KOCHA WA TIMU YA TAIFA YA WANAWAKE SWEEDEN ASIFU VIPAJI TANZANIA

KOCHA raia wa Sweden, Mariane Sundhage amesema Tanzania ina vipaji vya soka ila vinahitaji kuendelezwa. 

Sundhage aliyasema hayo jana wakati wa kliniki ya soka kwa wachezaji wa kike iliyofanyika katika Uwanja wa Karume Dar es Salaam.

"Jana (juzi) nilikuwa Morogoro nimeona wachezaji chipukizi, wana vipaji na wanapenda soka cha msingi ni kuendelezwa na naamini wakiendelezwa baada ya miaka kadhaa mtakuwa na wachezaji wanaocheza soka nje ya Tanzania," alisema Sundhage.

Aliwaasa wachezaji kufanya mazoezi kwa bidii ili kukuza kipaji, kula vizuri na kupata muda wa kutosha kupumzika.

Awali akizungumza kwenye kliniki hiyo,  Mwenyekiti wa Chama cha soka la wanawake (TWFA), Amina Karuma alisema Kamati ya soka la wanawake inapambana kuona mpira wa miguu unachezwa kila kona ya Tanzania ndio maana imemleta Sundhage na hivi karibuni ligi ya wanawake itachezwa katika msimu wa pili.

"Kamati kwa kushirikiana na Shirikisho la Mpira wa Miguu Nchini tunajitahidi kuhakikisha soka la wanawake linachezwa ndio maana tumemleta kocha Sundhage," alisema Karuma.

Pia Karuma aliwataka wachezaji waliopo Twiga Stars kuendelea na mazoezi kwani hivi karibuni wataingia kambini kujiandaa na mashindano ya Cecafa.