FERGIE KAONDOKA UBINGWA AU TOP 4 MAN UNITED MTIHANI MSIMU HUU

SIKU Sir Alex Ferguson alipokusanya virago vyake na Big G zake nyingi ambazo amekuwa akitafuna kwenye benchi la ufundi la Manchester United na kupanda juu hadi katika bodi, aliondoka siyo tu na mataji, lakini pia haki ya United kumaliza ‘Top 4’.

Man United wanasikitisha. Angalia vichapo walivyopata kutoka kwa Manchester City, Liverpool na vibonde West Brom, walishindwa kabisa kumiliki mpira na hata kwenye sare ya juzi usiku kwenye Ligi ya Mabingwa Ulaya dhidi ya Shakhtar Donetsk, walishindwa kabisa kufanya mashambulizi ya hatari.

Hata mashabiki wanazi wa United, wanashindwa kutetea kiwango cha timu yao katika mabishano ya vibanda umiza; Rio Ferdinand alishindwa kabisa kukaba, Robin van Persie kufunga amesahau na Ashley Young kusimama tatizo kwake. 

Straika aliyekuwa akililia kuondoka, Wayne Rooney ndiye pekee anaonyesha kiwango cha mchezaji wa dunia kwa sasa katika kikosi cha Man United, nashindwa kujua na yeye angeondoka ingekuwa vipi?

Na hawa ndiyo wachezaji wale wale ambao walikuwa hawakamatiki msimu uliopita na walishinda ligi kirahisi. Unajua kwanini? Ferguson alikuwa bonge la kocha kuwahi kufundisha Ligi Kuu England. Cha kusikitisha Moyes hajamfikia hata kidogo, siyo kwamba ni kocha mbaya, ni tu hajafika ‘levo’ za Fergie.

Ni mara ngapi, Moyes ameshinda ugenini dhidi ya timu za ‘top 4’, alipokuwa Everton?

Hakuwa na kipindi kizuri cha kiangazi. Alimsajili, Marouane Fellaini kucheza sambamba na Michael Carrick kati kati. Fellaini alionyesha kiwango kizuri Everton akicheza nyuma ya straika na alifiti kwenye mfumo wa soka la moja kwa moja lililojaa krosi ambalo lilifundishwa na Moyes. 

Akiwa kama kiungo hana kasi, ananguvu, lakini hapendi kukaba kwa nguvu, stamina hana na siyo fundi, wala mjanja mjanja na hana tofauti na Carrick. Siyo kosa la Moyes kumleta pale, hii inatokana na kwamba alimsajili kutokana na presha ya kukosa wachezaji aliokuwa akiwataka.

United wanakosa ubunifu, kitu ambacho Moyes alijaribu kukitatua wakati wa kiangazi kwa kutaka kuwasajili kina Thiago Alcantara, Cesc Fabregas. Bahati mbaya kwake hakuna aliyetaka kutua Old Trafford.

Hatahivyo, kuna swali linazuka kwanini Shinji Kagawa hachezeshwi katika nafasi iliyomfanya kuonekana kama mmoja kati ya viungo bora duniani pindi alipokuwa Borussia Dortmund?

Hutakiwi kujibu swali hili ambalo limekuwa likiulizwa kila kukicha. Kagawa alikuwa moyo wa Dortmund wakati wakianza kupanda na kutawala Ulaya.

Hakutakuwa na tatizo lolote kumsogeza Rooney mbele acheze kama mshambuliaji nafasi ambayo anaipenda sana na kumpanga Kagawa nyuma yake sehemu ambayo ilimfanya Fergie amuone na kumsajili kutoka Dortmund. Badala ya kuwatumia Danny Welbeck na mzee wa kujiangusha Ashley Young kwenye timu.

Kuiponda United kwa sasa hivi ni kitu rahisi sana, kwa sababu huitaji ‘degree’ ya ukocha kuona makosa kibao ya Moyes katika kikosi cha Man United, lakini kumshambulia siyo lengo la makala haya.

Lengo kuu ni kuonyesha kwamba kikosi chake siyo kikali na hakijawa kikali kwa miaka kadhaa iliyopita tangu enzi zile za utatu mtakatifu wa Rooney, Carlos Tevez na Cristiano Ronaldo ambao kila aliyepita mbele yao ilikuwa kiama.

Ferguson alikuwa anaijua sana kazi yake na kuwafanya United mabingwa hata walipokuwa na timu mbovu. Naweza kusema kwamba kama, Fergie angepewa kufundisha Everton, wangekuwa miongoni mwa timu tishio England na kutoa upinzani kwenye ubingwa. 

Hatahivyo, ukiiangalia ligi ilivyo msimu huu, Man City na Chelsea wanavikosi vikubwa zaidi, Arsenal wanakocha bora na Tottenham Hotspur bahati iko kwao na Liverpool timu walishaijenga msimu uliopita.

Kuwa huru kubishana na ukweli huu, lakini nionavyo, United hawatakuwa mabingwa, washindi wa pili, washindi watatu au wanne wala watano, watamaliza ligi kwenye nafasi ya sita, yangu mimi ni hayo tu.