CAF YAWATOLEA NJE EMANUEL OKWI NA WALUSIMBI KUCHEZA CHAN

Uganda Cranes itawakosa mlinzi Godfrey Walusimbi na mshambuliaji nyota Emmanuel Okwi kwenye fainali zijazo za mataifa ya Afrika kwa wachezaji wa ndani CHAN nchini Afrika kusini kufuatia taarifa ya shirikisho la soka Afrika (CAF) kusema wachezaji hao wamekosa uhalali kwani bado wana mikataba na vilabu vyaoa vya nje ya nchi yao. 

Bodi ya mashindano ya CAF ilikuwa ikijibu maombi ya mapema ya shirikisho la soka nchini Uganda FUFA yaliyo kuwa yakitaka ufafanuzi juu ya uwezekano wa kupatikana kwao kwenye fainali hizo.

 Okwi na Walusimbi ambao kwasasa wanaichezea Sports Club Villa ya Uganda waliviacha vilabu vya katika mazingira ya sintofahamu huku madai yao makubwa yakiguzia kuvunjwa kwa masharti ya mikataba yao na vilabu vyao lakini baadaye CAF na FIFA wakawapa idhini ya kuchezea vilabu vya nyumbani kwao.

Okwi aliiacha klabu yake ya Etoile Du Sahel ya Tunisia kwa madai ya kutokulipwa pesa yake yote ya usajili huku Walusimbi akishindwa kurejea tena DR Congo katika klabu yake ya CS Don Bosco baada ya kuitumikia timu ya taifa ya Uganda Cranes dhidi ya Liberia kwenye mchezo wa kuwani kufuzu kombe la dunia 2014 akieleza kuwa hakukuwa na malezi mazuri ndani ya klabu hiyo.

Ingawa CAF iliwaruhusu kuchezea SC Villa, taarifa zinadai kuwa wawili hao bado wana mikataba na vilabu vyao hivyo na kwamba wanachezea SC Villa kwa mkopo. 

Kwa mujibu wa taarifa kupitia mtandao wa habari za michezo wa Kawowo Sports nchini Uganda juhudi za kumpata mtendaji mkuu wa FUFA Edgar Watson zinaendelea kutoa muendelezo wa taarifa hii.

Uganda iko katika kundi B pamoja na Morocco, Burkina Faso na  Zimbabwe.