BARCELONA YATAKA KUMNG'OA JANUZAJ MAN UTD

BARCELONA, Hispania

KLABU ya Barcelona imemtega kinda wa Manchester United, Adnan Januzaj, baada ya kutangaza kuwa ipo tayari kumchukua iwapo atakataa ofa ya kuongeza mkataba. 

Kinda huyo mwenye umri wa miaka 18, amejipatia umaarufu mkubwa, baada ya kufunga mabao mawili katika mchezo wa Ligi Kuu England dhidi ya Sunderland Jumamosi.

Hata hivyo, Barca imekuwa ikifuatilia kipaji cha mwanasoka huyo tangu hajajiunga na United kutoka Anderlecht mwaka 2011 na kwa sasa wanaamini sana kwamba, Januzaj atahamia tu Nou Camp wakati atakapomalizia miezi minane iliyobaki katika mkataba wake. 

Katika hatua nyingine, Januzaj amefunguka akisema kuwa  itamchukua muda kabla ya kuamua ni taifa gani achezee.

Kinda huyo mwenye umri wa miaka 18, alisema jana kuwa kwa sasa anataka kuangalia kibarua chake kabla ya kuamua kuichezea timu ya Taifa ya England.

Januzaj, 18 amekuwa gumzo tangu Jumamosi alipoiwezesha Man Utd kuibuka na ushindi dhidi ya timu ya Sunderland.

Katika mchezo huo, kiungo huyo ndiye aliyefunga mabao mawili yaliyoifanya timu hiyo kuibuka na ushindi wa mabao 2-1 na kumfanya kinda huyo aonekane kuwa mmoja wa wachezaji chipukizi wenye kipaji cha hali ya juu barani Ulaya.

Januzaj alizaliwa mjini Brussels na ana kila kigezo cha kuwa raia wa nchi hiyo, lakini inaelezwa kuwa anaweza kuchukua uraia wa Albania kwa sababu baba yake alizaliwa nchini humo.

Mbali na nchi hizo, pia nyota huyo mwaka 2017 anaweza kupewa uraia wa England kama atapewa kibali cha ukazi wa nchi hiyo na kocha wa Simba hao watatu anasema kuwa anahitaji kupata msaada wa nyota  huyo.

Januzaj alishakataa wazi kuichezea timu ya Taifa ya vijana ya Ubelgiji na anasisitiza kuwa chaguo lake ni kuichezea timu ya Taifa ya Albania.

Shirikisho la Soka England, FA na kocha Hodgson wanahaha kwa sasa ili kuona kama kutakuwa na uwezekano wa kumchukua kinda huyo, lakini yeye anasema kuwa anajisikia mwenye furaha wakati akivuta muda.

 “Kwanza nataka kuelekeza jitihada zangu kwenye kile ambacho nakifanya Manchester United, kwa sababu kwa sasa hili ndilo jambo la muhimu sana katika sehemu ya kazi yangu,” alisema kinda huyo.

 

Januzaj alikiri akisema kuwa kwa sasa anachokitaka ni kufanya vizuri kwenye kikosi cha Manchester  United na alisema kuwa: "Kwa sasa kuhusu soka la timu ya taifa siyo kitu ambacho nakiwazia sana.

"Nafahamu kwanza napaswa kuelekeza jitihada zangu katika kile ninachokifanya Manchester United  kwa sababu kuanzia sasa ndicho kitu muhimu katika kazi yangu,” alisema kinda huyo kabla ya kuongeza kuwa anataka kuhakikisha anacheza vizuri  na kuifanyia kila kitu klabu hiyo.

Mbali na kauli za kinda huyo, pia wakala wake, Dirk De Vriese ameshawaambia viongozi wa timu ya Taifa ya England kwamba wanapaswa kusubiri.