MJUE KOCHA ALIYEIPANDISHA ASHANTI UNITED LIGI KUU

Kocha Mubaraka Hassan akitoa maelekezo kwa mchezaji

MUBARAKA HASSAN KOCHA MWENYE HISTORIA NZURI NA ASHANTI UNITED

Aliipandisha ikaiacha ikashuka daraja na sasa ameipandisha tena

“SOKA ni mchezo  wenye mashabiki wengi duniani kote na hata Tanzania unaongoza pia lakini wachezaji wa siku hizi hawautendei haki mchezo huu”, huu ulikuwa ni mwanzo wa mazungumzo yangu na kocha Mubaraka Hassan

Ni kocha mwenye sura ya upole lakini mkali akiwa kwenye kazi kwani hata aje mchezaji ambaye ameshindikana kwenye timu nyingine kwake lazima atafuata maelekezo yake ipasavyo lakini anasema kamwe hatasahau alipoteguka mkono wakati  akicheza mpira kwenye uwanja wa Msimbazi Rovers na wachezaji wenzake wa timu ya Msimbazi Mission, wakamrudisha nyumbani akaenda kupelekwa hospitali ya Muhimbili na mama yake.

Anasema kuwa enzi wakicheza soka walikuwa wanajitoa kwa sababu wachezaji walikuwa wana mapenzi ya dhati na timu wanayochezea kamwe huwezi kumkuta mchezaji anachezea timu ambayo hana mapenzi nayo lakini siku hizi wanafuata pesa na marupurupu.

Pia anatabainisha kuwa hata vilabu vya Simba na Yanga vilikuwa vinasajili wachezaji ambao wana mapenzi ya kweli na klabu yao na ilikuwa nadra kumkuta mchezaji msimu huu akiwa anachezea Simba na Msimu ujao ukamkuta anachezea Yanga. Anaendelea kusema kuwa Yanga walikuwa wanachekua wachezaji kwenye timu ya African ya Temeke na Simba walikuwa wanachukua kwenye Good hope ya Temeke pia            
                                                                                    

Mubaraka amechezea timu nyingi katika mikoa mbalimbali nchini Tanzania lakini alimalizia soka lake kwenye timu za Pentagon ya Ilala  na Dandee United ya Dodoma.

“Siku hizi wachezaji wanafuata pesa tu kwenye vilabu wanavyochezea kwani uchezaji wao uwanjani haulingani na pesa wanazolipwa tofauti na enzi zetu tunalipwa kidogo lakini mtu anajitoa kiukweli”

Alianza kufundisha “ukocha’ mwaka 1995 baada ya kuamua kutundika daruga kwani alikuwa kiungo namba nane wa kutegemewa licha ya kuwa soka lake lilishia daraja la kwanza.

Timu ambazo amewahi kuzifudisha kwa vipindi tofauti ni Peshico, Pentagon, Mkunguni, Cosmo Politan, Manyema na Ashanti United zote ni za Ilala ila anasema Ashanti ndio timu ambayo ana historia ndefu nayo.

“Ashanti ni timu pekee ambayo naweza kusema nina mafanikio nayo kwani nilianza kuifundisha mwaka 2004 ikafanikiwa kuingia Ligi Kuu mwaka 2005 nikaicha ikashuka daraja na sasa niliichukua tena kuanzia mwaka 2012 na mwaka huu imefanikiwa kuingia tena Ligi Kuu”, alisema Mubaraka huku akitabasamu.

Mubaraka anasema kuwa wakati alipoipandisha Ashanti United Ligi Kuu mwaka 2005 aliendelea kuifundisha na ikafanikiwa kuleta changamoto kwenye ligi kuu kwa misimu mitatu aliyokuwa nayo kwenye ligi Kuu lakini mwaka 2008 aliondoka Ashanti na msimu huo Ashanti ikashuka daraja.

Pia anasema baadaye Ashanti ilicheza ligi daraja la kwanza msimu mmoja tu ambao ni mwaka 2009 na misimu miwili timu ilipumzika baada ya Shirikisho la Soka Tanzania (TFF) kubadilisha kanuni za kuendesha ligi kwa kuondoa madaraja na kuingiza ligi kwa mfumo ngazi ya wilaya, mkoa na taifa.

Mfumo ambao msimu huu umefutwa na kurejeshwa ule wa zamani wa madaraja jambao ambalo Mubaraka anasema ndio mfumo mzuri kwa kuendeleza soka kwani haiwezekani timu ishuke kutoka Ligi Kuu iende hadi ngazi ya wilaya ikaanze kushindana upya kutafuta kupanda tena.

“Timu ikishuka kutoka ligi kuu inakwenda hadi ngazi ya wilaya inakuwa vigumu tena kwa timu kujipanga kurudi tena na mfumo huo ulipoteza timu nyingi kama hazikuwa na mipango thabiti”, alisema

Baada ya Ashanti kupumzika kwa miaka miwili, Mubaraka alianza tena kuifundisha mwaka 2012 akianzia ngazi ya wilaya, ikachukua ubingwa wa wilaya ikafanikiwa kucheza ligi ya Kanda kwa Mkoa wa Dar es Salaam, safari hii ikapenya tena ikiwa miongoni mwa timu tatu zilizoingia ligi daraja la kwanza zikitokea Dar es Salaam.

“Ligi ya Kanda Mkoa wa Dar es salaam ilikuwa ngumu lakini kulingana na jinsi nilivyowafundisha wachezaji na kujenga nidhamu ilinisaidia kufanikiwa kuingia ngazi ya kituo ambayo ilikuwa Musoma na huko ndio kulikuwa na uzalendo wa hali ya juu kwani bila nidhamu niliyokuwa nasisitiza hasira zilizotokana na kuonewa na waamuzi zingeweza kabisa kufanya timu kuondolewa kwenye mashindano.

Tulifanikiwa kupenya kwenye kituo na kuingia Ligi daraja la Kwanza, kwa kuwa na nidhamu na wachezaji wenye kufuata maelekezo yangu. Nilijitahidi kuibadilisha Ashanti kwani kuna sifa ambayo ilikuwa imeenea miongoni kwa baadhi ya wadau kuwa wachezaji wa timu ya Ashanti ina nidhamu mbaya na sikutaka iwe hivyo kwani malengo yalikuwa ni kufika ligi kuu na tunamshukuru Mungu tumefanikiwa kabla hata hatujamaliza ligi”, alisema Mubaraka huku akitoa pongezi kwa uongozi wa Ashanti kwa sapoti kubwa kwao na mashabiki.

Mubaraka anasema kuwa Ashanti ikiwa daraja la kwanza kwenye kundi B, imecheza michezo 12, imeshinda michezo 8 na imetoka sare michezo 4 ina pointi 28 na imebakisha michezo 2 na mpaka sasa hakuna mchezaji yeyote aliyeonyeshwa kadi nyekundu.

Pointi 28 ilizonazo hakuna timu yeyote itakayozifikia kwani wapinzani wao Villa Squad ya Kinondoni ina pointi 20 na ikifanikiwa kushinda michezo miwili iliyobakia itakuwa na pointi 26 tu.

Mubaraka anasema pamoja na kucheza soka na kufundisha hakuna mafanikio yeyote ambayo anaweza kusema yametokana na mpira zaidi ya kuwa maarufu tu mjini lakini anatoa wito kwa makocha wengine waige mfano wake kwa kujitolewa kufundisha vilabu vya huku chini ili kuinua soka la Tanzania na kuendeleza kipaji chao kwani kufundisha inasaidia kujenga ubunifu wa ufundishaji (skills).

“Sina mafanikio yeyote ambayo naweza kusema yametokana na mpira ila nashukuru umeniweka karibu na watu wengi na nimefahamika pia lakini nawaasa makocha wenzangu waache kukimbilia vilabu vikubwa kwa sababu ya maslahi wasaidie pia vilabu vidogo ili kujenga timu bora na wachezaji wenye kujua soka”, alisema Mubaraka.

Kocha huyu mwenye mke na watoto wane mmoja akiwa mvulana anasema kuwa wachezaji watumie vipaji vyao kwenye soka na kujituma zaidi si kuchanganya vipaji viwili huku akimtolea mfano Ali Kiba ambaye ni mchezaji mzuri na mwanamziki pia lakini amebaki kwenye mzuki kwani ndio kwenye mafanikio zaidi.

Pia anasisitiza wachezaji, makocha na viongozi wa soka wawe na uzalendo wa kweli katika soka ili kusaidia kuendeleza soka la Tanzania