Blogroll

KWA MAWASILIANO ZAIDI TUWASILIANO KUPITIA BARUA PEPE pallangyorachel@yahoo.com AU NIPIGIE KUPITIA NAMBARI 0715187511

Pages

Tuesday, September 19, 2017

TFF YATAKIWA KUSHIRIKIANA NA SERIKALI

 Naibu Waziri wa Habari, Utamaduni, Sanaa na Michezo, Anastazia Wambura Septemba 18, 2017 ametembelea Ofisi za Shirikisho la Mpira wa Miguu Tanzania (TFF) zilizoko Uwanja wa Kumbukumbu ya Karume, Ilala Dar es Salaam.
Wambura ambaye aliongozana na Katibu Mkuu wa Baraza la Michezo Tanzania (BMT), Bw. Mohammed Kiganja alilakiwa na Kaimu Katibu Mkuu wa TFF, Bw. Kidao Wilfred.

Naibu Waziri Anastazia Wambura alifanya mazungumzo na Kidao kwa muda ambako alijifunza mambo mbalimbali ikiwa ni pamoja na kupata ripoti ya utendaji katika mwezi mmoja tangu uongozi mpya wa TFF uingie madarakani.

Baada ya kupata maelezo ya Utendaji kwa Uongozi mpya amepongeza Uongozi mpya kwa kuanza vizuri na ameridhishwa na mipango ya Uongozi mpya katika program za Vijana na Soka la Wanawake.

Pia amepongeza zoezi la Ugawaji wa mipira 100 kwa mikoa yote ya Tanzania na kusema muhimu ni kutumika ilivyokusudiwa. Anaamini mwanzo mzuri wa Rais Wallace Karia ni dalili njema za kuleta maendeleo makubwa katika soka.

Mbali ya kuzungumza na Kaimu Katibu Mkuu, Naibu Waziri Wambura alikuwa shuhuda wa mazoezi ya jioni ya Timu ya Taifa ya vijana wenye umri wa chini ya miaka 17 ‘Serengeti Boys’ kwenye Uwanja wa Karume, Dar es Salaam.

Mara baada ya mazoezi hayo, Naibu Waziri Anastazia alikaribishwa kuzungumza na vijana wa Serengeti Boys, ambako awali kabisa alitaka vijana hao ambao wengi wao wana umri wa chini ya miaka 15 kwa sasa kuwa ni wenye thamani.

“Mtakumbuka kamba Umitashumta mlikuwa wengi, ila mmebaki ninyi. Nataka mjue kuwa Serikali iko hapa na tunafuatilia. Tunataka matunda kutoka kwenu,” alisema Naibu Waziri, huku akiwapa salamu za Waziri wa Habari, Utamaduni, Sanaa na Michezo, Dk. Harrison Mwakyembe.

Akaongeza: “Nawapongeza sana kwa kuonesha mnaweza. Ila fanyeni mazoezi kwa juhudi, chezeni mpira kwa uhodari, ila msisahau kuzingatia pia masoma. msifanye masihara hata kidogo. Mkizingatia masomo na kucheza mpira, mtafanya makubwa zaidi.

“Naamini baada ya kambi hii mtakuwa vizuri. Je, kwenye mashindano yajayo mtashika namba gani?” alihoji Naibu Waziri Wambura kabla ya vijana kwa pamoja kujibu: “Namba moja.”
Shirikisho la Mpira wa Miguu Afrika (CAF), liliiteua Tanzania kuandaa Fainali za Kombe la Mataifa ya Afrika kwa vijana wenye umri wa chini ya miaka 17 mwaka 2019. Tayari Tanzania imeanza kuandaa timu.

TANZANITE YAREJEA KUJIPANGA NA MCHEZO WA MARUDIO DHIDI YA NIGERIA

Timu ya Taifa ya wasichana wenye umri wa chini ya miaka 20 (Tanzanite), imewasili salama nchini ikitokea Nigeria ambako ilicheza mechi ya awali dhidi ya wenyeji Nigeria katika mchezo wa kuwania kucheza Fainali za Kombe la Dunia 2018 huko Ufaransa.
 Timu hiyo iliwasili saa 9.00 usiku wa kuamkia leo na kulakiwa na Kaimu Katibu Mkuu wa Shirikisho la Mpira wa Miguu Tanzania (TFF), Kidao Wilfred, Kaimu Mkurugenzi wa Mashindano, Jonas Kiwia na Ofisa Habari wa TFF,  Alfred Lucas.

Mara baada ya kurejea, Kocha Mkuu wa timu hiyo, Sebastian Nkoma, amesema walipoteza mchezo wa awali kwa kufungwa mabao 3-0 kwa sababu Nigeria ni timu bora na Tanzanite kwa sasa wanajipanga kwa ajili ya mchezo wa marudiano.

“Kwa kuwa tulionesha kiwango bora, ni matumaini yangu kwamba tutafanya vema kwenye mchezo wa marudiano hapa nyumbani na tutasonga mbele,” amesema Nkoma ambaye ndoto zake ni kuipeleka Tanzanite Ufaransa mwakani.

Mchezo wa marudiano utafanyika Oktoba mosi, mwaka huu kwenye Uwanja wa Azam, ulioko Chamazi, Dar es Salaam.

Wakati timu ikionekana ina ari ya kufanya vema kwenye mchezo wa marudiano, Kaimu Katibu Mkuu, Bw. Kidao Wilfred aliwapa shime kufanya vema kwenye mchezo wa kirafiki na kusisitiza kambi kuendelea mpaka mchezo wa maruadiano.

Mkuu wa Msafara, Bi. Amina Karuma, alisema kuwa mapambano bado yanaendelea na anaamini kikosi chake kitashinda katika mechi ya marudiano itakayochezwa baada ya wiki mbili. Karuma pia ni Mwenyekiti wa Chama cha Mpira wa Miguu cha Wanawake Tanzania (TWFA).

Aliongeza kuwa anashikuru wachezaji wote ni wazima na wataendelea na kambi ili kujiandaa na mchezo wa marudiano huku akiahidi kuwatafutia mechi ya kirafiki kabla ya kuwakaribisha Nigeria.

LIGI DARAJA LA PILI KUANZA SEPTEMBA 30



LIGI Daraja la Pili Tanzania Bara (SDL), inatarajiwa kuanza kutimua vumbi Septemba 30, mwaka huu kwa timu kuchuana katika viwanja vitano tofauti.
Akizungumza na wandishi wa habari jana, Ofisa Habari wa Shrikisho la Soka Tanzania (TFF) Alfred Lucas alisema michezo itakayochezwa siku hiyo Kundi A ni kati ya Abajalo na Cosmopolitan, Namungo na Reha kundi B kutakuwa na mchezo kati ya Pepsi na Madini.
Kundi C kutakuwa na mchezo kati ya Burkinafaso na Ihefu, Boma itacheza na Mkamba Rangers huku Kundi D likikutanisha timu za Bulyanhulu na Mirambo.
Mchezo kati ya Nyanza FC na Area C uliokuwa ufanyike Septemba 30, 2017 kwenye Uwanja wa Sheikh Amri Abeid Arusha, sasa utachezwa Oktoba 01, 2017 siku ya Jumapili kwenye Uwanja huo huo.
Lucas alisema sababu za mabadiliko haya yanatokana na kuwepo kwa mchezo kati ya Pepsi FC vs Madini FC ambao utachezwa Septemba 30 katika uwanja huo.
Awali mchezo wa Nyanza na Area C ulipangwa kufanyika mkoani Manyara, lakini kutokana na hali ya uwanja ilibidi Bodi ya ligi ufanye mabadiliko husika.


Sunday, September 17, 2017

ROMA NA STAMINA WALIVYOPAGAWISHA TAMASHA LA TIGO FIESTA MUSOMA, MARA

Wasanii wa muziki wa kizazi kipya Roma Mkatoliki na Stamina(Rostam) wakitumbuiza kwenye uwanja wa Karume mjini Musoma Mkoa wa Mara,kwenye tamsha la Tigo Fiesta usiku wa kuamkia jana.






Meneja wa Kampuni ya mtandao wa simu za mkononi Tigo kanda ya Ziwa Edgar Mapande,akizungumza na waandishi wa habari, kwenye uwanja wa Karume mjini Musoma Mkoa wa Mara,kwenye uzinduzi wa tamsha la Tigo Fiesta usiku wa kuamkia jana .

Fareed Kubanda "Fid Q akitumbuiza katika jukwaa la Tigo Fiesta katika uwanja wa Karume mkoani Mara.

KITABU CHA MAPENZI KABURINI KUZINDULIWA ARUSHA



Tupokigwe Abnery Mwampondele amezaliwa Seronera - Serengeti mkoani Mara. Alisomea shahada ya Isimu ya lugha ya Kiswahili Chuo Kikuu cha Dodoma (UDOM). Kwa sasa ni mwalimu wa somo la Kiswahili katika shule ya Sekondari ya Wasichana Precious blood iliyopo mkoani Arusha-Tanzania. Nje na kazi ya ualimu Tupokigwe Abnery ni mtunzi wa vitabu vya hadithi, mbunifu wa mavazi ya kiasili, mjasiriamali na mwandishi wa gazeti tando (blogger) inayoitwa Sinyati Blog.

Tupokigwe Abnery alikuwa na kawaida ya kupenda kujibembeleza au kujifariji akiwa anatembea kwa kutengeneza hadithi katika fikra zake ili kuweza kulala au kufika anakoelekea bila kuchoka ndipo siku moja baada ya kushiriki shindano la uandishi wa Riwaya fupi kwa wanafunzi wa shule ya msingi, sekondari na vyuo vikuu Tanzania kwa ajili ya Tuzo ya mama Salma Kikwete iliyoandaliwa na TASAKI (Tamasha la Sauti ya Kiswahili) aliibuka mshindi wa pili wa riwaya fupi kwa wanafunzi wa vyuo vikuu Tanzania.

Hivyo hiki kitabu ni muendelezo wa Riwaya aliyopatia Tuzo. Soma kitabu hiki uweze kujionea ubunifu wa hali ya juu wa fani pamoja na mshikamano wa maudhui uliyopo ndani ya kitabu hiki.

Mapenzi Kaburini ni kitabu chenye mtazamo yakinifu, ni kitabu ambacho maudhui yake yamezitazama nchi za Afrika Mashariki na changamoto zilizopo katika nchi kwa upande wa viongozi pamoja na wananchi.Kimebeba maudhui yanayowalenga wananchi wote bila kujali utabaka.Kwa upande wa fani kimetumia majina ya halisi na kubuni hasa kwa upande wa maeneo ya miji mfano kuna miji kama Kinyonga,kupe,chatu ambayo ni majina yaliyopo katika nchi ya Simba.Nchi hii ya Simba ni nchi inayosimamia nchi zilizopo Afrika Mashariki.

OKWI APIGA MBILI SIMBA IKIIFUNGA MWADUI FC 3-0

SeeBait
EMMANUEL Okwi ameendelea kuonyesha kuwa ni moto wa kuotea mbali baada ya kuifungia Simba mabao mawili ‘wakiifukia’ migodi ya Mwadui FC kwa kuitandika mabao 3-0 katika mchezo wa ligi kuu uliofanyika kwenye uwanja wa Uhuru jijini Dar es Salaam.
Mabao hayo yanamfanya raia huyo wa Uganda kufikisha mabao sita baada ya kucheza mechi mbili na kuwa kinara wa ufungaji katika msimamo hadi sasa.
Okwi alifunga mabao hayo katika kila kipindi ambapo la kwanza alifunga dakika ya saba wakati la pili akifunga dakika ya 57 kwa shuti kali la mguu wa kushoto lililomshinda mlinda mlango Arnold Masawe.
Simba waliendelea kuliandama lango la Mwadui ambapo dakika ya 26 walifanya shambulizi kali na shuti la Shiza Kichuya likigonga mwamba na kutoka nje.
Emmanuel Okwi (kulia) akishangilia bao na John Bocco ‘Adebayor’
Mshambuliaji John Bocco ‘Adebayor’ alimalizia karamu ya mabao kwa Simba kufuatia kufunga la tatu dakika ya 62 kwa kuwahadaa mabeki wa Mwadui na kupiga mpira kwa mtindo wa ‘kuchop’ na kumuacha mlinda mlango Masawe akiwa hana la kufanya.
Kocha wa Simba Joseph Omog aliwapumzisha Nicholas Gyan, Mzamiru Yassin na Kichuya na kuwaingiza Mwinyi Kazimoto, Laudit Mavugo na Jonas Mkude huku Mwadui ikimuingiza Awesu Ally kuchukua nafasi ya Hassan Kabunda.
Matokeo hayo yanaifanya Simba kupanda hadi nafasi ya pili kwenye msimamo wa ligi baada ya kufikisha pointi saba katika mechi tatu walizoshuka dimbani.
Katika mchezo mwingine wa ligi kuu leo Mbeya City wamefanikiwa kupata ushindi wa pili baada ya kuitungua Njombe Mji bao 1-0 likiwekwa nyavuni na Eliud Ambokile.
 Kwa hisani ya Boiplus blog

Saturday, September 16, 2017

SIMBA UWANJANI KESHO KUCHEZA NA MBAO FC




WEKUNDU wa Msimbazi Simba wanashuka dimbani kesho kuwakabili Mwadui FC katika mchezo wa Ligi Kuu Tanzania Bara kwenye Uwanja wa Uhuru, Dar es Salaam.
Mchezo huo una umuhimu kwa kila timu kushinda pointi tatu ili kujiweka kwenye nafasi nzuri zaidi.
Simba imeonekana kuwa mbabe wa Mwadui hasa msimu uliopita baada ya kushinda michezo miwili, wa kwanza 2-1 kwenye uwanja wa Taifa na mwingine ulichezwa Kambarage Shinyanga na kushinda 3-0.
Timu hiyo ina pointi nne katika michezo miwili iliyocheza hivi karibuni ikishinda 7-0 dhidi ya Ruvu Shooting na kupata sare ya bila kufungana 0-0 dhidi ya Azam FC.
Mwadui ilishinda mchezo mmoja mabao 2-1 dhidi ya Singida United na kufungwa na Mtibwa Sugar 1-0 hivyo, ina pointi tatu.
Simba huenda ikamkosa mchezaji wake muhimu Haruna Niyonzima anayesumbuliwa na majeraha. Lakini ina furaha juu ya uwepo wa mshambuliaji wake hatari Emmanuel Okwi ambaye hakucheza mchezo uliopita kutokana na majukumu ya timu ya taifa.
Mbali na Okwi kuna Nicholaus Gyan ambaye anatabiriwa iwapo atacheza sambamba na Okwi basi wapinzani watapata wakati mgumu kuwadhibiti.
Simba inajivunia uwepo wa kipa wake mwenye kiwango kizuri Aishi Manula. Pia, mabeki iliyonayo Erasto Nyoni, Salim Mbonde, Method Mwanjali  huenda wapinzani wakapata wakati mgumu kupenya kirahisi.
Mchezo mwingine utakaochezwa leo ni Mbeya City dhidi ya Njombe Mji utakaochezwa kwenye uwanja wa Sokoine jijini Mbeya.
Njombe imetoka kupoteza michezo miwili kwenye uwanja wake wa nyumbani ikichapwa mabao 2-0 dhidi ya Prisons na 1-0 dhidi ya Yanga.
Mbeya City imeshinda mchezo mmoja dhidi ya Majimaji 1-0 na kufungwa mchezo mwingine dhidi ya Ndanda FC bao 1-0. Timu zote hizo kila moja inahitaji ushindi kujiweka kwenye nafasi nzuri.