MAANDALIZI MBIO ZA NYIKA YAKAMILIKA

MAANDALIZI ya mashindano ya taifa ya  mbio za nyika yatakayofanyika Arusha Jumamosi yamekamilika na yanatarajia kushirikisha wanariadha kutoka mikoa yote ya Tanzania.

Katibu Mkuu wa Riadha Tanzania (RT) Suleiman Nyambui alisema kuwa, mbio hizo za taifa za wazi ni kwa ajili ya kuchagua wachezaji watakaoingia kambini kujiandaa na mbio za dunia za nyika zitakazofanyika China Machi 28.

Alisema kuwa muda wa mwezi mmoja unatosha kabisa kwa timu ya taifa  itakayochaguliwa kujiandaa kwa ajili ya mashindano hayo ya dunia.

Nyambui alisema mkuwa watachagua wachezaji sita badala ya watano ambao watagharamiwa na Shirikisho la Kimataifa la Vyama vya Riadha (IAAF) ili kuwa na mchezaji mmoja zaidi katika timu hiyo.

Alisema kuwa wachezaji watatatu wa kwanza ndio wanahesabiwa pointi na wengine wawili ni mahsusi kwa ajili ya akiba endapo kuna mchezaji atakayeumia, lakini wao wameongeza mmoja na kuwa sita.

Alisema kuwa ni matarajio yake mikoa yote itapeleka katika mashindanohayo wachezaji walioandaliwa vizuri ili kupata timu bora itakayofanyika vizuri katika mashindano hayo ya dunia.