OFISI YA DRFA YAVAMIWA NA MAJAMBAZI, WAWAFUNGA NA KUPORA

OFISI za Chama cha Soka Mkoa wa Dar es Salaam zimevamiwa na watu sita wanaodhaniwa majambazi na kupora komputa mpakato, simu mbili na fedha zaidi ya sh. milioni mbili.

Ofisi hizo zipo ghorofa ya tatu katika jengo la Machinga Complex Ilala.

Akizungumza na wandishi wa habari leo, Katibu wa Chama cha Soka Ilala (IDFA) Daud Kanuti ambaye ni mmoja wa watu walioporwa mali zao alisema tukio hilo lililokea majira ya saa nne asubuhi.

“Nilifika ofisini majira ya saa nne nikamkuta mtu amekaa mapokezi huku akiwa ameshika radio ya upepo (radio call) na pingu baada ya kuingia ndani akaniamrisha nimpe ufunguo wa ofisini kwangu,”

“Baada ya kumpa akanifunga pingu huku akinisukuma kupandisha kwenye vyumba vya ofisi zilivyo ghorofani nilipofika huko nikakuwakuta wenzangu wakiwa wamefungwa kamba miguuni na mikononi na mimi wakanifunga pia,” alisema Kanuti

Kanuti alisema watu hao ambao hawakuficha sura zao walikuwa wakimwambia awape fedha ambazo zipo ndani ya ofisi na walimwambia ni sh. milioni 150.

Pia Kanuti aliwataja wenzake ambao walikuwepo ofisini kuwa ni Ofisa Utawala wa DRFA, Said Pambalelo, wahudumu wawili wa ofisi Ally Rashid na Ramadhan Kondo na Faisal Siri nahodha wa Nungu FC ambaye alikuja kuchukua fomu za usajili.

Aidha alisema pesa zilizochukuliwa ni zaidi ya sh. 1,200,000 ambapo sh 450,000 ni fedha za za usajili wa klabu zilikuwa ndani ya ofisi na nyingine zimeporwa kwenye mifuko yao.

Thamani zingine zilizochukuliwa ni komputa mpakato mali ya Pambalelo na simu ndogo mbili.

Muda mfupi baada ya tukio hilo kutokea askari wa kituo cha Polisi Pangani na Msimbazi vyote vya Ilala walifika na kuchukua maelezo ya awali na baadae waliondoka nao hadi kituo cha polisi Msimbazi kwa maelezo zaidi.