FATUMA BUSHIRI MCHEZAJI WA TWIGA STARS ANAYEMHUSUDU REDONDO WA SIMBA

“NACHEZA soka kwa sababu ni mchezo ninaoupenda ila hakuna manufaa niliyopata kuanzia nianze kucheza zaidi ya kufanikiwa kununua fanicha tu”, ni maneno ya kiungo wa kati wa Sayari Women na Twiga Stars, Fatuma Bushiri.

Katika safari yake ya kucheza soka alianza kuchezea timu ya wanaume inayoitwa Papili ya mtaani kwao Mwanayamala kwa Kopa wakati akisoma shule ya msingi Mwananyamala.

 Fatuma ambaye wasifu wake wa nje anafanana na mwanaume kutokana na uvaaji wake na staili yake ya nywele (rasta)  anasema  anatamani kama kanuni za ligi ya Tanzania ingeruhusu timu za kiume  kusajili wachezaji wa kike ili siku moja  acheze timu moja na Ramadhani Chombo “Redondo” wa Simba kwani anapenda anavyocheza pindi awapo uwanjani.

Katika safari ya kucheza soka Fatuma anasema amekumbana na mambo mengi ya kuhuzunisha na kufurahisha lakini hawezi kusahau mchezo wa kutafuta kufuzu fainali za wanawake za Afrika kati ya Twiga Stars na Ethiopia.

Twiga ugenini jijini Addis Ababa ilifungwa na wenyeji wao Ethiopia mabao 2-1, lakini ikiwa na matumaini ya kutumia vyema bao la ugenini ilijikuta ikilala bao 1-0 kwenye Uwanja wa Taifa katika mchezo wa marudiano na hivyo kukosa tiketi ya kurudi tena kwenye fainali za wanawake zilizokuwa zifanyike nchini Equatorial Guinnea.

Fatuma ambaye ni kifungua mimba kwa mama Salma Abdallah mwenye watoto watatu  alizaliwa Agosti 16, mwaka 1990 jijini  Dar es salaam na alianza darasa la kwanza mwaka 1998 na kuhitimu darasa la saba 2004 katika shule ya Msingi Mwananyamala.

Baada ya kushindwa kuendelea na elimu ya sekondari kutokana na kipato cha wazazi wake kutomudu  kwani alilelewa na mama pekee kwa sababu mama walitengana na baba yake alianza kujihusisha na kikamilifu kwenye soka.

Timu ya kwanza kumsajili ni Mndela Queens tangu mwaka 2006-2010 ambapo ilianza  kushiriki ligi ya wanawake wilaya ya Kinondoni na baadae ilipanda ligi ya Mkoa wa Dar es salaam kutwaa ubingwa wa ligi ya wanawake 2010.

Licha ya kuisaidia Mndela kutwaa ubingwa msimu mwaka 2011 aliipa kisogo Mndela Queens na kujiunga na Simba Queens na kuisadia kuleta changamoto kwa vigogo wa soka la wanawake, Sayari Women na Mburahati Queens na Simba ilifanikiwa kushika nafasi ya tatu msimu wa 2011/2012.

Hata hivyo hakudumu Simba Queens, badala yake alijiunga na Sayari Women ambayo ilikimbiwa na nyota wake wengi kama Fatuma Omari na Sophia Mwasikili aliyesajiwa kucheza soka la kulipwa Uturuki.

Kutokana na kujituma kwake na kuzifumania nyavu kwa umaridadi aliitwa Twiga Stars tangu mwaka 2006 hadi timu ilipoitwa mara ya mwisho mwaka jana.

Kiungo huyu anasema pamoja na kuwa hakuna mafanikio makubwa kwenye soka la wanawake huwa anaumia sana pindi timu inapofungwa hasa timu ya Taifa ya wanawake.

Anasikitika sana kuona soka la wanawake halipewi kipaumbele kama soka la wanaume kwani kama wangepewa sapoti Twiga Stars ingekuwa mbali.

“Sisi wanawake hatupati sapoti kutoka kwa viongozi, tunaweza kuwepo uwanjani tunafanya mazoezi ikija timu ya taifa ya wanaume tunaondolewa hata kabla ya program ya kocha haijamalizika, hii inaonyesha jinsi soka la wanawake linavyodharauliwa”, alisema Fatuma

Pia anasisitiza kuwa pamoja na  kutopewa sapoti inavyotakiwa Twiga stars ndiyo timu ya soka nchini kucheza mashindano makubwa kwani 2011 waliwakilisha Tanzania kwenye mashindano ya Olympiki yaliyofanyika nchini Msumbiji, mashandano ambayo anakiri ndiyo waliyowahi kupewa posho ambayo iliwaridhisha kidogo.

Mama yake Fatuma anapinga sana uvaaji wa binti yake na staili yake ya nywele kwani anamchukulia kama mhuni jambo ambalo Fatuma analipinga na anasononeka kuona mama yake kutokubali staili yake.

“Mama yangu ananisema kuhusu uvaaji wangu wa mavazi ya kiume na staili yangu ya nywele na hapendi kuniona hivi lakini mimi najiona niko sawa”, alisema