Blogroll

KWA MAWASILIANO ZAIDI TUWASILIANO KUPITIA BARUA PEPE pallangyorachel@yahoo.com AU NIPIGIE KUPITIA NAMBARI 0715187511

Pages

Sunday, April 22, 2018

MTIBWA YAFUNGUKA KUSHIRIKI MASHINDANO YA KIMATAIFA


Na Rahel Pallangyo
HATIMAYE uongozi wa Mtibwa Sugar umefunguka na kudai itashiriki michuano ya Afrika mwakani endapo itafuzu, kwa sababu adhabu yao walishaimalizika
Awali kulikuwepo na minong’ono kuwa Mtibwa Sugar haiwezi kushiriki mashindano ya Afrika kwa sababu walifungiwa na Shirikisho la Soka Barani hivyo haitashiriki michuano ya Afrika hata ikifuzu. 
Katibu Msaidizi wa timu hiyo, Abubakar Swabur alisema hizo propaganda wamezisikia na kudai ni za uoongo kwani walifungiwa mwaka 2004 na kwa maana hiyo walimaliza adhabu 2007 kwani walifungiwa miaka mitatu.
 “Kumekuwepo na propaganda kuwa Mtibwa Sugar haitashiriki mashindano ya kimataifa inayoratibiwa na Shirikisho la soka Afrika (CAF), kitu ambacho ni uongo za inabidi upuuzwe kwani hauna ukweli wowote. Ni kweli Mtibwa Sugar ilifungiwa miaka mitatu na kupigwa faini ya fedha mwaka 2004,” alisema Abubakar 
Abubalar alisema inasemekana Mtibwa Sugar haiwezi kushiriki kutokana kwa sababu adhabu unaanza kuitumikia iwapo klabu itafuzu michuano hiyo na Mtibwa Sugar haijawahi kufuzu michuano hiyo tangu ifungiwe na kudai siyo kweli yanalenga kuwatoa katika njia ya ubingwa kwani kauli mbiu yao inasema "Heshima ya 1999-2000  irejee".
 Pia alisema timu yeyote ikifungiwa kutokana na michuano inayoratibiwa na CAF inaanza kutumikia adhabu hiyo baada ya kupokea taarifa hiyo na haisubiri hadi ikifuzu kwa maana nyingine adhabu hiyo siyo lazima ufuzu ndiyo uitumikie.
“Kwa wanasheria kuna kitu kinaitwa rejea katika kuamua kesi zenye mazingira yanayofanana na suala la Mtibwa Sugar naomba nije na na rejea ya kesi zinazofanana na hukumu iliyotolewa na CAF kwa Mtibwa Sugar, Highlanders ya Zimbabwe ilifungiwa na CAF miaka mitatu  kwa kushindwa kusafiri kucheza na Nchanga Rangers ya Zambia na adhabu hiyo walianza kuitumikia mwaka 2012 na baada ya miaka miwili Highlanders kupitia ZIFA (Shirikisho la Soka Zimbabwe) wakaomba kupewa msamaha, CAF waliwajibu adhabu inaisha mwaka 2015, wavumilie,” alisema Abubakari.
Pia Mwaka 2012, Abeid Pele na timu yake ya Nania FC ya Ghana walifungiwa miaka mitatu na kupigwa faini ya dola za Kimarekanio 1,500 na CAF walionyesha adhabu hiyo inaisha mwaka 2016, hivyo CAF walikuwa wanajua hawa jamaa watafuzu mara zote, au? 
Keizer Chiefs ya Afrika Kusini nayo mwaka 2004 ilifungiwa miaka mitatu na kupigwa faini ya dola 1,500 kwa kushindwa kusafiri kwenda kucheza mchezo wa marudiano na Esperance ya Tunisia baada ya kufungwa mchezo wa kwanza nyumbani. Na wakati adhabu yao inaisha walikuwa nafasi ya 11 katika msimamo wa Ligi Kuu Afrika Kusini, ambayo haiwapi fursa ya kushiriki michuano hiyo ya kimataifa na adhabu yao ilimalizika wakiwa hawapo kwenye nafasi ya kushiriki michuano ya kimataifa.
Abubakar alisema Mtibwa Sugar wanajipanga kwa mchezo wa fainali ya Kombe la Shirikisho maarufu kama Azam Sports Federation Cup (ASFC) unaotarajiwa kuchezwa Juni 2, Uwanja wa Sheikh Amri Abeid Arusha kwani wakishinda watapata tiketi ya kucheza michuano ya Kombe la Shirikisho Afrika mwakani.

KIGWANGALA ATUMIA NGORONGORO MARATHON KUTUMA SALAMU KWA MAJANGILI

 Waziri wa Maliasili na Utalii Dkt. Hamis Kigwangala (fulana nyekundu) akiwa na uongozi wa Mamlaka ya Hifadhi ya Ngorongoro (NCAA) pamoja na baadhi ya washiriki wa mbio za Ngorongoro Marathon zilizofanyika leo Aprili 21, 2018. Wengine ni Mwenyekiti wa Bodi ya NCAA Profesa Abiud Kaswamila (namba 002), Mhifadhi Mkuu wa NCAA Dkt. Fred Manongi (namba 003) na Meneja Mahusiano wa NCAA Joyce Mgaya (kulia waliosimama). (Picha na Yusuph Mussa Immamatukio Blog).

Na Yusuph Mussa, Karatu
WAZIRI wa Maliasili na Utalii Dkt. Hamis Kigwangala ametuma salamu kwa majangilli wanaojihusisha na uwindaji haramu wa wanyama kwenye Hifadhi za Taifa ikiwemo Mamlaka ya Hifadhi ya Ngorongoro (NCAA).

Alisema Serikali na wadau wengine wamejipanga kuhakikisha rasilimali za nchi zinalindwa kwa kudhibiti ujangili wa wanyama na viumbe hai vyote vinavyotokana na maliasili yetu ya asili kwenye hifadhi za Taifa.

NGORONGORO HEROES NA SERENGETI BOYS KARATA MUHIMU LEO


TIMU za Taifa za Soka za Vijana, zilizochini ya umri wa miaka 17, Serengeti Boys na U-20, Ngorongoro Heroes leo zinatarajiwa kushuka viwanjani kucheza michezo ya kimataifa.
Ngorongoro heroes itakuwa nchini DR Congo kwenye mchezo wa marudiano wa kutafuta kufuzu fainali za Afrika baada ya mchezo wa awali kutoka suluhu kwenye Uwanja wa Taifa, Dar es Salaam.
Kocha wa Ngorongoro Heroes’ Ammy Ninje  wamejiandaa vema kwa mchezo huo na wachezai wameahidi kucheza kufa ama kupona ili waweze kusonga mbele
"DRC ni timu ya kawaida kwani kama ni bora kuliko Ngorongoro wangepata ushindi katika mchezo wa kwanza uliochezwa katika uwanja wa Taifa Dar es Salaam, hivyo wasubiri kipigo katika mchezo  wa kesho (leo) ," alisema Ninje. 
Mamlaka ya hifadhi ya Ngorongoro ndio imegharamia usafiri  kwa timu ya Ngorongoro ambayo iliondoka ikiwa na wachezaji 21 na benchi la ufundi ni watu saba
Nayo timu ya Vijana waliochini ya miaka 17, Serengeti boys inatarajia kucheza mchezo wake wa mwisho wa mashindano ya Cecafa katika hatua ya makundi  dhidi ya Sudan katika mkoa wa Gitega kuanzia saa 9:00 kwa saa za Burundi
Serengeti boys ambayo ilikuwa katika kundi moja na Zanzibar ambayo iliondolewa kwenye mashindano kwa madai ya kupeleka wachezaji ambao wamezidi umri inahitaji ushindi ili kujiweka katika nafasi nzuri ya kufuzu nusu fainali.
Akizungumza jana Kocha wa timu hiyo Oscar Mirambo  alisema Serengeti boys ipo tayari kuhakikisha inaondoka na ushindi ili ifuzu nusu fainali na wana ari kubwa hivyo wanatarajia kushinda mchezo huo.
“Mchezo na Sudan ni muhimu kushinda ili kujiweka katika nafasi nzuri kwani ni mchezo wa mwisho katika hatua ya makundi,” alisema Oscar
Nusu fainali zitachezwa Aprili 24  na mchezo wa kutafuta mshindi wa tatu utachezwa fainali zitachezwa Aprili 28katika Uwanja wa Ngozi.
Mashindano ya CECAFA U-17 yatashirikisha timu saba ambazo ni Uganda, Sudan, Burundi, Kenya, Somalia na Ethiopia na Tanzania Bara.

Saturday, April 21, 2018

IDRIS AUKWAA UBALOZI WA UBER










Dar es Salaam, Tarehe 20 Aprili 2018.... Kampuni ya Uber imemtangaza msanii Idris Sultan kuwa balozi wake mpya nchini Tanzania mwaka 2018. Idris anakuwa msanii wa kwanza nchini Tanzania kuwa balozi wa Uber, programu ya usafiri yenye umaarufu mkubwa, nchini Tanzania.
Msanii huyu wa uchekeshaji, muigizaji wa tamthlia, na mtangazaji wa vipindi vya redio ametangazwa rasmi katika hafla ya kukata na shoka iliyokwenda kwa jina la #IdrisnaUber iliyohudhuriwa na wageni wachache na wanahabari wa humu inchini. Shughuli hiyo imefanyika katika mgahawa wa kifahari wa Akemi jijini Dar es Salaam.
Tangu mwanzoni mwa zoezi hili, tulifanya juhudi kubwa kuhakikisha kwamba tunampata balozi mwenye ufuasi mkubwa na atakayeiletea Uber ufanisi nchini Tanzania,amenukuliwa Bi.Elizabeth Njeri, Meneja wa Masoko wa Uber Kanda ya Afrika Mashariki. Idris Sultan ni mcheshi na ni msanii ambaye hafanyi mambo yake kwa mazoea, pia anaheshimika katika tasnia ya uchekeshaji,tamthlia, na utangazaji wa vipindi vya redio. Tuna imani kwamba Idris atailetea Uber tija kubwa kwa sababu ni mzalendo kweli kweli - yeye ni kielelezo cha Utanzania na anawasiliana na mashabiki wake kupitia mitandao ya jamii kila wakati. Hizi ndizo sifa tunazosistiza tunapotaka kuwa na mkataba na mabalozi wa kampuni yetu kwa sababu zinasaidia sana katika kuonesha kwamba tunajali maslahi ya wasafiri na madereva wanaotumia mfumo wetu nchini Tanzania.
Akizungumza kwenye hafla hiyo Bw Alfred Msemo; Meneja Msimamizi wa Uber nchini Tanzania, alisema; “Kampuni ya Uber inajituma kutumia uwezo wake kupitia oparesheni zake kimataifa ili kuwa karibu na wateja wake humu nchini. Mchango wa Idris Sultan katika muziki wa Tanzania unaendana na dhamira yetu ya kujenga kampuni ya kimataifa inayogusa maisha ya madereva na wasafiri wanaotumia mfumo wetu hapa nchini. Tutaendelea kuwahudumia wasafiri wetu sambamba na kutoa fursa za ajira kwa madereva wanaotumia mfumo wetu.
Idris alifurahi sana alipotangazwa kuwa Balozi wa Uber nchini Tanzania; “Nimefurahi sana na ni heshima kubwa kwangu kupata fursa hii adimu ya kushirikiana na Uber,kwa sababu mimi nishabiki mkubwa wa mapinduzi yaliyoletwa katika sekta ya usafiri kupitia kwa mfumo wake kote duniani. Nimefurahi kuona jinsi Uber imepata umaarufu jijini Dar es Salaam, binafsi mara nyingi mimi hutumia usafiri wa uberX nikiwa na marafiki zangu kwenye mitoko yetu ya jioni na sasa wamaleta huduma nyingine ya bajaji; uberPOA ambayo nina hamu sana kuitumia - utaniona hivi karibuni. Uber inaendelea kubadilisha maisha ya maelfu ya madereva jijini Dar es Salaam sambamba na kuwapa wasafiri uhuru wa kuchagua usafiri wanaotaka. Nimefurahi sana kuwa sehemu ya kampuni ambayo inajituma kuleta mabadiliko chanya katika maisha yetu.
Baadaye kwenye hafla hiyo, Idris alipanda jukwaani na kuwatumbuiza mashabiki, wanahabari,na wafanyakazi wa Uber kwa kionjo cha kazi yake ya uchekeshaji. Msanii huyo na mshindi wa zamani wa shindano la Big Brother Africa alivunja mbavu za umati huo kwa vichekesho vyake.  
Tangazo hili linakuja siku chache tangu Uber ilipo tangaza kushirikiana na Tigo kwenye mpango
ambao wateja wa Tigo wanapata bando za bure wanapotumia programu ya Uber. Ushirikiano
huu wa kipekee nchini Tanzania umekuwa na manufaa makubwa kwa wasafiri na madereva
wanaotumia Uber na umechochea wasafiri na madereva zaidi kujiandikisha kutumia programu
ya Uber nchini Tanzania.


Wednesday, April 18, 2018

PICHA ZA UTUPU ZAWAFIKISHA KWA PILATO DIAMOND NA NANDY


Diamond Platnumz
WAZIRI wa Habari, Sanaa, Utamduni na michezo, Dk Harrison Mwakyembe ameagiza kukamatwa kwa wasanii wa muziki wa kizazi kipya  Faustina Charles ‘Nandy’ na Nasib Abul ‘Diamond’ baada ya kusambaa kwa video zake chafu na kufikishwa kituo cha polisi kwa ajili ya mahojiano na uchunguzi zaidi.
Kauli hiyo imekuja baada ya Mbunge wa jimbo la Ulanga,  Morogoro, Goodluck Mlingwa  kuuliza ni hatua gani za serikali zimechukuliwa ili kupambana na wasanii wanaweka picha za uchi na matusi katika mitandao.
Dk.Mwakyembe amethibitisha kuwa msanii Diamond bado yuko polisi alikofikishwa tangu juzi kwa ajili ya mahojiano baaada ya kuvujisha video akiwa na wanawake tofauti faragha.
Aidha Dk. Mwakyembe alisema Nandy naye atahojiwa na polisi kufuatia video yake ya faragha akiwa na msanii mwenzake Billnass kusambaa mitandaoni.
“Tulitunga sheria mwaka 2010 lakini tulikosa sheria za kubana wasanii  katika maudhui hasa katika upande wa mitandao, tumeshatunga hizo kanuni na sasa zimeanza kufanya kazi,”
”Kuna baadhi ya vijana wamekuwa wakifanya uhuni uhuni katika mitandao ya kijamii sana na tumeanza kuwafanyia kazi , yupo msanii Diamond ambaye  amefikishwa polisi tangu jana (juzi) kutokana na kusambaa kwa picha zake chafu, hata hivyo pia binti Nandy pia inabidi akamatwe ahojiwe,” alisema Dk Mwakyembe.

MONALISA KUPELEKA TUZO YAKE BUNGENI


MWIGIZAJI Yvonne Cherrie 'Monalisa’ ambaye amepata tuzo ya mwigizaji bora Afrika zinazotolewa na The African Prestigious Awards' nchini Ghana juzi anatarajiwa kuipeleka tuzo hiyo bungeni ikiwa ni nembo ya ushindi wa taifa.
Katika tuzo hizo mwizagizaji Ray Kigosi aliibuka mwigizaji bora wa kiume na  mpigapicha mahiri alikuwa Moiz Hussein wa Tanzania pia huku Rais Dk John Pombe Magufuli  akaipata kwa upande wa viongozi bora Afrika.
Akizungumza jana mama mzazi wa Monalisa anayeitwa Natasha Lewis  alisema  baada ya Monalisa kurudi kutoka Accra Ghana anatarajiwa kwenda Dodoma kwa ajili ya kuipeleka tuzo hiyo bungeni.
Naye Monalisa kupitia ukurasa wake wa Instagram aliwashukuru Watanzania wote kwani ni zaidi ya miaka 19 sasa akiwa kwenye sanaa na wamekuwa nyuma yake na tuzo aliyoipata ni kwa ajili yao kwani bila mashabiki isingewezekana.
Wakati huo huo Ray Kigosi amesema alishindwa kuhudhuria tuzo hizo kwa sababu alikuwa nje kikazi
“Sikufanikiwa kuhudhuria kwenye tuzo hizo kwa sababu nikuwa Afrika Kusini kikazi sina cha kuwalipa ndugu zangu zaidi ya kuendelea kuwaletea kazi nzuri zenye viwango bora ili tuendelee kuiletea heshima nchi yetu,” alisema Ray Kigosi
Tuzo hizo zilizotolewa usiku wa kuamkia April 15, 2018 mjini Accra nchini Ghana, Ray na Monalisa waliibuka washindi kutoka Tanzania.

Monday, April 16, 2018

SIMBA YAIFUNGA PRISONS 2-0 TAIFA, ALHAMISI KUCHEZA NA LIPULI




JOHN Bocco na Emmanuel Okwi leo wameipatia Simba ushindi wa mabao 2-0 dhidi ya Prisons katika mechi ya Ligi Kuu iliyochezwa kwenye Uwanja wa Taifa Dar es Salaam.
Ushindi huo unaifanya Simba izidi kujisafishia njia kuelekea kwenye ubingwa kwani sasa inaongoza msimamo wa ligi ikiwa na pointi 58 juu ya mabingwa watetezi Yanga walio na pointi 47 na mechi mbili kibindoni.
Mabao ya Simba yalifungwa katika kila kipindi kwenye mechi hiyo hiyo ambayo vinara hao walitawala katika vipindi vyote.
Prisons ilionekana kuibana Simba katika dakika za mwanzo kabla ya kusalimu amri na kuruhusu bao la Bocco dakika ya 35 kabla ya kujikuta wakicheza mchezo wa kujilinda zaidi katika kipindi cha pili.
Bocco alifunga bao hilo la kuongoza kwa kuuwahi kwa kichwa mpira wa krosi wa Erasto Nyoni uliogonga mwamba kabla ya kuujaza wavuni.
Okwi aliifungia Simba bao la pili katika dakika ya 80 na kuendelea kukifukuzia kiatu cha dhahabu kwa kufikisha mabao 18 kwenye ligi.
Penalti ya Okwi ilitolewa na mwamuzi Shomari Lawi wa Kigoma baada ya Jumanne Elifadhili kumfanyia madhambi Bocco akiwa kwenye eneo la hatari, Elifadhili alioneshwa kadi nyekundu.
Katika mechi hiyo Simba ilikosa mabao mengi hasa kupitia kwa mchezaji wake Shizza Kichuya aliyekosa mabao dakika ya kwanza, 50, 62 na 70.
Mechi nyingine zilizochezwa Ndanda ikiwa nyumbani Nang'wanda Sijaona imeshindwa kutamba kwa kukubali ‘kupapaswa’ na Ruvu Shootinga mabao 3-1 huku Kagera Sugar ikishinda 2-1 dhidi ya ndugu zake Mtibwa Sugar kwenye uwanja wake wa nyumbani Kaitaba.