SIMON MIGNOLET KUFUKIA MIKOSI YA PEPE REINA?

 

MAJOGOO wa Merseyside, klabu ya Liverpool, haina kikubwa cha kujivunia katika usajili wa majira haya, zaidi ya kujivunia kunasa saini ya mlinda mlango wa Sunderland, Simon Mignolet. Liverpool 'The Reds,' licha ya kuingiza nyota kama Kolo Toure, Iago Aspas na Luis Albertom, lakini ina kila sababu ya kujivunia ujio wa Mignolet, aliyenaswa kwa ada ya pauni milioni 9. 

Haimaanishi ndiye mchezaji ghali ama wa bei chee katika lugha ya kifedha, la hasha, sema umahiri wake langoni, unamfanya awe kipa sahihi kwa Majogoo hao, walioanza kupoteza matumaini ya kurejesha umaarufu wao, ikiwa ni msimu wa nane bila chochote kikubwa.

Liverpool, tangu watwae ubingwa wa Klabu Bingwa Ulaya (UEFA) 2005, kwa kudra za kipa Jerzy Dudek, aliyezima ndoto za AC Milan, waliokuwa na uhakika wa kutwaa ubingwa huo kwa kuwa mbele kwa mabao 3-0, kipindi cha kwanza, lakini hadi dakika 120, ubao wa matokeo ulikuwa ukisoma 3-3, hivyo kulazimika kuamuliwa kwa mikwaju. Heshima ya Liverpool, iliokolewa na Dudek kwa kupangua mkwaju wa Andrey Shevichenko, wakatwaa ubingwa wa tano, ikiwa ni rekodi ya kipekee kwa England. Hakuna timu iliyofikia idadi hiyo mpaka sasa.

Kumalizika kwa sherehe za 'ubingwa wa maajabu,' mkombozi Dudek, aliamua kutafuta changamoto mpya na kuhamia Real Madrid na nafasi yake kurithiwa na Jose Manuel Paez 'Pepe' Reina, aliyetokea Villarreal ya Hispania. Reina alitabiriwa 'angevaa miwani' ya Dudek na kuendeleza mafanikio aliyoyakuta. Gafla haikuwa hivyo, kinyume chake aliibuka kuwa mwanzo wa mikosi na laana iliyoiandama Liver, ambayo leo hii hadhi yake haithaminiki tena.

Kenny 'King' Dalglish, Roy Hogson, na sasa Brendan Rogers, wamepewa jukumu la kuhakikisha wanarudisha heshima hiyo kama alivyofanya Rafael Benitez 2005, lakini hata matumaini ya kucheza Ligi ya Ulaya (Europa), yanazidi kupungua msimu hadi msimu.

Turudi kwenye mada ya kipa Reina. Pamoja na kuaminishwa kuwa kipa namba moja, katika miaka nane aliyokaa Anfield, uzoefu wake na timu ya taifa ya Hispania, na kwenye michuano mikubwa kama Uefa, ikiwemo kucheza fainali 2007, lakini mechi 400 alizoidakia Liverpool, hazikuwa na maana yoyote, kwani ameshindwa kuwapa taji la thamani kama makipa waliomtangulia.

Ujio wa Mbelgiji Mignolet (25), ambaye mwaka jana alichaguliwa kuwa mchezaji bora kwenye tuzo za Umoja wa Waandishi wa Habari London Kaskazini Mashariki, ana kila dalili za kurejesha kile Tom Hicks na George Gillett na sasa John W. Henry (wamiliki) walichohitaji miaka yote-kuisuka upya Liver irudi kuwa timu ya upinzani EPL .

Katika tuzo hizo, Mignolet aliwabwaga kipa Tim Krul na mshambuliaji Hatem Ben Arfa (wote wa Newcastle), walioingia tatu bora. Lakini pia alitajwa kuwa kipa wa pili kwa kupangua mashuti mengi langoni msimu wa 2012/13, nyuma ya kipa wa West Ham, Jussi Jaaskelainen, huku akimaliza msimu akiwa nafasi ya nne kwa ubora wa makipa, kwa mujibu wa tovuti ya EA Sport.

Mafanikio, uwezo na umahiri wake langoni, ulimpa kiburi aliyekuwa Kocha wa Sunderland, Martin O’neill, aliyekaririwa akisema 'kubaki kwa Sunderland Ligi Kuu ilihitaji nguvu ya mchezaji mmoja tu na Mignolet ndiye anaweza kufanya hivyo,' na kweli ilifanikiwa kubaki, ingawa ilimaliza msimu ikiwa chini ya 'mtukutu' Paolo Di Canio.

Ahadi ya kwanza ya mmiliki Henry, ilikuwa ni kuhakikisha Liverpool, inarejesha heshima, ikiwa ni sehemu ya kuimarisha  hali ya uchumi.

Kwa mujibu wa tovuti ya klabu hiyo ‘Thisi is Anfield’, iliripoti kuwa msimu uliopita ilishuka mpaka nafasi ya 21 kutoka 18, katika masuala ya kuvuna mkwanja. Sababu iliyotajwa ni kukosekana kwenye mashindano makubwa kama Uefa na nne bora za Ligi Kuu. Kuporomoka huko, kumemfanya mmiliki, Henry kuwaandikia wadau wa timu hiyo barua ya wazi kuhusu mradi alionao - kuijenga upya Liverpool ikiwa ni kumpatia uhuru kocha kwenye usajili.

Na kweli Rogers, pamoja na kuwepo pengo la kiungo mkabaji na mshambuliaji wa pili (No.10), kwa upande wa pili, alitumia jicho la tatu kutafuta kipa mwenye kutembelea kivuli cha Dudek, aliyeipa mafanikio, kinyume na Reina aliyeonekana kuwa mchawi wa mataji Anfield. Swali ni Je, ataweza kufukia laana za Reina na kufufua mizimu ya Dudek?

Ujio wa Mignolet, unatajwa kama sababu ya Reina kuhamia Napoli kwa mkopo, pengine alitambua kiwango chake kilikuwa bora  mbele ya kina Alexander Doni, Scott Carson, Brad Jones na Diego Cavalieri, lakini si mbele ya Mbelgiji huyo aliyesimama langoni mechi zote za Ligi kuu msimu ulipoita.

Msimu uliopita, Reina aliongoza orodha ya makipa waliofanya madudu 'blunders,' licha ya kucheza mechi chache (31), makosa sita ya kizembe na kuifungisha timu, pamoja na kufungwa mabao manne rahisi, jumla mabao 10 yalimfanya kuongoza orodha ya makipa 'majuha' wakati Mignolet alifanya makosa mawili na kufungisha mawili, katika mechi zote (38) za Ligi Kuu na michuano mingine.

Takwimu zao 2012; Mignolet aliokoa mashuti 149, Reina 73, wakati uwezo wa kuipa ushindi timu Mignolet 96% Reina 89.

Plani ya kocha Rogers ya kuomba kupewa majukumu ya kuijenga na kujimwaya mwaya sokoni kumsajili amtakaye, ujio wa kipa bora London, kuna uwezekano akaibuka mchezaji bora wa Merseyside muda mfupi.

Makala hii imeandaliwa na Nicodemus Sinolest kwa msaada wa mitandao.