YANGA YAIFUNGA MTIBWA 3-1

MABINGWA wa Ligi Kuu Tanzania Bara, Yanga wameichapa Mtibwa Sugar kwa mabao 3-1 katika mechi ya kujiandaa na msimu mpya iliyopigwa Uwanja wa Taifa jana.

Yanga inayonolewa na Erie Brandts ilianza kuonesha umahiri wake kwenye dakika ya 26 baada ya Said Bahanuzi kumalizia krosi ya Jerryson Tegete hivyo kuwanyanya mashabiki wao katika viti.

Yanga yenye Makao Makuu yake Jangwani jijini Dar es Salaam iliendelea kulisakama lango la Mtibwa, ila uhodari wa Kipa Hussen Sharifu wa Mtibwa, ulionekana baada ya kuokoa michomo mbalimbali iliyopigwa na washambuliaji wa miamba hiyo ya Bara.

Hadi kipindi cha kwanza kinamalizika, Yanga ilikuwa mbele kwa bao 1-0, lakini cha pili kilipoanza tu, Mtibwa walionekana kuamka ambapo dakika ya 57 walipata bao kwa njia ya penalti iliyofungwa na Shabani Kisiga baada ya Rajab Zahir kuunawa mpira kwenye eneo la hatari.

Mara baada ya bao hilo, Mtibwa waliliandama lango la Yanga mara kwa mara ambapo dakika ya 60, Ally Mohammed alishindwa kuifungia timu yake baada ya kupiga shuti hafifu lilookolewa na Deo Munishi.

Ndoto za Mtibwa kuibuka kidedea kwenye mchezo huo zilizimwa dakika ya 81 baada Tegete kuzamisha wavuni penalti waliyoipata kufuatia Salvatory Ntebe kumwangusha mfungaji huyo kwenye eneo la hatari.

Uzembe wa Kipa, Saidi Mohammed aliyeingia kipindi cha pili, uliigharimu Mtibwa dakika ya 87 baada ya Hussein Javu kumpiga chenga na kutikisa nyavu hizo kirahisi.

Hadi mwamuzi anamaliza mchezo huo, Yanga ilifanikiwa kushinda 3-1 licha ya Mtibwa kuonesha kandanda safi kipindi cha pili.

Yanga iliwakilishwa na Deo Munishi/Ally Mustaph, Juma Abdul, Oscar Joshua, Issa Ngao, Nadir Haroub/Rajab Zahir, Athuman Iddi/ David Luhende, Said Bahanuz/Abdallah Mguli, Salum Telela, Shaban Kondo/Husein Javu, Jeryson Tegete na Haruna Niyonzima

Mtibwa: Hussen Sharifu/Said Mohammed, Hassan Ramadhan, Paul Ngalema, Ally Ramadhani/Dikson Daudi, Salvator Ntebe, Salim Mbonde, Ally Shomary, Masud Ally/Awadh Juma, Abdallah Juma/Stanley Minzir, Shabani Kisiga na Ally Mohammed.