LIGI YA VYUO YA SOKA LA UFUKWENI YANUKIA

SHIRIKISHO la Mpira wa Miguu Tanzania (TFF ) limeandaa ligi ya mpira wa miguu wa ufukweni kwa timu za taasisi za Elimu ya juu mkoa wa Dar es Salaam na Pwani inayotarajiwa kuanza Novemba 9 katika Uwanja wa Karume Dar es Salaam. 

Akizungumza jana, Mratibu wa soka la ufukweni, Deogratius Lucas alisema baada ya kukamilika kwa ligi ya taasisi Desemba itaanza ligi ya klabu.

"Shirikisho linavitaarifu vyuo na taasisi za elimu ya juu kuchukua fomu za usajili wa timu zao kwa ajili ya kushiriki ligi hiyo," alisema Lucas. 

Pia Lucas alisema fomu zinapatikana katika ofisi za TFF na kwamba mwisho wa kuchukua ni Novemba 6.  

"Serikali za wanafunzi kupitia wizara ya michezo wanatakiwa kufika kuchukua fomu kwa ajili ya kujisajili ikiwa ni pamoja na kuthibitisha ushiriki wao", alisema Lucas. 

Aidha Lucas alisema timu zote za mpira wa miguu wa ufukweni za mtaani zinatakiwa kujisajili kwa ajili ya ligi yao ambayo itaanza mwishoni mwa Desemba.  Kwa ukanda wa Afrika Mashariki Tanzania inashika nafasi ya kwanza pamoja na Kenya na Uganda katika ubora na kwa Afrika inashika nafasi ya 12.