SILABU FC YA MTWARA YAPATA AJALI TFF YATUMA SALAMU ZA POLE

TIMU ya Silabu FC ya Mtwara ambao ni mabingwa wa mkoa juzi wamenusurika katika ajali iliyotokea Nchinga mkoani Lindi wakiwa safarini kwenda mkoa wa Pwani kwa ajili ya mchezo wa kombe la Shirikisho la Azam ‘Azam Sports Federation’ Cup dhidi ya Kisarawe FC.

Akizungumza Katibu wa Chama cha Soka Mkoa wa Mtwara, (MTWAREFA)  Kizito Mbano alisema gari lililopata ajali ni Coaster yenye namba T 159 DKQ ilikuwa imebeba watu 26, wachezaji 18, benchi la ufundi watano na viongozi watatu.

“Basi aina ya Coaster ambayo ilikuwa inakwenda Pwani ilipata ajali eneo la Nchinga, Lindi, watu 16 walipata majeraha na kukimbizwa katika hospitali ya mkoa wa Lindi ya Sokoine baada ya gari kumshinda dereva nadhani alikuwa amelala likayumba kushoto na kulia likaenda kugonga jiwe na kusimama,” alisema Mbano.

“Baada ya kupokelewa hospitali walipata matibabu lakini baada ya kuona huduma ya hospitali ya Sokoine hairidhishi tuliomba kuondoka nao  na majeruhi watatu ambao waliandikiwa kulazwa na kuwapekeleka hospitali ya Ndanda ambayo ipo Masasi Mtwara,” aliongeza Mbano

Mbano aliwataja wachezaji waliolazwa ni Abdul Patrick ambaye anakohoa damu, Karim Issa ameumia juu ya jicho na ana maumivu makali na Musa Musa ambaye ana maumivu makali ya kichwa na wengine wanafanyiwa vipimo zaidi ili kujua kama hawajaumia sana.

Akizungumza, Ofisa Habari wa Shirikisho la Soka Tanzania (TFF) Alfred Lucas alisema Rais Karia alisema TFF imepokea kwa masikitiko habari hiyo na kuwaombea kwa Mungu ili wapone mapema.

“Mchezo huo umeharishwa hadi hapo baadae na Rais Karia anawaombea majeruhi wapone haraka na kurejea katika afya ili waweze kuendelea na majukumu yao ya kila siku,” alisema Lucas.

Azam federation Cup ambayo inashirikisha timu 91  ambapo timu 16 ni za Ligi Kuu, 24 za Ligi Daraja la Kwanza, 24 za Ligi Daraja la Pili na 27 za Ligi ya Mabingwa wa Mkoa hatua ya awali ilianza kuchezwa Oktoba 31.