KASEJA ANUKIA COASTAL UNION

GOLIKIPA mkongwe nchini Juma Kaseja amesajiliwa na Coastal Union ya Tanga na ameanza mazoezi.

Akizungumza kwa njia ya simu toka Tanga, Msemaji wa Coastal Union, Oscar Assenga alikiri ujio wa Kaseja kwenye timu hiyo lakini akasema bado hajasajiliwa bado wapo kwenye mazungumzo naye.

“Kweli kaseja amekuja Tanga na alionekana kwenye mazoezi yetu juzi lakini siyo kweli kama amesajiliwa bado yupo kwenye mazungumzo na uongozi endapo watakubaliana mtataarifiwa”, alisema Assenga.

Habari za ndani zaidi zinasema kuwa, Kaseja tayari ameshamalizana na Coastal Union na amerejea jijini Dar es Salaam kuchukua vitu vyake tayari kwa kuanza maisha mapya kwenye klabu ya ‘Wagosi wa Kaya’ msimu ujao.

Hivi karibuni Kaseja alikaririwa akisema klabu za Mbeya City, Mwadui FC na Ndanda zilikuwa zikiwania saini yake baada ya TFF kumruhusu kujiunga na timu yoyote baada ya kupitia maombi yaliyoletwa kwao na Chama cha wacheza Soka Tanzania (SPUTANZA) kikiomba mchezaji huyo kuwa huru na kujiunga na klabu yoyote wakati akisubiri hatma ya kesi yake na Yanga kwani hawajamwondoa kwenye mgogoro wa kikazi na klabu yake.

Ikiwa Coastal Union watafanikiwa kuinasa saini ya Golikipa huyo wa zamani wa timu ya Taifa ya Tanzania ‘Taifa Stars’, Simba na Yanga watakuwa wamelamba dume kutokana kuwa kwenye ubora kwani anafanya mazoezi kwenye mafunzo yanayoendeshwa na Peter Manyika kwenye Uwanja wa Karume kila siku asubuhi.