KOCHA BOMBA AWAALIKA WASICHANA KUJIFUNZA SOKA

 

Kocha Juma Bomba wa timu ya Sayari Wanaume, akiongea na wachezaji wake wakati wa mazoezi yaliyofanyika kwenye Uwanja wa Msimbazi Rovers Ilala, jijini Dar es Salaam

KOCHA wa timu ya soka la wanawake ya  Sayari Women Sports Club, Juma Bomba amewataka wasichana wanaopenda kujifunza mpira wa miguu kujitokeza.

Bomba aliyasema hayo jijini na kusema kuwa Sayari inahitaji kuwa na wachezaji wengi chipukizi hivyo wale wote wanaopenda kujifunza wanakaribishwa wafike Uwanja wa Msimbazi Rovers, Ilala kuanzia saa 10:00 jioni siku za Jumatatu hadi Ijumaa.

“Nimejitolea kuwafundisha soka bure hivyo wasichana wote wanakaribishwa wafike siku ya Jumatatu hadi Ijumaa saa kumi jioni”, alisema Bomba

Pia anasema Sayari wanaanzisha timu ya soka la Ufukweni kwa wasichana hivyo wachezaji watakuwa na fursa ya kucheza michezo mingi wakiwa Sayari.

Juma pia amewataka viongozi wa soka Mkoa wa Dar es Salaam kusimamia kikamilifu soka na kuhakikisha ligi ya wanawake inachezwa kwani linaelekea kupoteza mwelekeo baada ya kusimama kwa misimu miwili bila kuchezwa.

Sayari ni moja timu kongwe kwenye soka la wanawake chini ya Mwenyekiti Fatuma Mkambara na imeshawahi kutwaa Ubingwa wa soka la wanawake Mkoa wa Dar es Salaam mara kadhaa.