FRAT YAPONGEZWA KWA KUJALI AFYA ZA WANACHAMA WAKE

UONGOZI wa Chama cha Madaktari Tanzania, (TASMA) kimekipongeza chama cha Waamuzi Taifa (FRAT) kwa kujali afya za wanachama wao kwani ndicho chama pekee nchini ambacho kinafuatilia kwa makini afya za wanachama.

Akizungumza jijinI, Katibu wa TASMA, Nassor Matuzya, alisema katika vyote vya michezo ambavyo vinatakiwa kuhudumiwa na TASMA, chama pekee ambbacho kinawapima wanachama wake kabla ya kufanya mitihani ya utimamu ni FRAT ikifuatwa na TFF tu.

“Naipongeza FRAT kwani imekuwa makini kuhakikisha hakuna mwanachama wake ambaye ambaye anaingia kwenye mitihani ya utimamu bila kuchunguzwa afya ikifuatiwa na TFF lakini vyama vingine bado havijaleta taarifa wala kushirikiana nasi katika jambo lolote”, alisema Matuzya.

Pia aliwataka viongozi wa vyama vyote vya michezo kuhakikisha wanawatumia madaktari ambao ni wanachama wa TASMA kwani wamepitia mafunzo ya tiba ya wanamichezo bada ya kuchukuwa madaktari ambao hawana elimu kitu ambacho ni hatari kwa afya ya mchezaji.

Vyama ambavyo alivitaja vipo na vinaendesha mashindano lakini havishikiani na TASMA ni CHANETA, Vyama vyote vya ngumi, Chama cha Mchezo wa kikapu, Chama cha Mchezo wa Wavu, Kareti, Kuogelea, Magongo na mingine mingi.

Matuzya alisema ifike mahali sasa viongozi waweke mbele kuthamini afya za wana michezo kwa kutumia madaktari wenye sifa kwani ni moja ya majukumu ya TASMA ya kuyatekeleza.

Pia alivipongeza klabu za Simba, Yanga na Azam kwa kuwa mfano wa kuigwa katika kupima afya za wachezaji wake.