MTIBWA SUGAR NAYO YAFANYWA KAMA YANGA NA SIMBA TAIFA

SIMBA imepata ushindi wa pili mfululizo kwenye Ligi Kuu ya Soka ya Tanzania Bara baada ya kuifunga timu ya Mtibwa Sugar kwa bao 1-0 kwenye mchezo mkali uliochezwa Uwanja wa Taifa Dar es Salaam leo. 

Kwenye mechi iliyopita Simba iliibuka na ushindi wa bao 1-0 dhidi ya hasimu wake Yanga kwa bao lililofungwa na mshambuliaji wa kimataifa wa Uganda, Emmanuel Okwi, ambae pia alifunga bao la pekee la Simba kwenye mchezo wa leo

Kutokana na matokeo hayo Simba imeendelea kushika nafasi ya tatu kwenye msimamo wa Ligi Kuu ya Soka ya Tanzania Bara ikiwa nyuma kwa pointi moja dhidi ya Mtibwa Sugar inayoshika nafasi ya pili nyuma ya vinara wa ligi Yanga wenye pointi 31.

Kwenye mchezo wa jana Mtibwa Sugar walitangulia kubisha hodi kwenye lango la Simba lakini shuti la mshambuliaji wake Ally Sharif, lakini akiwa peke yake na kipa Ivo Mapunda wa Simba alipiga shuti lililopaa juu ya lango.

Dakika tatu baadae Simba walijibu kwa kufanya shambulizi kali lakini mshambuliaji wake Elias Maguli alishindwa kuunganisha mpira wa krosi wa Simon Sserunkuma.

Emmanuel Okwi  kwenye dakika ya 16 akiwa ndani ya eneo la penalti alipiga shuti lililotoka nje kidogo ya lango la Mibwa na dakika ya 21 Okwi  tena alipokea pasi ya kiungo Saidi ndemla lakini shuti lake halikulenga lango.

Dakika ya 24 Henry Joseph alikaribia kuifungia Mtibwa Sugar lakini kichwa alichopiga akiunganisha krosi ya Mussa Mgosi kilitoka nje la lango la Simba.

Mchezo ulilazimika kusimama dakika ya 36 baada ya Ame Ally kugongana vichwa na kiungo Abdi Banda wa Simba.

Mtibwa Sugar walifanya mashambulizi mfululizo kwenye dakika ya 42 na 44 lakini wachezaji wake Henry Joseph na Mussa Mgosi hawakuwa makini kutumia nafasi walizopata.

Okwi aliyeisumbua sana ngome ya Mtibwa  Sugar alikaribia kufunga bao la kuongoza lakini shuti alilopiga akiwa katikati ya mabeki lilitoka nje kidogo ya lango.

Mgosi,kwenye dakika ya 47 alikosa bao la wazi baada ya kupokea pasi ya Henry Joseph, lakini badala ya kufunga alijikuta akiunawa mpira huo hali iliyolazimu mwamuzi Abdallah Kambuzi kutoka Shinyanga kumuonyesha kadi ya njano.

Simba ilifanya mabadiliko kwa kumtoa Simon Sserunkuma na kumuingiza Ramadhani Singano kwenye dakika ya 55 na kwenye dakika ya 58 Juuko Murshid alikosa bao akishindwa kutumia pasi nzuri ya Okwi.

Mtibwa Sugar walifanya mabadiliko kwa kumtoa Ame Ali na kumuingiza Mohamedi Mkopi kwenye dakika ya  65, mabadiliko ambayo hayakuisaidia sana timu hiyo.

Akiwa amebaki peke yake na kipa Said Mohamedi, Elias Maguli alipiga shuti lililopaa juu ya lango baada ya pasi nzuri ya Okwi kwenye dakika ya 69.

Mtibwa walifanya mabadiliko kwenye dakika ya 75 na dakika ya 86 walifanya mabadiliko mengine kwa kumtoa Mzamili Selembe na kumuingiza Ally Yusuph, lakini mchezo huo ukionekana kumalizika kwa sare ya bila kufungana Emmanuel Okwi aliwainua mashibiki wa Smba kwa kufunga bao kwenye dakika ya 90 kwa shuti kali akiwa nje ya eneo la penalti.