UEFA Yatikisa Mpira wa Miguu: Yatishia Kususia Kombe la Dunia iwapo Mpango wa Infantino Utapita

Rais wa Uefa  Aleksander Ceferin (Kushoto) na Rais wa Fifa, Gianni Infantino (Kulia)

Chama cha Soka Barani Ulaya (UEFA) kimesema hakina mzaha katika kulinda hadhi ya mchezo huo na kimefikia uamuzi mzito wa kususia michuano yote ya Kombe la Dunia iwapo Shirikisho la Soka duniani (FIFA) litasonga mbele na mpango wake wa kuuza hisa za michuano hiyo kwa wawekezaji binafsi. 

Msimamo huo mgumu ulitangazwa baada ya kikao cha dharura kilichowakutanisha viongozi wa vyama vyote 55 wanachama, huku kukiwa na hasira kubwa dhidi ya rais wa FIFA, Gianni Infantino, kutokana na kile kinachotajwa kuwa ni kuendesha mambo kwa siri na kwa vitisho.

Mipango ya Infantino 

Chini ya mpango huo uliotangazwa wiki hii, FIFA inataka kuanzisha kampuni tanzu ijulikanayo kama Fifa Forward Enterprise (FFE) ili kuendesha matukio yake makuu, huku ikiruhusu kampuni za nje na wawekezaji binafsi kumiliki hisa za wachache zisizo na nguvu ya maamuzi. Kampuni binafsi ya mitaji ya Marekani, Thrive Eternal, inayomilikiwa na Joshua Kushner, inatajwa kuwa mstari wa mbele kuongoza kundi hilo la wawekezaji. 

Ili mpango huo upite, Infantino anahitaji kura 106 kati ya wanachama 211 wa FIFA, na tayari ameweka dau la Dola za Kimarekani milioni 40 kwa kila chama kitakachounga mkono mpango huo, huku akiweka tarehe ya mwisho ya Septemba 19 kwa nchi zinazotaka kupata malipo ya awali ya Dola milioni 20. 

Hata hivyo, mpango huo umeanza kukutana na ukuta mzito baada ya vyama vya UEFA na CONCACAF vya Amerika ya Kaskazini na Kati ambavyo kwa pamoja vina wanachama 96, kuonyesha msimamo thabiti wa kukataa katakata kuuza urithi wa soka kwa wenye fedha.

Hispania moja ya nchi sita za UEFA zilizoingia fainali mwaka huu

Umoja wa Ulaya 

Viongozi wa juu wa soka barani Ulaya wameeleza kuchukizwa kwao na jinsi mchakato huo ulivyofanywa kwa siri kubwa bila kushirikisha wadau wakuu wa mchezo huo. 

Rais wa UEFA, Aleksander Ceferin, aliongoza kikao hicho kilichoelezwa kuwa na taswira ya chuki na kutoridhishwa waziwazi, alisisitiza kuwa Kombe la Dunia si bidhaa ya uwekezaji inayoweza kuuzwa kwa matajiri binafsi bali ni tunda la jasho la vizazi na vizazi vya wachezaji na mashabiki duniani kote. 

Kauli hiyo iliungwa mkono na makamu wa rais wa UEFA, Laura McAllister, ambaye alieleza kuwa hatua hiyo ya FIFA ni tishio halisi la kuangamiza mustakabali mzima wa mchezo wa soka duniani. 

Serikali ya Uingereza kupitia Waziri wa Utamaduni, Lisa Nandy, na aliyekuwa Waziri Mkuu, Andy Burnham, nao wamejitokeza wazi kupinga mpango huo wakisisitiza kuwa soka ni mali ya mashabiki na wala si ya mabilionea wachache wenye njaa ya faida.

Hatima ya Soka Duniani 

Wakati shinikizo likizidi kuongezeka kutoka kwa vyama vingine vya soka duniani kama vile Baraza la Ligi Duniani (WLA) na Shirikisho la Soka la Asia (AFC) ambao nao wamelalamika kutoshirikishwa, bado haijafahamika wazi FIFA itachukua hatua gani kufuatia kitisho hiki cha kihistoria. 

Hata hivyo, wadau mbalimbali wa soka akiwemo mwenyekiti wa zamani wa Chama cha Soka cha England (FA), David Bernstein, wanaamini kuwa shinikizo hili litamlazimu Infantino kurudi nyuma na kuachana na mpango huo ili kuepusha mgawanyiko mkubwa ambao hautakuwa na mshindi kati ya Ulaya na shirikisho hilo la dunia. 

Ikiwa hakutakuwa na suluhu ya haraka kabla ya michuano mbalimbali ya kalenda ya kimarekani na kimataifa kuanza, soka la kimataifa linaelekea katika moja ya migogoro mikubwa kuwahi kushuhudiwa katika historia yake.