UCHAGUZI TEFA RUKSA KESHO

CHAMA cha Soka Dar es Salaam (DRFA)  kimewaomba wapiga kura wote kujitokeza kwenye uchaguzi wa kuwapata viongozi watakaokiongoza chama cha soka Temeke (TEFA) ili kuleta maendeleo ya mpira wa miguu mkoa wa Dar es salaam.

Wito huo umetolewa na Msemaji wa Chama cha Soka Mkoa wa Dar es Salaam, (DRFA) na kusisitiza amani na utulivu itawale katika zoezi hilo muhimu la upigaji kura.

“Shirikisho la mpira wa miguu nchini TFF limekiruhusu chama cha soka mkoa wa Dar es salaam (DRFA)  kuendelea na mchakato wa uchaguzi wa viongozi wa chama cha soka wilaya ya Temeke (TEFA) kama ulivyopangwa na kamati ya uchaguzi ya  chama hicho hivyo tunawasihi wanachama na wagombea kudumisha amani”, alisema Katanga.

Baada ya ruhusa hiyo Uongozi wa DRFA umemuandikia barua katibu wa TEFA Kasim Mustapha ili aijulishe kamati ya uchaguzi ya chama hicho kuendelea na mchakato huo kama kawaida.

Awali TFF iliiandikia barua DRFA kushauri kusimamishwa kwa uchaguzi huo, kutokana na kile kinachoonekana kuwepo na malalamiko kuhusu mchakato wake lakini baada ya mashauriano kati ya pande hizo mbili, sasa ni ruksa kwa uchaguzi huo kufanyika kesho (leo) jumapili  kama ulivyopangwa.