WENGER ASEMA SUAREZ AKITUA EMIRATES ATATULIA NA ROONEY AREJEA BIMBANI

LONDON, England

KOCHA wa Arsenal, Arsene Wenger, amesema endapo mshambuliaji ‘mtukutu’, Luis Suarez, atasajiliwa lazima atabadilika.

Wenger aliyasema hayo jana, huku akisisitiza kuwa Arsenal ina miiko na tamaduni zake ambazo kila mchezaji lazima atazifuata bila kujali yeye ni nani.

"Tuna tamaduni zetu ambazo tunataka kila mchezaji wetu aziheshimu. Haijalishi yeye ni nani, ametoka wapi. Hii ni klabu iliyojengeka katika misingi ya heshima na hii si katika kipindi cha uongozi wangu tu, bali miaka 130 ya klabu. Miiko hii ndiyo ngao ya timu na lazima iheshimike," alisema Wenger.

Arsenal, imetenga kiasi cha pauni mil. 40 na moja ya nyongeza ili kumnasa  mtukutu huyo aliyefungiwa kucheza mechi 10 kutokana na kitendo cha kumng’ata mchezaji wa Chelsea,  Blaslav Ivanovic, pamoja na utovu wa nidhamu.

Hata hivyo Wenger, alikuwa na kigugumizi alipotakiwa kuthibitisha kama kuna uwezekano wa kumnasa nyota huyo raia wa Uruguay.

 "Sitaki kuongelea suala la Suarez. Hilo ni suala la Liverpool na Arsenal na tunatarajia kukamilisha kile Liverpool inachohitaji, na tutakifanya endapo kutakuwa na uwezekano pande zote," aliongeza kocha huyo.

Lakini kwa upande wa wadau wamegawanyika, kuna wanaopenda kumuona Suarez akitua Emirates, lakini wengine wanapinga kiasi cha fedha kulinganisha na mchezaji mwenyewe.

XXXXXXXXXXXXXXXX

Rooney arejea dimbani

MANCHESTER, England

MSHAMBULIAJI Wayne Rooney, amerejea dimbani, baada ya kuwa nje akiuguza jeraha la paja alilopata mapema Julai, wakati timu yake ikijiandaa na ziara barani Asia.

Nyota huyo, usiku wa kuamkia leo, alitarajiwa kuwa kwenye kikosi kilichokutana na Real Betis katika mchezo wa kirafiki wa mwisho kabla ya kuanza msimu mpya.
Kocha David Moyes, alithibitisha kuwa, Rooney atacheza sambamba na Javier Hernandez ‘Chicharito’, Nemanja Vidic, Antonio Valencia na Luis Nani.

Hata hivyo, maisha ya Rooney Old Trafford ni ya utata, baada ya kuonesha nia ya kutaka kujiunga na Chelsea, lakini kocha Moyes amegoma kumwachia, baada ya kukataa ofa mbili za Chelsea, ikiwemo ile ya pauni mil. 23.