Shilingi Bilioni 302 Kusuka Viwanja vya Afcon 2027: Tanzania Kupiga Bao la Kiuchumi na Miundombinu ya Kisasa

Uamuzi wa serikali kutenga kiasi cha shilingi bilioni 302 kwa ajili ya kuboresha miundombinu ya michezo na maandalizi ya fainali za Kombe la Mataifa ya Afrika ni hatua kubwa inayolenga kuleta mapinduzi ya kiuchumi na kijamii nchini. 

Akiwasilisha Bajeti Kuu ya Serikali bungeni jijini Dodoma, Waziri wa Fedha Balozi Khamis Mussa Omar alibainisha kuwa fedha hizo zilizotumika katika kipindi cha kuanzia Julai 2025 hadi Aprili 2026 zinadhihirisha nia thabiti ya kuweka kipaumbele katika kukuza uchumi wa michezo, sekta ya utalii pamoja na kuiongezea Tanzania hadhi ya kimataifa. 

Hatua hii inaweka mazingira bora kwa nchi yetu kuwa mwenyeji wa mashindano hayo makubwa kwa kushirikiana na mataifa jirani ya Kenya na Uganda.

Sehemu kubwa ya uwekezaji huo unaenda moja kwa moja kwenye miradi mikubwa ikiwemo ujenzi wa uwanja mpya na wa kisasa mkoani Arusha ambao unajengwa mahususi kwa ajili ya Afcon 2027 ukiwa na uwezo wa kuchukua watazamaji 30,000. 

Gharama za ujenzi wa uwanja huo zimeongezeka hadi kufikia shilingi bilioni 338.54 kutoka makadirio ya awali ya shilingi bilioni 187 ili kukidhi viwango vya juu vya kimataifa. 

Sambamba na ujenzi huo, fedha hizo pia zinatumika kuboresha viwanja vya sasa ukiwemo Uwanja wa Benjamin Mkapa uliopo Dar es Salaam ili viweze kukidhi vigezo madhubuti na vikali vinavyowekwa na Shirikisho la Mpira wa Miguu Afrika.

Uwekezaji huu tayari umeanza kuzaa matunda kwa kuchochea ukuaji wa uchumi wa ndani kupitia sekta mbalimbali ambazo zimeanza kunufaika mapema na fursa hizi. Wauzaji wa vifaa vya ujenzi na watoa huduma za ukandarasi wamepata soko kubwa, huku miradi hii ikitengeneza maelfu ya ajira za moja kwa moja na zisizo za moja kwa moja kwa mafundi, wahandisi na vibarua wa ndani. 

Hali hii inaongeza mzunguko wa fedha kwa jamii na kuimarisha kipato cha mwananchi mmoja mmoja kabla hata mashindano yenyewe hayajaanza rasmi.

Kutokana na ukubwa wa mashindano haya, sasa ni jukumu la kila Mtanzania kujipanga na kuchangamkia fursa zote zitakazotokana na maandalizi haya ili kuboresha ustawi wa maisha yao.

Fainali za Afcon zitafungua milango mingi ya kibiashara hususani katika sekta za utoaji wa huduma za vyakula, malazi, usafiri, burudani na utalii kutokana na wageni wengi watakaomiminika nchini. Kama alivyosisitiza Waziri wa Fedha bungeni, wananchi hawana budi kuwa macho na wepesi kutumia fursa hizi zinazojitokeza ili kujiongezea kipato na kuacha alama chanya ya ukarimu wa kitanzania kwa wageni.

Faida kubwa zaidi ni kuwa baada ya mashindano ya Afcon 2027 kukamilika, Tanzania haitapoteza kitu bali itabaki na miundombinu hii bora na ya kisasa kama mali ya taifa. 

Kuwepo kwa viwanja vyenye viwango vya kimataifa kutalipa taifa sifa na vigezo stahiki vya kuomba uenyeji wa mashindano mengine makubwa zaidi ya kimataifa hapo baadaye. Maandalizi haya ya sasa si tu kwa ajili ya burudani ya soka, bali ni uwekezaji wa kudumu wa kimkakati utakaoendelea kuingizia taifa mapato na kuinua michezo kwa vizazi vingi vijavyo.