KOCHA WA MGAMBO ASEMA NDANDA LAZIMA IKAE MKWAKWANI

Kocha Bakari Shime

KOCHA wa Mgambo Shooting ya Handeni Tanga, Bakari Shime, amesema anatarajia timu itafanya vizuri kwenye mchezo wa kesho dhidi ya Ndanda Fc utakaochezwa Uwanja wa Mkwakwani Tanga.

Mgambo ambao watakuwa wenyeji wa Ndanda FC wanaingia uwanjani wakiwa na kumbukumbu ya kufungwa bao 1-0 na Coastal Union kwenye Uwanja huo wa Mkwakwani.

Shime alisema kuwa timu yake ipo vizuri kisaikolojia na kiufundi pia na makosa ambayo yalijitokeza kwenye mchezo uliopita ameyafanyia marekebisho.

“Timu imejiandaa vema na tuna imani tutaondoka na pointi tatu japo pia wapinzani wetu si wa kubeza kwani mchezo utakuwa wa ushindani”, alisema Shime.

Mgambo Shooting inashika nafasi ya 13  ikiwa na pointi 17 ikiwa imeshacheza michezo 15 kwenye ligi Kuu Tanzania Bara msimu wa 2014/15 na Ndanda FC inashika nafasi ya saba  ikiwa na pointi 22  na imecheza michezo 17.

Ndanda wataingia uwanjani wakiwa na kumbukumbu nzuri ya ushindi wa mabao 2-1 waliopata ugenini dhidi ya Ruvu Shooting ya Pwani kwenye mechi iliyopita.

Michezo mingine kesho ni Mbeya City wataokuwa wageni wa Mtibwa Sugar kwenye Uwanja wa Manungu Turiani huku Uwanja wa Taifa jijini Dar es salaam watani wa jadi Simba SC watakuwa wenyeji wa Young Africans, mchezo unaotarajiwa kuanza kutimua vumbi majira ya saa 10 kamili jioni kwa saa za Afrika Mashariki.