TFF KULIPA KLABU PESA ZA AZAM FEDERATION MAPEMA ILI KUKWEPA VISINGIZIO

SHIRIKISHO la Mpira wa Miguu Tanzania (TFF), limesema limezilipa timu zote sita zinazotarajiwa kushuka dimbani leo katika michezo ya awali ya kufungua dimba michuano ya Kombe la Shirikisho la Azam ‘Azam Sports Federation Cup’ (ASFC).

Akizungumza, Ofisa habari wa Shirikisho la Soka Tanzania (TFF) Alfred Lucas alisema timu hizo ni Buseresere ya Geita itakayocheza na Isako ya Songwe, Usamala ya Simiyu ambayo itacheza na Sahale All Stars ya Tanga na Kisarawe United ya Pwani na Silabu ya Mtwara ambao  umeahirishwa kwa sababu ya majeruhi ya wachezaji baada ya kupata ajali.

“Timu za Buseresere, Isako, Usamala, Sahale All Stars, Kisarawe na Silabu zote zimelipwa pesa zao na kesho (leo) zinatarajiwa kushuka dimbani kucheza isipokuwa Kisarawe na Silabu umeahirishwa kwasababu Silabu walipata ajali wakiwa safarini kwenda Pwani.

Baada ya mechi hizo, itakuja raundi ya kwanza ya ASFC ambayo itachezwa kati ya Novemba 7, 8 au 9 ambako TFF imepanga leo kutuma fedha zote za maandalizi ya timu husika ili kusiwe na kisingizio chochote cha kujiandaa.

Lucas alisema Kaimu Katibu Mkuu wa TFF, Kidao Wilfred ameagiza Idara ya Fedha na Utawala ya TFF kulipa fedha hizo haraka kwa kufuata taratibu za malipo kupitia benki, badala ya akaunti ya mwakilishi ye yote au kiongozi.

Pia Kidao ameagiza timu ambayo haijafungua akaunti watakuta fedha zao kwa Chama cha Mpira wa Miguu Mkoa (FA), lakini TFF ingependa kusisitiza kwa wadau hao kufufua akaunti au kufungua akaunti haraka.

Katika raundi ya kwanza Mashujaa ya Kigoma itacheza na Mshindi kati ya Buseresere ya Geita na Isako ya Songwe,  wakati mechi nyingine Msange ya Tabora itacheza na Milambo pia ya Tabora na Bulyanhulu ya Shinyanga itacheza na Area C ya Dodoma.

Mji Mkuu FC ya Dodoma itacheza na Nyundo ya Kigoma wakati Baruti FC ya Mara itacheza na Ambassodor ya Kahama, Shinyanga huku Eleven Stars ya Kagera ikipangwa kucheza na Ndovu ya Mwanza.

Changanyikeni ya Dar es Salaam itacheza na Reha FC pia ya Dar es Salaam wakati mshindi kati ya Kisarawe United na Silabu ya Mtwara atacheza na Kariakoo ya Lindi huku Cosmopolitan ikicheza na Ajabalo wakati Makumba FC itacheza na Green Warriors ya Kinondoni, Namungo FC ya Lindi itachuana na Villa Squad ya Dar es Salaam huku Dar City ikicheza na Majimaji Rangers ua Nachingwea.

Michezo mingine ya hatua ya kwanza itakutanisha timu za Shupavu FC ya Morogoro na Sabasaba pia ya mjini humo, Motochini FC ya Katavi dhidi ya Ihefu FC ya Mbeya, The Mighty Elephant ya itacheza na Makanyagio ya Rukwa.

Burkina FC ya Morogoro itacheza na Mbinga United ya Ruvuma, Makambako Heroes ya Njombe  itacheza na Mkamba Rangers ya Morogoro, Real Moja Moja itapambana na African Wonderers – zote za Iringa. Boma FC ya Mbeya itacheza na African Sports ya Tanga.

Mechi nyingine za hatua hiyo itakuwa ni kati ya Pepsi ya Arusha ambayo itacheza na Kilimanjaro Heroes ya Kilimanjaro, Stand Misuna ya Singida itacheza na Madini FC ya Arusha, AFC ya Arusha itacheza na Nyanza ya Manyara, New Generation itacheza na Mshindi kati ya Usamala FC na Sahale ya Tanga. Bodaboda FC itacheza na Kitayose ya Kilimanjaro.

Michuano hiyo ambayo Bingwa Mtetezi ni Simba ya Dar es Salaam, inashirikisha timu 91 msimu huu kwa mchanganuo wa timu 16 za Ligi Kuu Tanzania Bara, 24 za Ligi Daraja la Kwanza, 24 za Ligi Daraja la Pili na 27 za Ligi ya Mabingwa wa Mkoa