FUNZO LA RIPOTI YA JAJI CHANDE:MSHIKAMANO HUJENGWA KWA MATUMAINI YA USHIRIKI WA MAENDELEO

Uchambuzi wa kina wa ripoti ya ghasia za uchaguzi umeonesha uhusiano wa moja kwa moja kati ya changamoto za kiuchumi na ushiriki wa vijana katika vurugu. 

Imebainika kuwa baadhi ya vijana walioshiriki katika uvunjifu wa amani walishawishiwa kwa malipo madogo ya fedha, kuanzia Sh 10,000 hadi Sh 50,000, kutokana na hali ngumu ya maisha na ukosefu wa ajira. Hali hii inadhihirisha kuwa kuzuia vurugu za kisiasa si suala la usalama pekee, bali ni suala la sera za kiuchumi zinazogusa maisha ya vijana moja kwa moja.

Hili ni onyo kwa taifa kuwa mshikamano wetu unategemea jinsi tunavyowalinda vijana wetu dhidi ya ushawishi hasi.

Ili kulinda mshikamano wa kitaifa, ni muhimu kwa wananchi, hususan vijana, kutokubali kutumiwa kama daraja la kufikia malengo ya kisiasa ya watu wachache. 

Ripoti inatoa mfano wa mkoa wa Kilimanjaro ambao ulibaki kuwa na utulivu kutokana na mikakati ya mapema ya kushirikisha makundi mbalimbali kama bodaboda katika mazungumzo ya amani. 

Huu ni ushahidi kuwa mshikamano unajengwa kwa kuwapa watu matumaini na nafasi ya kushiriki katika maendeleo ya nchi yao. Taifa linapaswa kuelekeza nguvu katika kutoa elimu ya uraia itakayowasaidia wananchi kukataa ulaghai na kulinda umoja wa nchi kwa gharama yoyote.

Inasikitisha zaidi kuona katika ripoti ya Tume ya Jaji Chande  jinsi nguvu kazi ya taifa—vijana—ilivyotumiwa kama nyenzo za kufanya uharibifu kwa ahadi ndogo za kifedha. 

Katika juhudi za Kujenga Upya (Rebuilding) taifa letu, ni lazima kuimarisha uzalendo na mshikamano wa kitaifa. 

Wananchi wanapaswa kuwa macho na kutokubali kulaghaiwa na watu wanaotafuta madaraka kwa gharama ya amani ya nchi. Mkoa wa Kilimanjaro uliotajwa kama mfano wa utulivu, unatuonesha kuwa mawasiliano ya karibu kati ya mamlaka na jamii, ikiwemo makundi ya bodaboda, yanaweza kuzuia hofu na uvunjifu wa sheria.

Ni wakati wa kila Mtanzania kuwa mlinzi wa mwenzake, tukikataa kutumiwa kama daraja la vurugu na badala yake kuwa mabalozi wa amani na maendeleo ya kweli.