TIMU 15 ZIMEFUZU HATUA YA 16 YA ASFC

TIMU 15 zimefuzu katika hatua ya 16 ya Kombe la Shirikisho maarufu kama Azam Sports Federation Cup – ASFC katika michezo iliyochezwa Januari 30-31 katika viwanja tofauti.

Akizungumza jana Ofisa Habari wa Shrikisho la Soka Tanzania, Clinford Ndimbo alisema timu 10 ni za Ligi Kuu, nne ni za ligi daraja la kwanza na moja ni ya mabingwa wa mikoa.

“Mpaka sasa ni timu 15 zilizofuzu hatua ya 16 bora hivyo timu moja itapatikana baadae maana mchezo huo itahusisha timu za daraja la kwanza ambazo ziliomba mechi zao zisogezwe mbele ili wamalize ligi daraja la kwanza,” alisema Ndimbo.

Ndimbo alisema mchezo huo utazihusisha KMC dhidi ya Toto Africans na utachezwa Februari 7 baada ya kuhitimishwa ligi daraja la kwanza ambayo itafikia tamati Februari 4.

Timu zilizofuzu ni Azam FC, Yanga, Mbao FC, Ndanda FC, Tanzania Prisons, Njombe Mji, Mtibwa Sugar, Stand United, Majimaji na Singida United.

Nyingine ni Dodoma FC, JKT Tanzania, Polisi Tanzania, Kiluvya  na mabingwa wa mkoa Buseresere FC.

Bingwa wa mashindano hayo anawakilisha nchi katika mashindano ya klabu bingwa barani Afrika na mwaka huu mwakilishi ni Simba ambaye aliondolewa katika hatua ya 64.