DHUMNA KUKOSA UMAARUFU WAKULAUMIWA NI VIONGOZI

MJUE ABDALLAH ABDI KIJANA ALIYEANZA KUCHEZA DHUMNA AKIWA ANASOMA SEKONDARI

Abdallah Abdi kichanganya mabafa tayari kuanza kucheza mchezo

“BARAZANI nyumbani kwetu kulikuwa na klabu yaFadhila ya mchezo huu hivyo nikitoka shule nilikuwa nakaa naangalia jinsi wanavyocheza baada ya wao kumaliza na wakirudisha vifaa ndani mimi napanga naanza kucheza”, huu ulikuwa mwanzo wa mazungumzo yangu na Abdallah Abdi.

Abdi anasema alianza kucheza dhumna mwaka 1990 na mwaka uliofuata alitokea kuwa mchezaji tegemeo kwenye klabu ya dhumna ya Fadhila iliyopo mjini Tanga ambayo mwaka huo waliuwa mabingwa wa mkoa wa Tanga wakiwa na wachezaji Musa Kishingo, Abeid na Anzuan.

“Wakati nasoma pia nilikuwa nacheza soka nikirudi nyumbani jioni ndio naangalia jinsi wanavyocheza dhumna na baadae nikatokea kuwa mchezaji tegemeo kwenye klabu ya Fadhila”, alisema Abdi ambaye hata hivyo hadumu na klabu hiyo kwani alikwenda Arusha kwa ajili masomo ya Ufundi kwenye chuo cha Ufundi Arusha ambacho kwa sasa kinatoa elimu ya Ufundi kwa ngazi ya Chuo Kikuu

Akiwa Arusha mwaka 1992 alianzisha klabu iliyojulikana kama Revolution ambayo alidumu nayo kwa muda wa miaka miwili kwani mwaka 1993 alihamia Dar es Salaam.

“Baada ya kuanzisha klabu ya Revolution sikukaa nayo muda mrefu kwani nilikatisha masomo na kuelekea Dar es Salaam kutafuta maisha”, alisema kaka huyu mwenye lafudhi ya Kiswahili cha Pwani.

Nilipofika Dar es Salaam kwa sababu nilikuwa sina klabu iliyosajili ili kuweza kushiriki mashindano ya wilaya ya Ilala nilisajiliwa Tawaqal mwaka 1995 na aliisaidia klabu ya Tawaqal ilishika nafasi ya pili na alipokuwa na klabu ya Mzizima na kucheza kwenye mashindano ya mkoa wa Dar es Salaam, Mzizima ilishika nafasi ya tatu na bingwa ilikuwa klabu ya Idrisa ya Magomeni.

“Nilisajiliwa na kucheza kwenye vilabu vya Tawaqal na Mzizima kwa sababu klabu yetu ya Mafia tuliyoianzisha mwaka 1995 ilikuwa haijapata usajili, na mimi ndie mwanzilishi wa klabu hii na ina vifaa vyote vya mchezo wa dhumna”, alisema

Pia aliwataja waanzilishi wenzake kuwa ni Mzee Mwinyi Hamis ambaye ni Mwenyekiti hadi sasa yupo, Ibrahim Musa ambaye ni nahodha, Masilahi Salum Makamu Mwenyekiti, Faridi Hamis, Mzee Mageda na Said Bane hawa ni marehemu.

 Baada ya kupata usajili waliendelea na mazoezi na mwaka 1998 walishiriki mashindano ya wilaya ya Ilala ambapo klabu yake iliibuka Bingwa na kupewa kikombe na seti mbili za vifaa vya mchezo wa dhumna na Mh. Idd Zungu ambaye ni mbunge wa jimbo la Ilala kupitia Chama cha Mapinduzi, mashindano ambayo ndio ya mwisho kufanyika.

Abdallah Abdi ambaye ni Ofisa Utawala Mkuu wa Kampuni ya Masoko Ltd,  iliyopo jijini Dar es Salaaam na baba wa watoto watatu ana waasa wachezaji washirikiane ili warudishe hadhi ya mchezo huo ili uweze kupata wadhamini.

“Nawaasa wachezaji na vilabu vishirikiane ili kuupa hadhi mchezo wa dhumna ili tuweze kupata wafadhili kama ulivyokuwa enzi za ufadhili wa Suchak na Sas kwani ulipata umaarufu mpaka ukaimbwa kwenye taarabu”, alisema Abdi.

Pia anasema raha ya mchezo wa dhumna inaonekana wakati wanaocheza wanatamka majina ya mabafa mfano; bayadha, abaliyek,dubara, dusa, duruji, dabashi, dusheshi, yek do, salim johari, besh shesh na nyinginezo.

Abdi ambaye alihitimu shule ya Sekondari ya Jumuiya  mwaka 1991, anasema kamwe hatasahau siku ya fainali za 1996 ngazi ya wilaya ya Ilala akiwa na klabu ya Tawaqal ambapo yeye alikuwa mchezaji wa 10 na alitakiwa ashinde bao 3-0 ili klabu yake iwe Bingwa lakini akiwa amefikisha ponti 99 mpinzani wake alifanikiwa kuchanga vema na kushinda kwa bao 2-1.

“Kitendo cha kushindwa kwenye fainali hizo kiliniumiza sana kwani niliaminiwa lakini nilipoteza kwenye dakika za mwisho na unajua mchezo ni bahati ila sitakaa nisahau”, alisema Abdi.

Abdi ambaye alisoma shule ya Msingi ya msingi Lumumba jijini Dar es Salaam kuanzia darasa la kwanza hadi la tano na baadae kumalizia shule ya msingi Mabawa iliyopo Tanga anawashukuru wazazi wake, baba Abdi Juma na mama Mwanaima Abdallah kwa malezi bora waliyompatia  kwenye elimu kidini na elimu dunia.

 “Nimezaliwa kwenye familia yenye watoto sita na nawashukuru wazazi wangu kwa malezi bora waliyonipatia kwani imekuwa mwanga kuweza kuishi popote na watu wa aina mbalimbali”, alisema

Pia alisema pamoja na kuwa dhumna haina kipato kama mchezo wa soka ila ni mchezo mzuri ambao unajenga akili anawaomba viongozi kusimamia vema mchezo huu kwa kuanzisha mashindano kama ilivyokuwa miaka ya tisini.

“Pamoja na kuwa mchezo huu unachezwa sana sehemu za pwani si mchezo wa magoigoi na ndio maana unachezwa mara nyingi kuanzia jioni muda ambao kila mtu keshatoka kwenye mihangaiko ya kutwa”, alisema

Abdi ametoa wito kwa serikali na viongozi kutoa fursa sawa kwa michezo yote ili kusaidia kuinua michezo yote ipate kujulikana na watu kwani kuna michezo iliyosahaulika kama dhumna.