AMANI NI AKIBA: SOMO KUTOKA NYARUGUSU NA KWANINI HATUPASWI KUCHEZEA UTULIVU WETU

Kuna methali inayosema, "Hujua thamani ya maji pindi kisima kinapokauka." Kwa miaka mingi, Watanzania tumekuwa tukiishi kwenye "kisima" cha amani kiasi cha kuanza kukichukulia kama jambo la kawaida. Lakini ziara ya hivi karibuni ya Waziri wa Nchi wa Jamhuri ya Kidemokrasia ya Kongo (DRC), Eve Masudi, katika kambi ya wakimbizi ya Nyarugusu mkoani Kigoma, ni kengele ya dharura inayotukumbusha: Amani ikitoweka, hakuna pa kukimbilia.

Nyarugusu: Shule ya Maumivu na Subira

Waziri Masudi amewasili Nyarugusu kuwafariji ndugu zake waliokimbia machafuko. Takwimu alizokutana nazo ni za kusikitisha. Kambi hiyo pekee ina hifadhi ya watu 132,404. Kati yao, zaidi ya asilimia 60 ni watoto chini ya miaka 18, na wengine zaidi ya 21,000 ni watoto wachanga chini ya miaka mitano.

Hawa ni watoto ambao hawajui maana ya "nyumbani." Wanakulia kambini, wakitegemea misaada ya chakula na hifadhi ya utu kutoka kwa Serikali ya Tanzania. Waziri Masudi ameishukuru Tanzania kwa kutoa hifadhi hiyo kwa miaka 30 sasa. Miaka 30 ya mtu kuishi kama mgeni, bila uhuru wa kufanya shughuli za maendeleo, ni muda mrefu mno.

Swali la Kizazi: Tukivuruga Kwetu, Sisi Tutajihifadhi Wapi?

Nchi jirani kama DRC, Burundi, na mataifa mengine yamekuwa yakikimbilia Tanzania kwa miongo kadhaa kutafuta salama. Tanzania imekuwa "kisiwa cha amani" na "ghala la matumaini." Lakini hebu tujiulize kwa sauti: Ikiwa sisi wenyewe tutaanza kuchezea amani hii, nani atatuhifadhi?

Nchi zinazotuzunguka bado zinapambana kurejesha utulivu wa kudumu. Ikitokea "tumelianzisha" hapa kwetu, hatuna kaka wala mdogo wa kukimbilia ambaye ana utulivu kama tulionao sasa. Maelfu ya wakimbizi wa DRC kule Nyarugusu, kupitia kwa Apolina Masumbuko, wanalilia kurejea kwao ikiwa tu usalama utapatikana. Hii ina maana kuwa hakuna mahali pazuri kama nyumbani, lakini nyumbani hakuishiwi ikiwa kuna moto wa machafuko.

Wito wa Uzalendo: Tuache Mihemko, Tulinde Utulivu

Inasikitisha kuona baadhi ya watu, pengine kwa sababu ya mihemko ya kisiasa au chuki za mtandaoni, wakitamani au kuchochea uvunjifu wa amani. Wanashindwa kuelewa kuwa amani ni kama kioo; kikipasuka, kukirudisha ni kazi ya miaka mingi.

Waziri Eve Masudi amewasihi wakimbizi wa DRC kuishi kwa nidhamu ili kuilinda heshima ya nchi yao. Sisi tulio nyumbani tunapaswa kuwa na nidhamu zaidi. Tusitumie uhuru wetu wa kujieleza kupanda mbegu za chuki ambazo zitazalisha kambi za wakimbizi hapo baadaye.

Tanzania ni nchi kubwa na yenye heshima duniani kwa sababu ni kimbilio la wanyonge. Tusikubali kugeuka kuwa nchi ya walalamikaji wanaotafuta hifadhi ugenini.

Nyarugusu ni kioo. Inatuonesha sura ya watu ambao walikuwa na nyumba, mashamba, na biashara zao, lakini leo wanaishi kwa kutegemea foleni za chakula. Watanzania, tusidanganyike na kelele za wachochezi. Amani tuliyonayo ni hazina ambayo mataifa mengi yanaitamani kwa machozi. Tuilinde, tuithamini, na tuienzi kwa ajili ya kizazi cha sasa na kijacho.

Tukiharibu Tanzania, hatuna pakwenda. Tanzania ni moja, na amani yake ni dhamana yetu sote.