GERVINHO ATUA ROMA, WADAU WAMPOKEA KWA SHANGWE

MSHAMBULIAJI wa kimataifa wa Ivory Coast, Gervinho amekamilisha rasmi usajili wake kutoka klabu ya Arsenal kwenda AS Roma ya Italia kwa ada ambayo haikuwekwa wazi.

Gervinho mwenye umri wa miaka 26 amefunga mabao 11 pekee katika miaka miwili ambayoamekuwepo Arsenal na kushindwa kumshawishi kocha Arsene Wenger kumpatia namba ya kudumu katika kikosi cha kwanza cha Gunners. Wakati Roma walipotangaza ofa yao ambayo inakadiriwa kufikia kiasi cha euro milioni nane, Wenger alikubali haraka na Gervinho kusafiri kwenda Italia mwishoni mwa wiki iliyopita kwa ajili ya kufanyiwa vipimo vya afya na makubaliano binafsi. Akiwa Roma, Gervinho ataungana na kocha Rudi Garcia ambaye alimfundisha wakati akiwa kinda katika klabu ya Lille. Katika taarifa iliyotumwa katika mtandao wake, Arsenal ilithibitisha kumuuza mchezaji huyo Roma na kumshukuru kwa mchango wake katika kipindi chote walichokuwa naye hapo.