NURDIN ATUA RHINO RANGERS YA TABORA

KIUNGO mshambuliaji wa zamani wa timu ya Yanga, Nurdin Bakari na wenzake watatu waliokuwa wanachezea Ligi Kuu msimu uliopita, wamesajiliwa na Rhino Rangers kwa ajili ya msimu wa 2013/14.

Akizungumza na LENZI YA MICHEZO, Kocha Mkuu mpya wa Rhino Rangers, Sebastian Nkoma alisema kuwa Nurdin alisajiliwa wiki iliyopita pamoja na wachezaji wengine wakongwe wazoefu wa ligi kuu.

Aliwataja wachezaji wengine waliosajiliwa pamoja na Nurdin kuwa ni mabeki, Ladislaus Mbogo aliyeachwa na Yanga, Laban Kambole na Salum Kamane kutoka Kagera Sugar.

Kocha huyo ambaye amerithi mikoba ya Renatus Shija aliyetimuliwa alisema uongozi wa timu hiyo mpaka sasa umekamilisha usajili wa wachezaji 27 wengi wakiwa ni wageni katika michuano ya Ligi Kuu huku wazoefu wakiwa ni hao wanne tu.

“Jana (juzi), tumefunga rasmi usajili wetu kwa ajili ya ligi kuu msimu huu, tuna imani kikosi hicho kitaweza kuhimili vishindo na kuleta ushindani katika ligi hiyo,” alisema.

Nkoma alisema kwa sasa wachezaji wote akiwemo Nurdin, wamesharipoti kambini kujiandaa na ligi hiyo inayotarajiwa kuanza Agosti 24 mwaka huu, ambapo Rhino imepangwa kuanza na Simba katika Uwanja wa Ally Hassan Mwinyi, mjini Tabora.