SIRI 10 ZA MOTO ULIOWASHWA ARSENAL

Arsenal wamewasha moto, ushindi wa jumanne dhidi ya napoli ni ushindi wao wa 10 mfululizo msimu huu.

Mabao ya kipindi cha kwanza ya mesut ozil na olivier giroud, yamewafanya vijana wa arsene wenger kukaa kileleni mwa kundi f, miamba hiyo ya emirates iko kileleni mwa msimamo wa ligi kuu england kutokana na kushinda mechi tano kati ya sita msimu huu.

Hizi ndizo siri 10 za mafanikio ya arsenal msimu huu.

Giroud mtambo wa mabao

Siyo tu kwamba, olivier giroud amenyoa staili mpya, sasa hivi anaweza kujifagilia kwamba ni mmoja kati ya washambuliaji bora england. Mfaransa huyo anaongoza mashambulizi ya arsenal kwa mifano, tayari anamabao sita msimu huu.

Wenger alitaka kusajili straika mpya, wakati wa kiangazi alitoa ofa kwa gonzalo higuain, luis suarez na wayne rooney na kushindwa kwake kuwanasa kulitoa dalili za ukame kuendelea arsenal, lakini giroud anamtazamo mwingine na kazi yake ni moja tu kucheka na nyavu.

Flamini amerudi kukichafua

Mathieu flamini (28), alirudi rasmi emirates kwa mara ya pili kwenye mechi dhidi ya tottenham hotspur. Aliingia kipindi cha pili kwenye mechi hiyo na kukichafua kwenye eneo la kiungo na kusababisha viungo wa timu pinzani kupaona pachungu na tangu wakati huo jamaa kazi yake ni moja tu, kutibua.

Kwa kipindi kirefu sasa, arsenal wamekosa kiongozi kwenye kikosi chao na flamini anaweza kuwa jibu lao. Jamaa amekuwa akitawala kiungo cha arsenal na kufanya maisha kuwa magumu kwa wapinzani kutokana na ubabe wake na buti zake za chini chini ambazo zimekosekana arsenal kwa muda mwingi.

Mwaka 2008 aliondoka arsenal na kukimbilia ac milan kutafuta mafanikio, lakini sasa hivi amerudi akiamini bado anadeni kwa arsene wenger na anaonekana kulipa kila kitu kwa sasa.

Wenger alimfagilia sana ozil baada ya arsenal kuipiga napoli, lakini shughuli aliyoifanya flamini ilikuwa siyo mchezo na kuwapa nafasi kina ozil, aaron ramsey na thomas rosicky kucheza huru.

Mchawi ozil

Saa moja likiwa limesalia kabla ya dirisha la usajili kufungwa, taarifa zilizagaa kwamba arsenal wamenasa mmoja kati ya wachezaji bora duniani. Wenger anajulikana kwa ubahili wake, kwa mjerumani huyu alivunja rekodi ya usajili ya klabu.

Mesut ozil ametua arsenal kutoka real madrid kwa ada ya pauni milioni 42.5 na macho huyo wa kijerumani anaonekana kurudisha kila shilingi iliyotumika kumsajili. Ozil ana kila kitu anajua kukaa na mpira, fundi, mbunifu na ‘timing’.

Bao lake la kwanza kwenye jezi za arsenal katika pambano dhidi ya napoli, lilikuwa la kuvutia sana na mashabiki wa arsenal sasa wanaona fahari kuvaa jezi zao walizokuwa wamezifungia kabatini kutokana na matokeo mabovu.

Nini bale, kuna ramsey

Mchezaji wa kimataifa wa wales anayetajwa sana ni gareth bale, lakini sasa hivi arsenal kuna aaron ramsey (22), moja ya wachezaji ambao msimu uliopita alikuwa akichukiwa mno na mashabiki wa miamba hiyo ya emirates, lakini sasa hivi ndiyo kila kitu kwao, amekuwa kipenzi chao kutokana na fomu yake ya kufunga mabao muhimu msimu huu.

Ramsey tayari amefunga mabao manne kwenye ligi kuu england, manne ligi ya mabingwa ulaya na moja akiwa na timu ya taifa ya wales.

Siyo mabao yake tu ndiyo yamechangia mafanikio ya arsenal msimu huu, lakini pia kujituma kwake kumekuwa hakuna mfano, anahaha uwanjani msimu, jina lake sasa hivi ndiyo la kwanza kuandikwa kwenye karatasi ya kikosi cha wenger akiwa anapanga timu, sasa hivi london kuna mchawi mpya wa wales na tumpotezee bale.

Nyumbani ni nyumbani

Emirates hapajawa nyumba yenye furaha arsenal tangu walipoondoka highbury mwaka 2006, lakini kwa jinsi hali ilivyokuwa emirates jumanne usiku, ni wazi sasa hali inabadilika.

Mashabiki wa arsenal waliokuwa wakigombana juu ya mustakabali wa wenger na utawala wa arsenal, waliungana na kuwa kitu kimoja na kuishangilia timu na wachezaji, wanaonekana kutambua sapoti ya mashabiki.

Ukuta wa berlin umekamilika

Siku za nyuma beki ya arsenal ilikuwa kichekesho england, lakini sasa hivi ukuta wa berlin umejengwa upya arsenal. Laurent koscielny anausoma mchezo kama kitabu, wakati per mertesacker anaonyesha kwanini amecheza mechi karibu 100, ujerumani. Bacary sagna na kieran gibbs wamemaliza matatizo yao ya majeruhi.

Vipi kuhusu wojciech szczesny? Siku zote amekuwa akijiamini, lakini sasa hivi anathibitisha ubora wake.

Kikosi kikubwa

Neno hili ni geni kwa arsenal. Lakini baada ya ujio wa ozil na flamini, wenger amefanikiwa kuwa na wachezaji lukuki wa kuchagua kati kati ya uwanja.

Jack wilshere alianzia benchi jumanne usiku, huku theo walcott, alex oxlade-chamberlain, santi cazorla na lukas podolski hawakuwepo kabisa. Na hutakiwi kumsahau abou diaby. Swali je, wenger atawafanya mastaa wote wawe na furaha?

Kucheza kitimu

Mafanikio uwanjani yanatokana na kujiamini na umoja wa wachezaji. Umoja ni kitu ambacho kinaonekana sasa hivi arsenal ikiwa pamoja na kucheza kitimu.

Utani kwenye viwanja vya mazoezi, kupeana tano baada ya bao kufungwa na picha za kushangilia bao zikiwekwa kwenye mitandao ya kijamii baada ya mechi, hakuna ubishi kwamba vijana wa london kaskazini wanafuraha na umoja.

Mwanzo mzuri

Wakati manchester united wakianza kwa ratiba ngumu sana, arsenal wamekuwa na mwanzo rahisi, ukitoa mechi za tottenahm na napoli tu, ambao wote wamekutana nao nyumbani na the gunners wasingeweza kuwa na ratiba rahisi zaidi ya hii. Kazi inakuja kwa mechi dhidi ya chelsea, liverpool na borussia dortmund ambazo ziko njiani.

Wenger ‘the boss’

Siku hizi mashabiki wa arsenal hawaimbi sana jina lake kama zamani, lakini kiitikio cha wimbo wa there's only one arsene wenger, jumanne usiku kilisikika kwenye paa la emirates mashabiki waliimba kwa kumfagilia kocha wao.

Mfaransa huyo almanusura apoteze kibarua chake baada ya kichapo cha aston villa katika mechi ya ufunguzi wa ligi, lakini aligoma kukurupuka na kumsajili flamini bure na ozil. Swali ni je, huu ni mwaka wake wa kumaliza ukame wa miaka nane bila taji?