Tanzania ni familia moja na hakuna nafasi ya chuki.

“Taifa letu limejengwa juu ya misingi imara ya amani, utulivu, umoja na mshikamano. Tunaishi pamoja kama familia moja ya Kitanzania, hivyo kama taifa tupambane na chochote kinachotishia misingi yetu,” alisisitiza Askofu Pindua.

Wajibu wa Maadili na Serikali

Kwa upande wake, Naibu Waziri wa Mambo ya Ndani ya Nchi, Mhe. Dennis Londo, amewataka wananchi kuishi kwa kuzingatia maadili ya imani zao, akibainisha kuwa kulinda amani ni wajibu wa kila mmoja kwani binadamu wote wameumbwa kwa mfano wa Mungu. Amesema kuwa jamii inapaswa kuwa macho dhidi ya mienendo inayokiuka upendo na utulivu wa nchi.

Vijana na Uzalendo

Mwenyekiti wa Shirika la Kukuza Mila na Desturi Mkoa wa Morogoro (SHIWAMILA), Ramadhan Divunyagale, amewasihi vijana kutoyumbishwa na badala yake waendelee kumwombea Rais Samia Suluhu Hassan na serikali yake ili waendelee kuiongoza nchi katika njia ya maendeleo.

"Nchi yetu ni ya amani. Watanzania wote wakiwemo vijana tuendelee kulienzi taifa letu kwa kudumisha amani na umoja," alisema Divunyagale.

Tahadhari kwa Umma

Ujumbe mkuu wa viongozi hawa ni mmoja: Uzalendo kwanza. Wananchi wameaswa kutokuwa washabiki wa maneno ya kichochezi yanayopikwa na watu wasioitakia mema Tanzania. Ni wajibu wa kila Mtanzania kulinda uongozi uliopo madarakani ambao umechaguliwa na wananchi wenyewe, na kutokubali kutingishwa na "wachache" wanaotafuta umaarufu kwa gharama ya usalama wa nchi.